ភ្ជាប់​ទៅ​គេហទំព័រ​ទាក់ទង

នយោបាយ​បាន​ធ្វើ​ឲ្យ​មាន​ការ​បែងចែក​ក្នុង​ក្រុង​​តូច​មួយ​នៅ​រដ្ឋ Wisconsin

  • Greg Flakus

លោក Dick Becker ដែល​ជា​បុគ្គលិក​ផ្នែក​លក់​ម្នាក់​របស់​ហាង Walker's Clothing and Shoes និយាយ​ថា អ្វី​មាន​ដំណើរការ​ល្អ​នៅ​ក្នុង​ក្រុង Lancaster។

លោក Dick Becker ​មាន​សុទិដ្ឋិនិយម​អំពី​ក្រុង Lancaster ដែល​ជា​ក្រុង​កំណើត​របស់​លោក​នៅ​ក្នុង​សង្កាត់ Grant County នៃ​រដ្ឋ Wisconsin និង​ប្រទេស​ទាំង​មូល​នៅ​ពេល​ដែល​លោក​ប្រធានា​ធិបតី​ ដូណាល់ ​ត្រាំ​ ចាត់ចែង​កិច្ចការ​នយោបាយ​តាម​វិធី​របស់​លោក​នៅ​រដ្ឋធានី​វ៉ាស៊ីនតោន។ ​

លោក​បាន​ថ្លែងពី​ប្រធានាធិបតី​ត្រាំ​ថា «ពួកគេ​ត្រូវ​ផ្តល់​ឱកាស​ឲ្យ​លោក‍​ប្រធានាធិបតី»។

លោក Becker និយាយ​ថា ​អ្នក​បោះឆ្នោត​ភាគ​ច្រើន​នៅ​ក្នុង​ទីក្រុង Lancaster ​នេះ​បាន​គាំទ្រ​លោកត្រាំ ​នៅ​ក្នុង​ការ​បោះឆ្នោត​កាល​ពី​ខែ​វិច្ឆិកា​ឆ្នាំ​ទៅ ​ពី​ព្រោះ​តែ​ពួកគេ​ចង់​បានការ​ផ្លាស់​ប្តូរ។ ​លោក​និយាយទៀត​ថា ​មនុស្ស​ជា​ច្រើន​ដែល​កាល​ពី​ពេល​មុន​បាន​ស្វះស្វែង​ចង់​បាន​ការ​ផ្លាស់​ប្តូរ​ដោយ​ការ​បោះឆ្នោត​ឲ្យប្រធានា​ធិបតី​បារ៉ាក់ ​អូបាម៉ា ​មាន​ការ​ខក​ចិត្ត​នៅ​ក្នុង​អ្វី​ដែល​លោក​អូបាម៉ា​បាន​ធ្វើ។

លោក​និយាយ​ទៀត​ថា «មនុស្ស​ដែល​ខ្ញុំ​បាន​និយាយ​ជាមួយ​មិន​ចូល​ចិត្ត​ពីអ្វី​ដែល​បាន​កើត​មាន​ឡើង​ទេ។ មនុស្ស​ឆ្អែតនឹង​នយោបាយ​ហើយ ពួកគេ​ចង់​បាន​ការ​ផ្លាស់​ប្តូរ​នោះ‍»។

នៅ​ពេល​សួរ​អំពី​ប្រធានា​ធិបតី​ត្រាំ ​លោក Becker បាន​ឆ្លើយ​ថា «ខ្ញុំសង្ឃឹម​ថា ​មនុស្ស​គាំទ្រ​លោក​ពីព្រោះ ​ប្រសិនបើ​លោក​ធ្វើ​កិច្ចការ​បាន​ល្អ អ្នក​ទាំងអស់​គ្នា​នឹង​មាន​ជីវភាព​ល្អ​ប្រសើរ»។

លោក Becker បាន​និយាយ​ថា ជម្រើស​របស់​អ្នក​បោះឆ្នោត​មិន​ត្រូវ​បាន​ជំរុញ​ឡើង​ដោយ​ការ​ពិបាក​ចិត្ត​នៅ​ក្នុង​សហគមន៍​របស់​ពួកគេ​ទេ ​ពីព្រោះ​តែ​អ្វីៗ​កំពុង​ដំណើរ​ការ​ល្អ​នៅ​ក្នុង​សង្កាត់ Grant County។

នៅ​ពេល​ដែល​លោក​មើល​តាម​បង្អួច​ដ៏​ធំ​មួយ​របស់​ក្រុមហ៊ុន​លក់​សម្លៀក​បំពាក់​និង​ស្បែកជើង Walker’s Clothing and Shoes ដែល​នៅ​ទី​នោះ​លោក​ធ្វើការ​ជាអ្នកលក់​ ​លោក Becker​ មើល​ឃើញ​សាលា​ក្តី​ដ៏​ធំ​មួយ​ធ្វើ​ពី​ឥដ្ឋ​ពណ៌ក្រហម​ដែល​ស្ថិត​នៅ​លើ​ទីលាន​ដ៏​សំខាន់​មួយ​នៅ​ទីក្រុង Lancaster។ នៅ​លើ​ផ្លូវនានា ​លោក​បាន​ឃើញមនុស្សដើរ​នៅ​ទី​នោះ ហើយ​ប្រហែល​ចំណាយ​ពេលវេលា​និង​ប្រាក់នៅ​ក្នុង​ហាង​របស់​លោក នៅ​ហាង​លក់​គ្រឿង​អលង្ការ ឱសថស្ថាន ហាង​លក់​របស់​របរអនុស្សាវរីយ​ និង​ភោជនីយដ្ឋាន។

