រដ្ឋមន្ត្រីក្រសួងការបរទេសសហរដ្ឋអាមេរិក លោក Mike Pompeo បានទិតៀនប្រទេសអ៊ីរ៉ង់ចំពោះការប្រើអំពើហិង្សានិងការកាត់ផ្ដាច់អ៊ីនធឺណិត ដើម្បីទប់ស្កាត់មិនឲ្យប្រជាជនរំឭកវិញ្ញាណក្ខន្ធដល់អ្នកដែលត្រូវបានសម្លាប់នៅក្នុងការបង្ក្រាបលើការតវ៉ាមួយកាលពីខែវិច្ឆិកាកន្លងទៅនេះ។ ការតវ៉ានោះគឺជាការប្រឆាំងនឹងរដ្ឋាភិបាលអ៊ីរ៉ង់ចំពោះការដំឡើងថ្លៃប្រេងយ៉ាងខ្ពស់។
លោក Pompeo បានសរសេរសារនៅលើ Twitterកាលពីថ្ងៃសុក្រ ដោយចោទប្រកាន់ចំៗទៅ លើមេដឹកនាំកំពូលរបស់អ៊ីរ៉ង់ លោក Ayatollah Ali Khamenei ថា «ប្រជាជនអ៊ីរ៉ង់មានសិទ្ធិកាន់ទុក្ខចំពោះជនរងគ្រោះទាំង១៥០០នាក់ដែលត្រូវបានសម្លាប់ដោយរដ្ឋាភិបាលរបស់លោក Khamenei ក្នុងអំឡុងពេលនៃការតវ៉ានៅក្នុងប្រទេសអ៊ីរ៉ង់»។
លោក Khamenei គឺជាមេដឹកនាំកំពូលរបស់អ៊ីរ៉ង់ ដែលមានសិទ្ធិសម្រេចចុងក្រោយលើបញ្ហាសាសនានិងនយោបាយនៅក្នុងសាធារណរដ្ឋឥស្លាមមួយនេះ។
ទីភ្នាក់ងារព័ត៌មានIlna ដែលជាទីភ្នាក់ងារព័ត៌មានពាក់កណ្ដាលផ្លូវការរបស់អ៊ីរ៉ង់ បានឲ្យដឹងថា មានការកាត់ផ្ដាច់អ៊ីនធឺណិតនៅក្នុងខេត្តមួយចំនួនក្នុងប្រទេសអ៊ីរ៉ង់ កាលពីថ្ងៃពុធទី២៥កន្លងទៅនេះ នៅមុនពេលនៃការប្រារព្ធពិធីរំឭកវិញ្ញាណក្ខន្ធដែលគ្រោងនឹងធ្វើឡើងនៅថ្ងៃព្រហស្បតិ៍ ទី២៦។
មានការរាយការណ៍ថា មនុស្សមួយចំនួនត្រូវបានចាប់ឃុំខ្លួននៅឯកន្លែងបញ្ចុះសពមួយកន្លែងក្នុងទីក្រុង Karaj ក្នុងពិធីរំឭកវិញ្ញាណក្ខន្ធគម្រប់៤០ថ្ងៃ ក្រោយពីបាតុករម្នាក់បានស្លាប់។
លោក Pompeo បានសរសេរសារនៅលើ Twitterកាលពីថ្ងៃសុក្រទៀតថា «របបនេះភ័យខ្លាចប្រជាជនខ្លួនឯង ហើយជាថ្មីម្ដងទៀតបានប្រើអំពើហិង្សានិងកាត់ផ្ដាច់អ៊ីនធឺណិត»៕
