រដ្ឋមន្ត្រីការបរទេសសហរដ្ឋអាមេរិកលោក Mike Pompeo នៅថ្ងៃព្រហស្បតិ៍នេះ បានមានប្រតិកម្មតបទៅនឹងសេចក្ដីរាយការណ៍របស់ប្រព័ន្ធផ្សព្វផ្សាយរដ្ឋរបស់ប្រទេសកូរ៉េខាងជើងដែលបានផ្សាយថា លោកប្រធានាធិបតី Donald Trump បានយល់ព្រមនៅក្នុងអំឡុងពេលកិច្ចប្រជុំរបស់លោកជាមួយនឹងមេដឹកនាំកូរ៉េខាងជើងលោក Kim Jong Un នៅក្នុងប្រទេសសិង្ហបុរីកាលពីថ្ងៃអង្គារកន្លងទៅនេះថា សហរដ្ឋអាមេរិកនឹងដកទណ្ឌកម្មជាបន្តបន្ទាប់ចេញពីប្រទេសកូរ៉េខាងជើង។
លោក Pompeo បាននិយាយថា លោក Trump បានបញ្ជាក់យ៉ាងច្បាស់អំពីជំហាននីមួយៗនៅក្នុងដំណើរការនោះ។
ទីភ្នាក់ងារព័ត៌មាន KCNA ដែលជាទីភ្នាក់ងារព័ត៌មានផ្លូវការរបស់រដ្ឋាភិបាលកូរ៉េខាងជើងបានរាយការណ៍ថា លោក Trump នឹងដកទណ្ឌកម្មចេញពីប្រទេសកូរ៉េខាងជើងនៅពេលដែលទំនាក់ទំនងរវាងប្រទេសទាំងពីរមានភាពប្រសើរឡើង ដោយបង្ហាញពីវិធានការជាបន្តបន្ទាប់ដែលការធ្វើសម្បទានអាចផ្ដល់ឲ្យនៅតាមដំណាក់កាលផ្សេងៗនៃដំណើរការលុបបំបាត់អាវុធនុយក្លេអ៊ែរ។
ដោយថ្លែងនៅឯសន្និសីទព័ត៌មានមួយនៅក្នុងទីក្រុងសេអ៊ូលជាមួយនឹងរដ្ឋមន្ត្រីការបរទេសកូរ៉េខាងត្បូងលោកស្រី Kang Kyung Hwa និងរដ្ឋមន្ត្រីការបរទេសជប៉ុនលោក Taro Kono លោក Mike Pompeo បាននិយាយថា រដ្ឋបាលរបស់លោក Trump នឹងមិនធ្វើខុសម្ដងទៀតដូចប្រធានាធិបតីអាមេរិកមុនៗ ដែលលើកលែងទណ្ឌកម្មដល់រដ្ឋាភិបាលក្រុងព្យុងយ៉ាង ដើម្បីជាថ្នូរនឹងការសន្យារបស់កូរ៉េខាងជើងនៅក្នុងការលុបបំបាត់អាវុធនុយក្លេអ៊ែរ។
លោក Pompeo បានបញ្ជាក់យ៉ាងដូច្នេះថា៖ «កំហុសកាលពីអតីតកាលនោះគឺថា ប្រធានាធិបតីអាមេរិកមុនៗបានផ្ដល់ជំនួយផ្នែកសេដ្ឋកិច្ច និងផ្នែកហិរញ្ញវត្ថុនៅមុនពេលដែលការលុបចោលទាំងស្រុងនូវអាវុធនុយក្លេអ៊ែររបស់កូរ៉េខាងជើងត្រូវបានធ្វើឡើង។ ករណីនេះនឹងមិនកើតឡើងទៀតទេ។ លោកប្រធានាធិបតី Trump បានបញ្ជាក់យ៉ាងច្បាស់ហើយ»៕
