មេដឹកនាំបក្សប្រឆាំងរុស្សីលោក Alexei Navalny ត្រូវបានអនុញ្ញាតឲ្យចាកចេញពីមន្ទីរពេទ្យ Charité ក្នុងទីក្រុងប៊ែរឡាំង ប្រទេសអាល្លឺម៉ង់ហើយនៅថ្ងៃពុធ ដែលធ្វើឲ្យគេរំពឹងថា លោកអាចនឹងវិលត្រឡប់ទៅប្រទេសរុស្សីក្នុងពេលណាមួយនៅពេលខាងមុខ។ លោកធ្លាក់ខ្លួនឈឺអស់រយៈពេលជាងមួយខែ ពីការត្រូវគេដាក់ថ្នាំបំពុល ដែលព្រឹត្តិការណ៍នោះ បានធ្វើឲ្យទំនាក់ទំនងរវាងរុស្សីដែលមានលក្ខណៈអាប់អួរស្រាប់ជាមួយប្រទេសលោកខាងលិច កាន់តែចុះអាក្រក់ថែមទៀត។
បន្ទាប់ពីចេញពីមន្ទីរពេទ្យរួចមក លោក Navalny បានបង្ហោះសារនៅលើបណ្តាញសង្គមដោយអមជាមួយរូបថតរបស់លោកមួយសន្លឹក ដែលកំពុងអង្គុយលើបង់ក្នុងសួនមួយកន្លែងដែលមានដើមឈើព័ទ្ធជុំវិញ។ ក្នុងសារបង្ហោះនោះលោក Navalny លើកឡើងថា៖ «គម្រោងរបស់ខ្ញុំ មានលក្ខណៈ សាមញ្ញនៅពេលនេះ គឺការព្យាបាលដោយការធ្វើចលនារាល់ថ្ងៃ»។
លោក Navalny ដែលជាអ្នករិះគន់ដ៏ល្បីល្បាញម្នាក់ប្រឆាំងនឹងលោកប្រធានាធិបតីរុស្សី Vladimir Putin បានធ្លាក់ខ្លួនឈឺខ្លាំងកាលពីថ្ងៃទី២០ ខែសីហា នៅពេលដែលលោកកំពុងជិះយន្តហោះត្រឡប់ទៅផ្ទះវិញ ក្នុងអំឡុងពេលនៃដំណើរឃោសនាបោះឆ្នោតមួយ ពីតំបន់ស៊ីបេរី (Siberia) ទៅកាន់ទីក្រុងមូស្គូនោះ។
ក្រោយពីលោកត្រូវបានគេបញ្ជូនទៅកាន់មន្ទីរពេទ្យក្នុងប្រទេសអាល្លឺម៉ង់មក មន្ទីរពិសោធន៍ប្រទេសអាល្លឺម៉ង់ ស៊ុយអែតនិងបារាំង បានបញ្ជាក់ថា លោក Navalny ពិតជាត្រូវថ្នាំបំពុលដែលផលិតឡើងដោយយោធាក្នុងយុគសម័យសហភាពសូវៀតនោះមែន៕
