ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

តុលាការ​ក្រុង​ភ្នំពេញ​ពន្យារ​ពេល​កាត់​ក្តី​លោក គង់ រ៉ៃយ៉ា


រូបឯកសារ៖ យុវជន គង់ រ៉ៃយ៉ា (កណ្តាល) ត្រូវ​បាន​នាំ​ខ្លួន​មក​កាន់​តុលាការ​ក្រុង​ភ្នំពេញ កាល​ពី​ថ្ងៃអង្គារ ទី១៥ ខែ​មីនា ឆ្នាំ​២០១៦។ (Reuters/Samrang Pring)

នៅ​ថ្ងៃ​សុក្រ​នេះ​ សាលាដំបូង​រាជធានី​ភ្នំពេញ​បាន​លើក​ពេល​សវនាការជនុំ​ជម្រះ​ក្តី ​លោក គង់ រ៉ៃយ៉ា​ សកម្មជនវ័យ​២៨ឆ្នាំ ​ដែល​កំពុង​ស្ថិត​នៅ​ក្រៅ​ឃុំ ​ដោយ​សារ​តែ​មិនមាន​វត្តមាន​របស់​សាក្សី​ និង​ភាគី​ពាក់​ព័ន្ធ​ផ្សេង​ទៀត។ នេះ​បើ​យោងតាម​ការ​បញ្ជាក់​របស់ភរិយាលោក គង់ រ៉ៃយ៉ា និង​មន្ត្រី​សិទ្ធិមនុស្ស។

អ្នកស្រី​ សុខ ស្រីនិច្ច ​ភរិយា​របស់​លោក គង់ រ៉ៃយ៉ា ​បាន​ប្រាប់​ VOA​ ថា​ តុលាការ​បាន​ពន្យារពេល​បើក​សវនា​ការ​កាត់​ក្តី​ស្វាមី​ ព្រោះ​មិន​មាន​សាក្សី​គ្រប់គ្រាន់​ខណៈ​ដែល​ស្វាមីអ្នកស្រី​មិន​អាចចូល​រួម​សវនាការ​ដែល​គ្រោង​ធ្វើ​នៅ​ថ្ងៃ​នេះ។ អ្នកស្រី​បន្ថែម​ថា​ តុលាការ​ក៏មិន​បាន​កំណត់​កាល​បរិច្ឆេទ​ជំនុំ​ជម្រះ​ថ្មី​នោះ​ទេ។

«ខាង​តុលាការ​គាត់​ថា ​អត់​មាន​សាក្សី​ សាក្សី​ខាង​មន្ត្រី​ ខាង​ប៉ូលិស​ក៏​អត់មាន ​សាក្សី​ខាង​ប្ដី​ខ្ញុំ​ហ្នឹង​ក៏​អត់​ចូល​រួម ​ហើយ​អត់មាន​វត្តមាន​របស់​គាត់​អ៊ីចឹង​ទៅ​ក៏​គេ​សម្រេច​លើកពេល»។

កាលពី​ខែ​វិច្ឆិកា​ តុលាការ​ក្រុង​ភ្នំពេញ​ បានអនុញ្ញាត​ឲ្យ​លោក គង់​ រ៉ៃយ៉ា​ បាន​ស្ថិត​នៅ​ក្រៅ​ឃុំ បន្ទាប់​ពី​សកម្មជន​រូប​នេះ​បាន​ជាប់​ក្នុង​ពន្ធនាគារ​អស់​រយៈ​ពេល​ជាង​បួន​ខែ​ក្នុង​សំណុំរឿង​ចូលរួមរំឭក​ដល់​ការ​ស្លាប់​របស់​អ្នកវិភាគ​នយោបាយ​លោក​បណ្ឌិត​ កែម​ ឡី។​ តុលាការ​បាន​ហាម​ប្រាម​លោកគង់​រ៉ៃយ៉ា​ ​មិន​ឲ្យ​ធ្វើ​ការ​បញ្ចេញ​មតិ​តាម​បណ្តាញ​សង្គម​ ឬក៏​ធ្វើ​ដំណើរ​ទៅ​ក្រៅ​ប្រទេស​ ក្នុង​អំឡុង​ពេល​លោក​កំពុង​ស្ថិត​នៅ​ក្រៅឃុំ។

អ្នក​ស្រី​សុខ ស្រីនិច្ច​ បាន​បន្ត​ថា​ស្វាមី​របស់​អ្នក​ស្រីមិន​អាច​មកចូល​រួម​សវនាការ​បាន​ដោយ​សារ​តែ​លោក​មាន​ជំងឺ​បន្តិច​បន្តួច ​ហើយ​កំពុង​សម្រាក​នៅ​ខេត្ត​សៀមរាប។ អ្នកស្រី​បន្ថែម​ថា​ អ្នកស្រី​ក៏​ទៅ​មិនទាន់​ម៉ោងបើក​ការ​ជំនុំជម្រះ​ដើម្បី​ធ្វើ​ជា​សាក្សី​ឲ្យ​ស្វាមី​អ្នកស្រីផងដែរ។​ ទោះ​យ៉ាងណា​អ្នកស្រីសង្ឃឹម​ថាតុលាការ​នឹង​លើក​យក​ក្តីក្តាំ​របស់​ស្វាមី​របស់​អ្នក​ស្រី​មក​ជម្រះឆាប់ៗ​នេះ។

