មន្ត្រីការទូតកំពូលរបស់ប្រទេសប៉ូឡូញនៅក្នុងរដ្ឋធានីវ៉ាស៊ីនតោន សហរដ្ឋអាមេរិក អំពាវនាវដល់ប្រទេសរុស្ស៊ីឲ្យបញ្ជៀសកុំឲ្យមានចំណាត់ការឯកតោភាគីណាមួយដើម្បីបញ្ចប់រលកបាតុកម្មប្រឆាំងនឹងលោកប្រធានាធិបតី Alexander Lukashenko នៃប្រទេសបេឡារុស ដោយបាននិយាយថា វិបត្តិនេះអាចត្រូវបានដោះស្រាយបានល្អបំផុតដោយកិច្ចប្រឹងប្រែងរួមគ្នារបស់សហគមន៍អន្តរជាតិ។
នៅពេល VOA សួរថាតើនៅក្រោមកាលៈទេសៈអ្វីដែលគិតថារដ្ឋាភិបាលក្រុងម៉ូស្គូអាចប្រើកម្លាំងយោធាដើម្បីគាំទ្រលោក Lukashenko ដែលពេលខ្លះជាសម្ព័ន្ធមិត្តរបស់ខ្លួននោះ លោក Piotr Wilczek ឯកអគ្គរដ្ឋទូតប៉ូឡូញប្រចាំរដ្ឋធានីវ៉ាស៊ីនតោន និយាយថា៖ «យើងអាចធ្វើឲ្យច្បាស់ថា ប្រទេសរុស្ស៊ីពិចារណាអំពីសេនារីយ៉ូផ្សេងនៅក្នុងប្រទេសបេឡារុស»។
លោកឯកអគ្គរដ្ឋទូតបានមានប្រសាសន៍ថា៖ «យើងសង្ឃឹមថា រដ្ឋាភិបាលក្រុងម៉ូស្គូចូលរួមជាមួយកិច្ចប្រឹងប្រែងរបស់សហគមន៍អន្តរជាតិដើម្បីដោះស្រាយវិបត្តិនេះដោយសន្តិវិធី ដែលក្នុងនោះមានទាំងដំណើរការតាមរយៈអង្គការសន្តិសុខនិងកិច្ចសហប្រតិបត្តិការក្នុងទ្វីបអឺរ៉ុប ឬ OSCE ផងដែរ ហើយយើងសង្ឃឹមថា រុស្ស៊ីនឹងមិនពិចារណាប្រើវិធានការដោយឯកតោភាគីនោះទេ»។
លោកបានបន្តទៀតថា៖ «ទោះជាយ៉ាងណាក៏ដោយ គោលដៅរយៈពេលយូររបស់បណ្តាបស្ចិមប្រទេសមានភាពខុសគ្នាជាមួយនឹងគោលដៅរយៈពេលយូររបស់ប្រ ទេសរុស្ស៊ីចំពោះប្រទេសបេឡារុស»។
ពលរដ្ឋបេឡារុសរាប់ពាន់នាក់បានចេញមកធ្វើការតវ៉ាប្រឆាំងជារៀងរាល់ថ្ងៃ បន្ទាប់ពីលោក Lukashenko បានកាន់អំណាចជាបន្ត ក្រោយពីឈ្នះការបោះឆ្នោត ដែលមនុស្សជាច្រើនជឿថា ជាការបោះឆ្នោតដែលមានការលួចបន្លំកាលពីថ្ងៃទី ៩ ខែសីហាកន្លងទៅនេះ។
ក្នុងករណីតវ៉ាជាច្រើន បាតុករបានប្រឈមជាមួយប៉ូលិសដែលប្រើឧស្ម័នបង្ហូរទឹកភ្នែក គ្រាប់បែកផ្សែង និងការវាយដំ។ មនុស្សប្រហែល ២ សែននាក់ បានដើរក្បួនតវ៉ានៅក្នុងរដ្ឋធានី Minsk នៅរាល់ថ្ងៃអាទិត្យអស់រយៈពេល ២ សប្ដាហ៍មកហើយ៕
