រដ្ឋមន្រ្តីការបរទេសសហរដ្ឋអាមេរិកលោក Mike Pompeo បានជំរុញបណ្តាប្រទេសនៅក្នុងតំបន់អាស៊ីអាគ្នេយ៍នៅថ្ងៃព្រហស្បត៍នេះឲ្យកាត់ផ្តាច់ទំនាក់ទំនងជាមួយក្រុមហ៊ុនចិនដែលជួយសាងសង់កោះនានាក្នុងសមុទ្រចិនខាងត្បូង។ លោកថ្លែងដូច្នេះក្នុងពេលប៉ុន្មានសប្តាហ៍ក្រោយមក បន្ទាប់ពីសហរដ្ឋអាមេរិកបានដាក់ក្នុងបញ្ជីខ្មៅនូវក្រុមហ៊ុនចិនជាង ២០ ដែលបានធ្វើការក្នុងដែនទឹកដែលមានជម្លោះនោះ។ នេះបើតាមសេចក្ដីរាយការណ៍របស់ទីភ្នាក់ងារព័ត៌មាន AFP។
ការលើកឡើងរបស់លោករដ្ឋមន្រ្តី Pompeo នេះ បានធ្វើឡើងនៅឯកិច្ចប្រជុំរដ្ឋមន្ត្រីការបរទេសអាស៊ានតាមអនឡាញ ដែលត្រូវបានគ្របដណ្តប់ដោយការប្រជែងគ្នារវាងសហរដ្ឋអាមេរិកនិងចិនលើបញ្ហាមួយចំនួនតាំងពីបញ្ហាពាណិជ្ជកម្មរហូតដល់ជំងឺកូវីដ១៩។
ភាពតានតឹងក៏កំពុងកើនកម្តៅផងដែរទាក់ទិននឹងបញ្ហាសមុទ្រចិនខាងត្បូង ដោយសហរដ្ឋអាមេរិកកាលពីខែមុន បានដាក់ទណ្ឌកម្មលើក្រុមហ៊ុនរបស់រដ្ឋាភិបាលចិនចំនួន ២៤ ដែលខ្លួនអះអាងថា បានជួយស្ថាបនាទីតាំងយោធារបស់រដ្ឋាភិបាលក្រុងប៉េកាំងក្នុងសមុទ្រចិនខាងត្បូងដែលសម្បូរដោយធនធាននោះ។
លោក Pompeo បានមានប្រសាសន៍ទៀតថា វាដល់ពេលសម្រាប់រដ្ឋាភិបាលនៅតំបន់អាស៊ីអាគ្នេយ៍ពិចារណាឡើងវិញនូវទំនាក់ទំនងរបស់ខ្លួនជាមួយបណ្តាក្រុមហ៊ុនចិនដែលធ្វើការនៅក្នុងសមុទ្រនោះ។
លោក Pompeo បានប្រាប់រដ្ឋមន្រ្តីការបរទេសនៃប្រទេសទាំង ១០ នៃសមាគមអាស៊ាន ក្នុងអំឡុងពេលកិច្ចប្រជុំកំពូលតាមអនឡាញនោះថា៖ «កុំគ្រាន់តែនិយាយ ប៉ុន្តែត្រូវធ្វើសកម្មភាព»។
លោក Pompeo បានបន្តទៀតថា៖ «ចូរពិចារណាឡើងវិញនូវការធ្វើអាជីវកម្មជាមួយបណ្តាក្រុមហ៊ុនរបស់រដ្ឋាភិបាលចិនទាំងនោះ ដែលបានរំខានយាយីដល់បណ្តាប្រទេសអាស៊ាននៅតាមបណ្តោយឆ្នេរនៃសមុទ្រចិនខាងត្បូង។ ចូរកុំឲ្យគណបក្សកុម្មុយនីស្ដចិនកេងប្រវ័ញ្ចលើយើង និងប្រជាពលរដ្ឋរបស់យើង»។
ក្រសួងការបរទេសសហរដ្ឋអាមេរិកបានបញ្ជាក់នៅក្នុងសេចក្ដីប្រកាសកាលពីថ្ងៃពុធម្សិលមិញថា លោក Pompeo ក៏បានលើកឡើងផងដែរអំពីការគាំទ្ររបស់សហរដ្ឋអាមេរិកលើគោលការណ៍ «បើកចំហ រួមរស់ជាមួយគ្នា តម្លាភាព និងការគោរពច្បាប់អន្តរជាតិ» ក៏ដូចជាបានសរសើរអាស៊ានថាមាន «សាមគ្គីភាព» និង «តម្លាភាព» នៅក្នុងការឆ្លើយតបទៅនឹងវិបត្តិជំងឺកូវីដ១៩ និងបានបង្ហាញអំពីកិច្ចប្រឹងប្រែងរបស់សហរដ្ឋអាមេរិកនៅក្នុងការបង្កើតវ៉ាក់សាំងការពារជំងឺកូវីដ១៩ នេះ៕
