ប៉ូលិសទីក្រុងឡុងដ៏បានកំណត់អត្តសញ្ញាណជនដែលបានបើកការវាយប្រហារកាលពីថ្ងៃពុធ ក្បែរសភាអង់គ្លេស ថាឈ្មោះ Khalid Masood។
ជន Masood ដែលមានកំណើតនៅអង់គ្លេស និងមានវ័យ៥២ឆ្នាំ ត្រូវបានប៉ូលិសស្គាល់ថាធ្លាប់ត្រូវបានកាត់ទោសជាច្រើនដង ដោយរួមទាំងការកាត់ទោសលើការរក្សាអាវុធសម្រាប់ធ្វើការវាយប្រហារផងដែរ។ ជននេះត្រូវបានកាត់ទោសលើកចុងក្រោយបង្អស់កាលពីឆ្នាំ២០០២ ចំពោះការរក្សាទុកកាំបិតមួយ។
ប៉ុន្តែជន Masoodនេះមិនធ្លាប់ត្រូវបានកាត់ទោសពីបទប្រព្រឹត្តអំពើភេរវកម្មនោះទេ។ Masood ដែលធ្លាប់ប្តូរសាសនា ធ្លាប់ធ្វើជាគ្រូបង្រៀនភាសាអង់គ្លេស និងត្រូវបានគេស្គាល់ថាជាគ្រូបង្ហាត់យកសាច់ដុំម្នាក់។ Masood មានអាយុចាស់ជាងអ្នកវាយប្រហាររបស់ក្រុមរដ្ឋឥស្លាមនៅតាមបណ្តាទីក្រុងនានានៅអឺរ៉ុបក្នុងពេលថ្មីៗនេះ។
នៅក្នុងអត្ថាធិប្បាយទៅកាន់សភាអំពីការវាយប្រហារនេះកាលពីលើកមុន លោកស្រីនាយករដ្ឋមន្ត្រី Theresa May បានថ្លែងថា អ្នកវាយប្រហាររូបនេះធ្លាប់ត្រូវបានស៊ើបអង្កេតម្តងរួចហើយ ដោយទីភ្នាក់ងារស៊ើបការសម្ងាត់ MI-5 របស់ប្រទេសនេះ ពាក់ព័ន្ធនឹងការព្រួយបារម្ភអំពីអំពើហិង្សាជ្រុលនិយម។ ប៉ុន្តែក្រោយមក លោកស្រីបាននិយាយថា ជននេះមិនស្ថិតនៅក្នុងអ្វីដែលលោកស្រីបានហៅថា ជាផ្នែកមួយនៃការស៊ើបអង្កេតក្នុងពេលថ្មីៗនេះទេ ហើយក៏មិនមានការស៊ើបអង្កេតមុននេះទៅលើផែនការ ឬមូលហេតុនៃការធ្វើការវាយប្រហាររបស់គេនោះដែរ។
ក្រុមរដ្ឋឥស្លាមបានអះអាងថា ការវាយប្រហារនេះជាស្នាដៃរបស់ខ្លួន។ ហេតុការណ៍នេះបានបណ្តាលឲ្យមនុស្សស្លាប់អស់ចំនួន៣នាក់ ហើយបានបញ្ចប់នៅពេលដែលមន្ត្រីប៉ូលិសបានបាញ់សម្លាប់ជនសង្ស័យរូបនេះ៕