ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

យន្តហោះអាកាសចរណ៍ប៉ាគីស្ថានចុះចតនៅទីក្រុងកាប៊ុលដឹកជនភៀសខ្លួនចេញ រីឯអាកាសយានិកអាហ្វហ្គានីស្ថានចាកចេញពីអ៊ូសបេគីស្ថាន


យន្ដហោះ​អាកាសចរណ៍​អន្តរជាតិ​មួយ​គ្រឿង​របស់​ប៉ាគីស្ថាន​ដឹក​អ្នក​ដំណើរ​ពេញ ចុះចត​នៅ​រដ្ឋធានី​កាប៊ុល ដែល​នេះ​គឺ​ជា​ជើង​ហោះហើរ​​អាកាសចរណ៍អន្តរជាតិទី​មួយ​​​ដែល​ចុះចត​នៅ​អាហ្វហ្គានីស្ថាន ចាប់តាំង​​ពី​ក្រុម​តាលីបង់​​​ឡើង​កាន់កាប់​អំណាច ថ្ងៃទី១៣ ខែកញ្ញា ឆ្នាំ២០២១។
យន្ដហោះ​អាកាសចរណ៍​អន្តរជាតិ​មួយ​គ្រឿង​របស់​ប៉ាគីស្ថាន​ដឹក​អ្នក​ដំណើរ​ពេញ ចុះចត​នៅ​រដ្ឋធានី​កាប៊ុល ដែល​នេះ​គឺ​ជា​ជើង​ហោះហើរ​​អាកាសចរណ៍អន្តរជាតិទី​មួយ​​​ដែល​ចុះចត​នៅ​អាហ្វហ្គានីស្ថាន ចាប់តាំង​​ពី​ក្រុម​តាលីបង់​​​ឡើង​កាន់កាប់​អំណាច ថ្ងៃទី១៣ ខែកញ្ញា ឆ្នាំ២០២១។

អ្នក​នាំពាក្យ​ក្រុមហ៊ុន​អាកាសចរណ៍​អន្តរជាតិ​ប៉ាគីស្ថាន​ (PIA) ​បាន​និយាយ​ថា​ យន្តហោះ​ពាណិជ្ជកម្ម​របស់​ខ្លួន​ បាន​ចេញ​ដំណើរ​ពី​ទីក្រុង​អ៊ីស្លាម៉ាបាដ​ទៅចុះ​នៅ​ទីក្រុង​កាប៊ុល​នៅ​ថ្ងៃច័ន្ទ​នេះ។​ នេះបើតាម​ទីភ្នាក់ងារ​សារព័ត៌មាន​ Reuters។​

យន្តហោះរបស់​ក្រុមហ៊ុន​អាកាសចរណ៍​រដ្ឋ​ប៉ាគីស្ថាន​នឹង​ដឹក​មនុស្ស​ដែល​មាន​ឯកសារ​ធ្វើ​ដំណើរ​ត្រឹមត្រូវ​ពី​ទីក្រុង​កាប៊ុល​ទៅ​កាន់​ទីក្រុង​អ៊ីស្លាម៉ាបាដ។​ ទោះជាយ៉ាងណា​ គេ​មិនច្បាស់​ភ្លាមៗ​ថា​តើ​យន្តហោះ​នេះ​ត្រូវបាន​ចាត់​ថ្នាក់​ជា​ជើង​យន្តហោះ​ពាណិជ្ជ​កម្ម​ធម្មតា​ ឬ​យន្តហោះ​ពាណិជ្ជកម្ម​ពិសេស​នោះ​ទេ។​

នេះ​គឺជា​យន្តហោះ​ក្រុមហ៊ុន​អាកាសចរណ៍​អន្តរជាតិ​ប៉ាគីស្ថាន​ដំបូងគេ​ដែល​បាន​ចុះចត​នៅ​ទីក្រុង​កាប៊ុល​ បន្ទាប់ពី​ការ​បញ្ចប់​នៃ​ការ​ដក​កងទ័ព​បរទេស​និង​ការ​ជម្លៀស​ប្រជាជន​ទ្រង់ទ្រាយ​ធំ​ចេញ​ពី​ប្រទេស​អាហ្វហ្គានីស្ថាន​នៅ​ខែ​ដើម​នេះ។

ម្យ៉ាង​ទៀត​អាកាស​យានិក​អាហ្វហ្គានីស្ថាន​ខ្លះ​ ដែល​ត្រូវ​បាន​ឃាត់​ខ្លួន​នៅ​ក្នុង​ប្រទេស​អ៊ូសបេគីស្ថាន​ប្រហែល​មួយ​ខែ​ បាន​ចាប់ផ្តើម​ចាកចេញ​កាលពី​ថ្ងៃ​អាទិត្យ​ទៅ​កាន់​ប្រទេស​អេមីរ៉ាតអារ៉ាប់រួម។​ នេះ​បើ​តាម​សេចក្តី​រាយ​ការណ៍​របស់​ទីភ្នាក់ងារ​ព័ត៌មាន ​Reuters។​

