ប្រព័ន្ធផ្សព្វផ្សាយព័ត៌មានចិនបានច្របូកច្របល់ចាប់តាំងពីវេជ្ជបណ្ឌិតម្នាក់ដែលបានលាតត្រដាងអំពីមេរោគកូរ៉ូណាស្លាប់ដោយសារជំងឺនេះ។ លោកវេជ្ជបណ្ឌិត Li Wenliang ជាចក្ខុពេទ្យនៃមន្ទីរពេទ្យធំក្នុងក្រុងWuhan គឺជាមនុស្សដំបូងម្នាក់ក្នុងចំណោមក្រុមមនុស្សដំបូងគេ ដែលបានរកឃើញថាមានមេរោគកូរ៉ូណាវីរុសប្រភេទថ្មីផ្ទុះឡើង។ បីថ្ងៃក្រោយមកបន្ទាប់ពីលោកបានប្រកាសឱ្យមិត្តរួមថ្នាក់របស់លោកប្រុងប្រយ័ត្ននឹងការផ្ទុះឡើងនៃជំងឺមានសភាពដូចជំងឺSARS នេះ តាមប្រព័ន្ធជជែកសន្ទនាវីដេអូលោក Li ត្រូវកងកម្លាំងប៉ូលិសប្រមាណ៧រូបចាប់ខ្លួនពីបទ«ផ្សព្វផ្សាយពាក្យចចាមអារ៉ាម»។
បន្ទាប់ពីត្រូវបានគេដោះលែងលោក Li នៅបន្តព្យាបាលអ្នកជំងឺផ្ទុកមេរោគកូរ៉ូណាវីរុសដដែល។ ប្រហែលជាពេលនោះហើយដែលលោកបានឆ្លងជំងឺនោះពីអ្នកជំងឺ។
នៅថ្ងៃទី១០ខែមករា លោក Liធ្លាក់ខ្លួនឈឺធ្ងន់និងបានប្រកាសតាមបណ្តាញទំនាក់ទំនងWeibo នៅថ្ងៃទី១ខែកុម្ភៈថាលោកត្រូវបានគេរកឃើញថាមានផ្ទុកមេរោគកូរ៉ូណាវីរុសប្រភេទថ្មី។ ព័ត៌មានស្តីពីមរណភាពរបស់លោកLi រឹតតែបន្ថែមការខឹងសម្បារពីប្រជាជនចិនដែលបានបង្ហោះសារលើបណ្តាញសង្គមរបស់ចិន។អ្នកប្រើប្រាស់បណ្តាញសង្គមជាច្រើនបញ្ចេញអារម្មណ៍ក្រៀមក្រំតាមរយៈការបង្ហោះរូបភាពដៃប្រណម្យទៀនជាដើម។
កាន់ទុក្ខត្រូវបានធ្វើឡើងជាមួយនឹងការខឹងសម្បារលើរដ្ឋាភិបាលចិន ដែលព្យាយាមបំបិទមាត់លោក Li មិនឲ្យបញ្ចេញព័ត៌មានអំពីកូរ៉ូណាវីរុស។
សញ្ញាhashtag ភ្ជាប់នឹងឃ្លា«ខ្ញុំចង់មានសេរីភាពក្នុងការបញ្ចេញមតិ» បានពេញនិយមលើបណ្តាញសង្គម Weiboនិងបណ្តាញសង្គមផ្សេងៗទៀតដែលមានចំនួនចូលមើលរហូតដល់១លាន៨សែនមុននឹងត្រូវបានគេរឹតត្បិត។
អ្នកប្រើប្រាស់បណ្តាញសង្គមម្នាក់ទៀតយល់ថាមរណភាពរបស់លោក Liនឹងជះឥទ្ធិពលដល់សេរីភាពបញ្ចេញមតិនៅប្រទេសចិន។
អ្នកប្រើប្រាស់បណ្តាញម្នាក់ទៀតសរសេរថា៖ «នឹងគ្មានអ្វីផ្លាស់ប្តូរធំដុំនោះទេបន្ទាប់ពីជំងឺឆ្លងរាលត្បាតនេះផុតរលត់ទៅគឺនឹងគ្រាន់តែឃើញមានក្រុមមន្រ្តីមូលដ្ឋានមួយចំនួនខ្លះខិតខំបន្ធូរបន្ថយការខឹងសម្បារបស់ប្រជាជនតាមរយៈការជួបប្រជុំមហាជនតែប៉ុណ្ណោះ។ យូរឬៗទៅ ប្រជាជននឹងភ្លេចហើយហើយមិនយូរមិនឆាប់ប្រជាជននឹងមានអារម្មណ៍ដូចដើមវិញ»។
អ្នកប្រើប្រាស់បណ្តាញសង្គមម្នាក់ទៀតបានបង្ហោះតំណភ្ជាប់អាសយដ្ឋានលើអ៊ីនធឺណិតមួយដែលដាក់ញត្តិដល់សេតវិមានដើម្បីស្នើសុំលោកប្រធានាធិបតីDonald Trump តែងតាំងលោកវេជ្ជបណ្ឌិតLi Wenliang ជាជ័យលាភីពានរង្វាន់ណូបែលសន្តិភាព។
ក៏មានការយករូបលោកវេជ្ជបណ្ឌិត Liទៅច្នៃប្រឌិតលក្ខណៈសិល្បៈផងដែរ ដែលភាគច្រើនគូរជាផ្ទាំងគំនូររូបលោកពាក់ម៉ាសជាដើម។ មួយទៀត គឺរូបវេជ្ជបណ្ឌិតម្នាក់ពាក់ម៉ាសនិងមានស្លាបជាទេវតាកំពុងខំសង្គ្រោះអ្នកជំងឺខណៈដែលមានដៃម្ខាងនៅលើមេឃកាន់កន្ត្រៃកាត់ច្រឹបស្លាបរបស់ទេវតានោះ។
សារព័ត៌មានthe South China Morning Post បានឲ្យដឹងថាអ្នកត្រួតពិនិត្យបណ្តាញសង្គមរបស់ចិន កំពុងបិទខ្ទប់ជាលក្ខណៈប្រព័ន្ធរាល់ខ្លឹមសាររិះគន់រដ្ឋាភិបាលចិនតាមរយៈការលុបចោលអត្ថបទបង្ហោះនិងការបិទខ្ទប់ការប្រើប្រាស់សញ្ញាhashtag ជាដើម។ ដើម្បីកុំឱ្យអាជ្ញាធរចាប់បាននិងលុបចោលអ្នកប្រើប្រាស់បានប្តូរមកប្រើសញ្ញាhashtag ភ្ជាប់នឹងឃ្លាថា៖ «តើអ្នកអាចគ្រប់គ្រងបានដែរឬទេតើអ្នកយល់ដែរឬទេ»វិញ ក្នុងន័យជាការបង្ហោះសាររិះគន់ប៉ុន្តែក្នុងពេលថ្មីៗនេះសារទាំងនោះត្រូវបានក្រុមហ៊ុនWeiboលុបចោល៕
ប្រែសម្រួលដោយ កោះ សុគន្ធី
