ក្នុងរយៈពេលបីទសវត្សរ៍ក្រោយការដួលរលំកំផែងក្រុងប៊ែឡាំង ស.រ.អា.បាននិយាយថា រដ្ឋាភិបាលក្រុងវ៉ាស៊ីនតោន និងសម្ព័ន្ធមិត្តរបស់ប្រទេសអាមេរិកនៅតែប្រឈមនឹងពួកសត្រូវកុម្មុយនិស្តហើយលោកសេរីត្រូវតែបន្តការពារខ្លួនប្រឆាំងនឹងការគំរាមកំហែងមកពីប្រទេសរុស្ស៊ីនិងប្រទេសចិន។
នៅក្នុងសុន្ទរកថាមួយដែលលោកបានថ្លែងនៅឯ Brandenburg Gate នាក្រុងប៊ែរឡាំង លោករដ្ឋមន្ត្រីការបរទេសស.រ.អា. Mike Pompeo បានមានប្រសាសន៍កាលពីថ្ងៃសុក្រថា ប្រទេសរុស្ស៊ី ចូលលុកលុយប្រទេសជិតខាងនិងបានសម្លាប់ពួកអ្នកប្រឆាំងខាងនយោបាយ។ លោកបាននិយាយបន្ថែមថា អាជ្ញាធររុស្ស៊ីប្រើការឆ្មក់ដោយពួកប៉ូលិសនិងការធ្វើទារុណកម្មប្រឆាំងនឹងពួកជនអំបូរ Tartars នៅក្នុងតំបន់គ្រីម៉េនិងជនជាតិអ៊ុយក្រែនដែលធ្វើការប្រឆាំងនឹងការឈ្លានពានរបស់រុស្ស៊ី។
អ្នកការទូតកំពូលស.រ.អា.រូបនេះក៏បានរិះគន់ប្រទេសចិនដែរ។
លោក Pompeo បាននិយាយថា៖ «នៅក្នុងប្រទេសចិន គណបក្សកុម្មុយនិស្តចិនកំពុងរៀបចំទស្សនវិស័យថ្មីមួយនៃការកាន់អំណាចផ្តាច់ការ។
លោករដ្ឋមន្ត្រីការបរទេសអាមេរិកាំងរូបនេះបាននិយាយប្រាប់ពួកអ្នកស្តាប់លោកនិយាយមួយក្រុមនៅក្នុងមូលនិធិ Korber-Stiftung ដោយលោកបានចោទ
ប្រកាន់គណបក្សកុម្មិយនិស្តចិនថាបានប្រើប្រាស់មធ្យោបាយដើម្បីបង្ក្រាបប្រជារាស្ត្រចិន, បដិសេធបុព្វសិទ្ធិខាងធ្វើដំណើរដល់ពួកអ្នករិះគន់និងធ្វើទុក្ខបុកម្នេញគ្រួសារពលរដ្ឋចិនកាន់សាសនាឥស្លាម ដែលជ្រកកោននៅឯប្រទេសក្រៅ។
នៅក្នុងក្រុងប៉េកាំង ក្រសួងការបរទេសចិនបានរិះគន់លោក Pompeo អំពីការថ្លែងរបស់លោកទាក់ទិននឹងគណបក្សកុម្មិយនិស្ត។
បន្ទាប់មកកាលពីថ្ងៃសុក្រ នៅក្នុងជំនួបមួយជាមួយលោកស្រី Angela Merkel អធិការបតីនៃប្រទេសអាល្លឺម៉ង់ លោក Pompeo បានគូសបញ្ជាក់អំពីអ្វីដែលសម្ព័ន្ធមិត្តទាំងពីរនេះនៃអង្គការអូតង់អាចសម្រេចបានដោយធ្វើការជាមួយគ្នា៕