មនុស្ស​ជា​ច្រើន​នៅ​ក្នុង​សហគមន៍​ដាច់​ស្រយាល​តូចៗចូល​ចិត្ត​បើក​បរ​រថយន្ត​រយៈ​ពេល​មួយ​ម៉ោង​ ឬច្រើន​ជាង​នោះ​ទៅ​កាន់​ទីក្រុង​ធំៗ​ដើម្បី​ទិញ​ឥវ៉ាន់។ ក៏ប៉ុន្តែ ​លោក Becker បាន​និយាយ​ទៀត​ថា ​ទីក្រុង Lancaster ដែល​មាន​មនុស្ស​៣​ពាន់​៨រយ​៦៨​នាក់​បាន​ធ្វើ​ឲ្យ​មាន​ការ​ផ្លាស់​ប្តូរ​ដោយ​បាន​ទាក់​ទាញ​មនុស្ស​មក​ពី​ឆ្ងាយៗដូចជា​ក្រុង Madison ដែល​ជា​រដ្ឋ​ធានី​របស់​រដ្ឋ Wisconsin ដើម្បី​ទិញ​អ្វី​ដែល​លោក​ហៅថា ​«ទំនិញប្រកប​ដោយ​គុណភាព​កំពូល» នៅឯហាង Walker’s និង​ហាង​លក់ដូរ​ផ្សេងៗ​ទៀត​ដែល​ធ្វើ​ឲ្យ​មាន​ការ​ចាប់​អារម្មណ៍​ការ​ទិញ​ទំនិញ​ក្នុង​ទីក្រុង​ដ៏តូច​មួយ​ដែល​ជួនកាល​គេ​មិន​បាន​ឃើញ​មាន​នៅ​ក្នុងហាង​ក្នុង​ទីក្រុង​ធំៗ​ជាង​នេះ។

លោក Becker ​បាន​និយាយ​ទៀត​ថា «អស់លោក អ្នក មិន​អាច​ទទួល​បាន​សេវាកម្ម​និង​គុណភាព​បម្រើ​អតិថិជន​ដូច​អស់​លោក អ្នក​បាន​ទទួល​នៅ​ទីនេះ​ទេ‍»។

ការ​ទទួល​បាន​ផលចំណេញ​របស់​ក្រុង Lancaster បាន​ធ្វើឲ្យ​ប៉ះពាល់​ទីក្រុង​តូចជាង​នៅ​ក្នុង​តំបន់​ដែល​នៅ​សល់​ហាង​តូចៗ​មួយ​ចំនួន​តូច​ប៉ុណ្ណោះ។ លោក Becker ​បាន​មាន​ប្រសាន៍ទៀតថា អ្វី​ដែល​បាន​ជួយ​ធ្វើ​ឲ្យ​មាន​វិបុលភាព​យ៉ាង​ខ្លាំង​ដល់​សង្កាត់ Grant គឺ​ការ​អភិវឌ្ឍ​ខាង​សេដ្ឋ​កិច្​ចដែល​ទទួល​បាន​ការ​លើកទឹក​ចិត្ត​ពី​ដំបូង​ដោយ​មូលនិធិ​សហព័ន្ធ ​និងរដ្ឋ​ដែល​បាន​ទាក់ទាញ​រោងចក្រ​ផលិតកម្ម​និង​ធ្វើ​ចំណី​អាហារ​តូចៗ​មក​កាន់​តំបន់​នេះ ​ដែល​បាន​បង្កើត​ការងារ​រាប់​រយ​ ហើយ​និង​បន្ថែម​មូលដ្ឋាន​អតិថិជន។

ក៏ប៉ុន្តែ ​លោក​បាន​និយាយ​ទៀត​ថា ​សង្កាត់ Grant បាន​ជួប​ប្រទះ​ការ​ខ្វែង​គំនិត​ខាង​នយោបាយ​ដូចគ្នា​ដែល​គេ​បាន​ឃើញ​នៅ​ក្នុង​ប្រទេស​ទាំងមូល​ដែរ ហើយ​លោក​និយាយ​ទៀត​ថា មាន​ការ​រិះគន់​យ៉ាង​ខ្លាំង​ដល់​ប្រធានា​ធិបតី​ត្រាំ។

