ភ្ជាប់​ទៅ​គេហទំព័រ​ទាក់ទង

អ្នកវិភាគ​នយោបាយ៖​មេដឹកនាំ​កម្ពុជា​ប្រើប្រាស់​អំណាច​ផ្ទុយ​ពី​រដ្ឋធម្មនុញ្ញ

  • សុខ ខេមរា

លោក​បណ្ឌិត​ឡៅ ម៉ុងហៃ​អ្នកវិភាគ​ឯករាជ្យ​ម្នាក់​ក្នុង​ប្រទេស​កម្ពុជា។

វ៉ាស៊ីនតោន - អ្នក​វិភាគ​នយោបាយ​និយាយ​ថា ​មេ​ដឹកនាំ​កម្ពុជា​ប្រើប្រាស់​អំណាច​ផ្ទុយពី​រដ្ឋធម្មនុញ្ញ​ដោយ​ព្រមាន​ពី​ហានិភ័យ​ចំពោះ​ប្រទេស។​

លោកបណ្ឌិត​ឡៅ ម៉ុងហៃ​អំពាវនាវ​ដល់​ពល​រដ្ឋ​អ្នក​បោះឆ្នោត​ឲ្យត្រួត​ពិនិត្យ​មើល​គណ​បក្ស​នយោបាយ​ មុននឹង​ប្រគល់​អំណាច​ក្នុង​ពេល​បោះឆ្នោត​ជ្រើសរើស​តំណាងរាស្ត្រនៅ​ថ្ងៃ​ទី២៨​ ខែ​កក្កដា​ឆ្នាំ​២០១៣​ខាងមុខ។​ នេះ​បើតាម​ការ​អះអាង​របស់​លោក​បណ្ឌិត​ឡៅ ម៉ុងហៃ​ ដែល​បាន​ថ្លែង​ក្នុង​កម្មវិធី​ហេឡូ​ វីអូអេ​កាលពី​ថ្ងៃព្រហស្បតិ៍។​

លោក​ថ្លែងថា ​អំណាច​សព្វថ្ងៃ​ក្រោយពី​ប្រជាពល​រដ្ឋ​បោះ​ឆ្នោត​ជូនហើយ ​អ្នក ដឹកនាំ​យក​ទៅ​ប្រើដើម្បី​បម្រើ​តែ​បក្សពួក​ ក្រុម​គ្រួសារ​ដែល​លោក​ចាត់​ទុក​ថា​ វាខុស​ពីការ​ស្បថ​ស្បែរ​មុន​ពេល​ចូល​កាន់​តំណែង។​
លោក​បាន​លើកយក​ការ​ប៉ុនប៉ង​ដ៏​តក់​ក្រហល់​ក្នុង​ការ​ធ្វើសេចក្តី​ព្រាងច្បាប់​ដោយ​រដ្ឋ​សភា​ស្តីពី​ «ការ​ប្រឆាំង​ការ​មិន​ទទួល​ស្គាល់​ថា​ មាន​ឧក្រិដ្ឋកម្មប្រព្រឹត្ត​ឡើង​ក្នុងរយៈ​កាល​នៃ​កម្ពុជា​ប្រជាធិប​តេយ្យ»។

សេចក្តី​ព្រាងច្បាប់​ការ​ធ្វើ​ឡើង​ភ្លាមៗ​ក្រោយពី​លោក​នាយក​រដ្ឋមន្ត្រី​ហ៊ុន សែន​បាន​ប្រតិកម្ម​ទៅនឹង​ដៃគូ​នយោបាយ​របស់​លោក​គឺ​លោក​កឹម សុខា​នៃ​គណបក្ស​ជំទាស់។​

លោកឡៅ ម៉ុងហៃ​ចាត់​ទុក​ថា ​នេះ​ជាការ​«បញ្ជា»​របស់​លោក​នាយក​រដ្ឋ​មន្ត្រី​ហ៊ុន សែន។​ លោក​ថ្លែង​ថា ​បច្ចុប្បន្ន​អំណាច​ប្រមូលផ្តុំ​លើ​មនុស្ស​តែម្នាក់​គឺ​លោក​នាយក​រដ្ឋមន្ត្រី​ហ៊ុន សែន។​
លោក​ឡៅ ម៉ុងហៃ​បាន​រំឭកថា​ ពីអតីត​កាល​អំណាច​ស្ថិតនៅ​លើ​បុគ្គល​ណា​ ដែល​ច្បាំង​ឈ្នះ​ ហើយ​យក​អំណាច​មក​កាន់​កាប់​តាម​របៀប​ផ្តាច់ការ​ផង​ ដែល​នាំឲ្យ​មាន​បញ្ហា​ចម្បាំង​ដើម្បី​ដណ្តើម​អំណាច​គ្នា​និង​ពឹង​ពាក់​បរទេស​ជិតខាង​មក​ជួយ​ផងដែរ។​

លោក​អះអាង​ថា​ គឺ​ប្រជា​ពលរដ្ឋ​ទេ​ដែល​ជា​អ្នក​សម្រេច​ចិត្ត​នៅពេល​បោះឆ្នោត។​
សូម​អញ្ជើញ​ស្តាប់​ការ​បកស្រាយ​របស់​វាគ្មិន​គឺបណ្ឌិត​ឡៅ ម៉ុងហៃ ​ក្នុង​កម្មវិធី​ហេឡូ​វីអីអេ​ស្តីពី​«ការ​ចូលរួម​ប្រារព្ធ​ខួប​ទី២០​នៃ​ច្បាប់​រដ្ឋធម្មនុញ្ញ»​ កាល​ពីថ្ងៃ​ព្រហស្បតិ៍​ទី៦​ខែ​មិថុនា​ ឆ្នាំ​២០១៣៕​
XS
SM
MD
LG