រដ្ឋមន្រ្តីក្រសួងការបរទេសសហរដ្ឋអាមេរិក លោក Mike Pompeo បាននិយាយនៅថ្ងៃចន្ទថា លោកមានក្តីសង្ឃឹមថា រដ្ឋអារ៉ាប់ផ្សេងៗទៀត និងយកគំរូតាមប្រទេសអេមីរ៉ាតអារ៉ាប់រួម ក្នុងការបង្កើតទំនាក់ទំនងការទូតជាមួយប្រទេសអ៊ីស្រាអែល។
លោករដ្ឋមន្ត្រី Mike Pompeo បាននិយាយក្នុងទីក្រុង Jerusalem នៅក្បែរនាយករដ្ឋមន្ត្រីអ៊ីស្រាអែលលោក Benjamin Netanyahu ថា ប្រសិនបើមានប្រទេសជាច្រើនទៀត យកគំរូតាមនេះ នោះវានឹងបង្កើននូវស្ថិរភាពក្នុងតំបន់មជ្ឈឹមបូព៌ា និងជួយធ្វើឱ្យប្រសើរផងដែរនូវជីវភាពរបស់ពលរដ្ឋនៅក្នុងប្រទេសទាំងនោះ។
សហរដ្ឋអាមេរិកបានជួយជ្រុមជ្រែងឱ្យមានកិច្ចព្រមព្រៀង ស្តីពីការបង្កើតទំនាក់ទំនងការទូតរវាងប្រទេសអេមីរ៉ាតអារ៉ាប់រួមជាមួយប្រទេសអ៊ីស្រាអែលកាលពីដើមខែសីហានេះ។ លោកនាយករដ្ឋមន្ត្រីប្រទេសអ៊ីស្រាអែលបានហៅកិច្ចព្រមព្រៀងនោះថា បានបើកនូវសករាជថ្មីមួយ សម្រាប់តំបន់មជ្ឈឹមបូព៌ា។
លោក Netanyahu ក៏បានបង្ហាញពីទស្សនៈវិស័យរបស់លោក សម្រាប់ការបង្កើតសន្តិភាព ជាមួយប្រទេសដទៃ ដោយលើកឡើងនូវអ្វីដែលលោកហៅថា ជាសម្ព័ន្ធភាពនៃអ្នកនិយមកណ្តាលប្រឆាំងក្រុមរ៉ាឌីកាល់នោះ។
លោកនាយករដ្ឋមន្ត្រីអ៊ីស្រាអែលក៏បានសរសើរដល់រដ្ឋបាលរបស់លោកត្រាំផងដែរ ដែលបានខិតខំប្រឹងប្រែងឱ្យមានការដាក់ទណ្ឌកម្មជាអន្តរជាតិឡើងវិញប្រឆាំងប្រទេសអ៊ីរ៉ង់ ដែលត្រូវបានគេដកចេញ ក្រោមកិច្ចព្រមព្រៀងឆ្នាំ២០១៥ ដែលហាមប្រាមដល់កម្មវិធីអាវុធនុយក្លេអ៊ែររបស់ប្រទេសអ៊ីរ៉ង់។
ក្រោយដំណើរទស្សនកិច្ចក្នុងប្រទេសអ៊ីស្រាអែល លោករដ្ឋមន្ត្រីក្រសួងការបរទេសអាមេរិក Mike Pompeo ក៏នឹងទៅទស្សនកិច្ចប្រទេសស៊ូដង់ អេមីរ៉ាតអារ៉ាប់រួម និងប្រទេសបារ៉ែនផងដែរ៕