អ្នក​ស្រីសុខ ស្រីនិច្ច​និយាយថា៖ «ពិបាក​ដែរ បើ​យើង​រង់ចាំ​លើកហ្នឹង​ហើយដល់ពេល​យើង​ត្រូវ​រង់ចាំ​រយៈពេល​ពីរបីខែ​អីទៀត អ៊ីចឹង​វាយូរ​ហើយ​ការលំបាក​ខ្លាំង​មែនទែន។ ខ្លាចតែពេល​ខ្លះ​ចំ​រវល់អ៊ីចឹង​ទៅ អត់​បាន​ចំ​ថ្ងៃគាត់​កោះហៅ​ដូចលើក​ហ្នឹង​អ៊ីចឹង​ណាបង»។

លោក​អ៊ី រិន្ទ អ្នក​នាំ​ពាក្យ​សាលាដំបូង​រាជធានី​ភ្នំពេញ​បដិសេធ​មិន​ផ្តល់​ការ​អធិប្បាយ​នៅ​ថ្ងៃ​សុក្រ​នេះ។

លោក​ គង់​ រ៉ៃយ៉ា ​ត្រូវ​បាន​អាជ្ញាធរ​កម្ពុជា​ចាប់ខ្លួន​ជា​លើក​ទី​ពីរ​ បន្ទាប់​ពី​លោក​ប្រកាស​លក់​អាវយឺត​មាន​ភ្ជាប់​រូបថត​អ្នក​វិភាគ​នយោបាយ​លោក ​កែម ឡី​ ​តាម​បណ្តាញ​សង្គម​ហ្វេសប៊ុក​កាលពី​ថ្ងៃ​ទី​៩ខែកក្កដា​ ឆ្នាំ​២០១៩។

អ្នកឃ្លាំមើល​ស្ថានភាព​សិទ្ធិ​មនុស្ស​នៅ​ប្រទេស​កម្ពុជា​ ​យល់​ថា​ តុលាការ​គួរ​តែ​ទម្លាក់​បទចោទ ប្រឆាំង​សកម្ម​ជន​រូប​នេះ​ ដោយ​សារ​តែ​សកម្មភាព​សង្គម​របស់លោកគង់ រ៉ៃយ៉ា ​មិន​បានបង្ក​ឲ្យមាន​បទល្មើស ដែល​ត្រូវ​នាំ​យក​មក​កាត់​ទោស​នោះ​ទេ។

លោក សឹង សែនករុណា​ អ្នក​នាំពាក្យ​សមាគមសិទ្ធិមនុស្ស​អាដហុក (Adhoc) ​មានប្រសាសន៍​ថា​៖

«ធ្វើ​យ៉ាង​ណា​ពន្លឿន​នីតិវិធីហើយ​ទម្លាក់​នូវបទចោទប្រកាន់ដើម្បី​ឲ្យ​គាត់​មាន​សេរីភាព​ក្នុង​ការ​ប្រកប​របរ​ចិញ្ចឹម​ជីវិត​របស់គាត់ រួម​ទាំង​កិច្ច​ការងារ​សង្គម​នានា​ អាហ្នឹង​វាជារឿង​មួយ​ដែល​ល្អ​ប្រសើរ។ ជាទូទៅ​កម្ពុជា​យើង​នេះ កំពុងស្ថិត​ក្នុង​ការ​ឃ្លាំង​មើល​ពីសិទ្ធិសេរីភាពទាំង​អស់នេះ»។

លោក​ គង់ រ៉ៃយ៉ា ​ធ្លាប់​ត្រូវ​បាន​តុលាការ​ក្រុង​ភ្នំពេញ​កាត់​ទោស​ឲ្យ​ជាប់​ពន្ធនាគារ​ចំនួន​១៨​ខែ​ កាល​ពី​ឆ្នាំ​២០១៦​ ក្រោម​ការ​ចោទ​ប្រកាន់​ពី​បទ​«ញុះញង់​ឲ្យ​ប្រព្រឹត្ត​បទ​ឧក្រិដ្ឋ​ជា​អាទិ៍»​ ក្រោយ​ពី​រូប​លោក​បាន​ប្រកាស​ឲ្យ​សាធារណជន​ចូល​រួម​ធ្វើ​បដិវត្តន៍​ពណ៌​ប្រឆាំង​នឹង​រដ្ឋាភិបាល​បច្ចុប្បន្ន៕

ផែនទីលទ្ធផលការបោះឆ្នោតប្រធានាធិបតីអាមេរិកពីឆ្នាំ ១៩៩២-បច្ចុប្បន្ន

XS
SM
MD
LG