ប៉ូលិសបានបាញ់ឧស្ម័នបង្ហូរទឹកភ្នែកទៅលើពួកបាតុករកាន់សាសនាឥស្លាមនីកាយ Shi'ite កាលពីថ្ងៃអង្គារនៅក្នុងរដ្ឋធានី Abuja ប្រទេសនីហ្សេរីយ៉ានៅអំឡុងពេលហេតុការណ៍ប៉ះទង្គិចជាមួយពួកបាតុករនៅថ្ងៃបាតុកម្មទីពីរ ដែលពួកបាតុករទាមទារឲ្យដោះលែងមេដឹកនាំសាសនារបស់ពួកគេ។
មេដឹកនាំសាសនានីកាយ Shi'ite លោក Ibrahim Zakzaky ត្រូវបានចាប់ដាក់ក្នុងពន្ធនាគារដោយគ្មានការចោទប្រកាន់ចាប់តាំងពីខែធ្នូ ឆ្នាំ២០១៥មក។
ក្រុមប៉ូលិសប្រដាប់អាវុធបានចាប់ខ្លួនបាតុករជាច្រើនកាលពីថ្ងៃអង្គារ។ នេះបើយោងតាមលោក Deji Adeyanju សកម្មជនសង្គមស៊ីវិលម្នាក់ដែលបានចូលរួមក្នុងបាតុកម្មនេះ។ លោកបាននិយាយថា «បើពួកប៉ូលិសវាយប្រហារលើបាតុករកាន់តែខ្លាំង ពួកបាតុករចេញតវ៉ាកាន់តែច្រើន»។
មិនទាន់មានការឆ្លើយតបភ្លាមៗពីសំណាក់ក្រុមប៉ូលិសចំពោះបាតុកម្មកាលពីថ្ងៃអង្គារនេះនៅឡើយទេ។ លោក Zakzaky គឺជាមេដឹកនាំចលនាមូស្លីមក្នុងប្រទេសនីហ្សេរីយ៉ា ហៅកាត់ថា IMN ត្រូវបានរដ្ឋាភិបាលចាប់ខ្លួនចាប់តាំងពីមានហេតុការណ៍ប៉ះទង្គិចគ្នារវាងកងកម្លាំងសន្តិសុខ និងពួកអ្នកគាំទ្ររបស់លោកនៅក្នុងទីក្រុង Zaria កាលពីខែធ្នូ ឆ្នាំ២០១៥មក។ លោកនៅជាប់ឃុំឃាំងនៅឡើយ បើទោះបីជាតុលាការបញ្ជាឲ្យដោះលែងរូបលោកយ៉ាងណាក៏ដោយ។ ចលនា IMN និងរដ្ឋាភិបាលមានជម្លោះជាមួយគ្នារាប់ឆ្នាំមកហើយ ដោយសារតែចលនា IMN បំផុសឲ្យមានការធ្វើបដិវត្តន៍នៅក្នុងប្រទេសនីហ្សេរីយ៉ាភាគខាងជើងដែលជាកន្លែងមានពួកម៉ូស្លីមនីកាយ Sunni ជាច្រើនរស់នៅទីនោះ៕