លោក​បាន​និយាយ​ថា «មនុស្ស​មិន​អាច​អត់​ឱន​ឲ្យ​បាន​ដល់​ការ​បញ្ចេញមតិ​របស់​មនុស្ស​ផ្សេង​ទៀត។ មនុស្ស​ខ្លះ​ដែល​បេក្ខជន​របស់​ខ្លួន​បាន​ចាញ់​ឆ្នោត​កំពុង​ធ្វើ​អ្វីៗ​ដែល​ពួកគេ​អាច​ធ្វើ​បាន​ដើម្បី​និយាយ​អាក្រក់​ពី​ប្រធានា​ធិបតី‍»។

​មនុស្ស​ផ្សេង​ទៀត​ដែល​យើង​បាន​ជួប​នៅ​ក្នុង​ទីក្រុង Lancaster បាន​បញ្ជាក់​ថា ​ការ​ពណ៌នា​របស់​លោក Becker ពី​ការ​បែកបាក់​ខាង​នយោបាយ។ អ្នក​ខ្លះ​ការពារលោក​ត្រាំ​ថា ជា​ពាណិជ្ជករ​ដែលនិយាយ​ត្រង់ៗ​ហើយ​អ្នកខ្លះ​ទៀត​បាន​ថ្កោលទោស​លោក​ចំពោះ​វោហាសាស្ត្រ​ច្រឡោះ​បោះ​ និង​របៀបវារៈ​ដែល​អាច​ធ្វើ​ឲ្យ​អន្តរាយ​សេវាកម្ម​សង្គម​ដែល​ផ្តល់​ផល​ប្រយោជន៍​ដល់​ពលរដ្ឋ​ក្នុង​មូលដ្ឋាន​ដែល​មិន​បាន​ទទួល។

លោក Becker និយាយ​ថា ​លោក​ក៏​មាន​បញ្ហា​ជាមួយ​ការ​និយាយ​ក្រអឺត​ក្រទម​របស់​លោក​ត្រាំ​ដែរ ​ក៏ប៉ុន្តែ ​លោក​ផ្តោត​លើ​ភាព​វិជ្ជមាន។

លោក Becker និយាយ​បន្ត​ទៀត​ថា «ខ្ញុំ​យល់​ស្រប​ជាមួយ​អ្វី​ដែល​លោក​និយាយ។ ខ្ញុំ​ចង់​ឃើញ​ក្រុមហ៊ុន​ពាណិជ្ជកម្ម​វិល​ត្រឡប់​មក​កាន់​ប្រទេស​នេះ​វិញ។ ការណ៍​នេះ​ក៏​រាប់​បញ្ចូល​ទាំង​គោល​នយោបាយ​ថាមពល​ដែល​ជា​ប្រធាន​បទ​ដ៏​មាន​សារៈ​សំខាន់​មួយ​នៅ​ក្នុង​តំបន់​ដាច់​ស្រយាល​ដែល​នៅ​ទី​នោះ​កសិដ្ឋាន​ត្រូវ​ការ​ប្រេងឥន្ធនៈ​ និង​នីត្រូសែន​ចម្រាញ់​ចេញ​ពី​ឧស្ម័ន​ធម្មជាតិ​សម្រាប់​ធ្វើ​ជី​ហើយ​មនុស្ស​គ្រប់​គ្នា​ត្រូវការ​បើកបរ​ផ្លូវ​ឆ្ងាយ​សម្រាប់​សេវាកម្ម​សំខាន់ៗ។

លោក Becker និយាយ​ពី​លោក​ប្រធានាធិបតីត្រាំ​ថា «លោកចង់​ទាញ​យក​ថាមពល​របស់អាមេរិកមក​ប្រើ​ប្រាស់​ថែម​ទៀត។ ខ្ញុំ​ចូល​ចិត្ត​គម្រោង​នេះ​ពីព្រោះ​ខ្ញុំ​មិន​ចង់​ឲ្យ​ប្រាក់​របស់​យើង​ទៅ​ប្រទេស​ដទៃ​ទៀត​ទេ។ ហេតុអ្វី​យើង​ត្រូវ​ទិញ​ប្រេង​មកពី​ប្រទេស​អ៊ីរ់ង់ ឬ​ប្រទេស​វ៉េណេស៊ុយអេឡា​នៅពេល​ដែល​យើង​មាន​ប្រេង​របស់​ខ្លួនឯង​នោះ‍»។

ក៏ប៉ុន្តែ លោក Becker ដូចជា​មនុស្ស​ភាគ​ច្រើ​ន​នៅ​ក្នុង​តំបន់​នេះ​ដែរ​និយាយ​ថា ​លោក​មិន​ចូលចិត្ត​និយាយ​ពី​រឿង​នយោបាយ​ច្រើន​ពេកជាមួយអ្នក​ជិតខាង​និង​មិត្តភត្តិ​ទេ​ពីព្រោះ​លោក​ចង់​បញ្ចៀស​ឈ្លោះ​ប្រកែក​គ្នា​ហើយ​រស់​នៅ​ក្នុង​សហគមន៍​ប្រកបភាព​ចុះ​សម្រុង​គ្នា៕

ប្រែ​សម្រួល​ដោយ​ជឹង​ ​ប៉ូជីន

XS
SM
MD
LG