អាកាស​យានិក​អាហ្វហ្គានីស្ថាន​ម្នាក់​ដែល​បង្ហាត់​ដោយ​សហ​រដ្ឋ​អាមេរិក ​បាន​ប្រាប់​ទីភ្នាក់ងារ​ព័ត៌មាន ​Reuters​ ថា​អាកាស​យានិក​មួយ​ក្រុមចាកចេញ​ពី​ប្រទេស​អ៊ូសបេគីស្ថាន​ទៅកាន់​ប្រទេស​អេមីរ៉ាតអារ៉ាប់រួម​កាលពី​ថ្ងៃ​អាទិត្យ​តាម​កិច្ច​ព្រមព្រៀង​សម្រប​សម្រួល​ដោយ​សហ​រដ្ឋ​អាមេរិក​ ថ្វីបើ​ក្រុម​តាលីបង់​ទាមទារ​ថា ពួកគេ​ត្រូវ​ត្រឡប់​ទៅ​ប្រទេស​អាហ្វហ្គានីស្ថាន​វិញ​ក៏​ដោយ។​

កាសែត​ Wall Street Journal ​បាន​រាយ​ការណ៍​កាលពី​ថ្ងៃ​សៅរ៍​ថា​ អាកាស​យានិក​នឹង​ទៅ​កាន់​មូលដ្ឋាន​យោធា​សហ​រដ្ឋ​អាមេរិក​នៅ​ក្នុង​ទីក្រុង​ដូហា ​ប្រទេស​កាតា ​មុន​ពេល​ត្រូវ​ទៅ​ទីតាំង​ថ្មី​នៅ​ប្រទេស​ទី៣។​

គេ​មិន​ទាន់​ដឹង​ច្បាស់​ភ្លាមៗ​នៅ​ឡើយ​ទេ​អំពី​អនាគត​យន្តហោះ​ចំនួន​៤៦​គ្រឿង​នៅ​ប្រទេស​អ៊ូសបេគីស្ថាន​ដែល​រួម​មាន​យន្តហោះ​វាយ​ប្រហារ​ធន់​ស្រាល​ប្រភេទ​ A-29 ​និង​ឧទ្ធម្ភាគចក្រ ​UH-60 Black Hawk។ ​នេះ​តាម​សេចក្តី​រាយ​ការណ៍​របស់​ទីភ្នាក់ងារ​ព័ត៌មាន​ Reuters។​

ប៉ុន្មាន​ម៉ោង​មុន​រដ្ឋធានី​កាប៊ុលដួល​រលំ​កាលពី​ថ្ងៃ​ទី១៥ ​ខែ​សីហា ​បុគ្គលិក​យោធា​អាហ្វហ្គានីស្ថាន​សរុប​ចំនួន​៥៨៥​នាក់ ​និង​ក្រុម​គ្រួសារ​របស់​ពួកគេ​បាន​ជិះ​យន្តហោះ​យោធា​ចំនួន​២២គ្រឿង​ និង​ឧទ្ទម្ភាគចក្រ​ចំនួន​២៤​គ្រឿង​ទៅកាន់​ប្រទេស​អ៊ូសបេគីស្ថាន។ ​ពួកគេ​ត្រូវ​បាន​ស្ទាក់​ដោយ​យន្តហោះ​យោធា​អ៊ូសបេគីស្ថាន ​ហើយ​ត្រូវ​បាន​បង្ខំ​ឲ្យ​ចុះ​នៅ​អាកាស​យានដ្ឋាន​អន្តរជាតិ​នៅ​ក្នុង​ទីក្រុង ​Termez​ ជាប់​ព្រំដែនប្រទេស​អាហ្វហ្គានីស្ថាន។​

ក្រុម​តាលីបង់​បាន​គាប​សង្កត់​ឲ្យ​រដ្ឋាភិបាល​អ៊ូសបេគីស្ថានប្រគល់​យន្តហោះ ​និង​អាកាស​យានិក។ ​នេះ​បើតាម​មន្រ្តី​សហ​រដ្ឋ​អាមេរិក​ប្រាប់​ទីភ្នាក់ងារ​ព័ត៌មាន ​Reuters។ ​ក្រុម​តាលីបង់​បាន​រឹបអូស​យក​យន្តហោះ រួម​ទាំង​ឧទ្ធម្ភាគចក្រ​និង​យន្តហោះ​គ្មាន​មនុស្ស​បើក​កាលពី​ចុង​ខែ​មុន ​ហើយ​បាន​ទាមទារ​ថា​ រថយន្តដែល​ត្រូវ​បាន​យក​មុន​ពេល​ពួកគេ​បាន​ប្រកាស​កាន់កាប់​រដ្ឋធានី​កាប៊ុល​ ​ត្រូវ​តែ​ប្រគល់​មក​ឲ្យ​វិញ៕

(ព័ត៌មាន​ខ្លះ​ក្នុង​សេចក្តី​រាយ​ការណ៍​នេះ​ដកស្រង់​ពី​ទីភ្នាក់​ងារ​ព័ត៌មាន ​Reuters​ ក្នុង​ទីក្រុងអ៊ីស្លាម៉ាបាដ)​

XS
SM
MD
LG