ប្រទេសហ្វីលីពីនបង្ហាញពី«ការព្រួយបារម្ភយ៉ាងខ្លាំងមួយ» អំពីរូបភាពតាមប្រព័ន្ធផ្កាយរណបដែលត្រូវបានបញ្ចេញឲ្យដឹងកាលពីពេលថ្មីៗនេះ ដែលរូបភាពទាំងនោះបង្ហាញថា មានការវិវត្តន៍សំខាន់ៗក្នុងការរានដីរបស់ចិននៅឯតំបន់ផ្ទាំងថ្មដែលមានជម្លោះក្នុងសមុទ្រចិនភាគខាងត្បូង។
រូបភាពចុងក្រោយបង្អស់ដែលត្រូវបោះពុម្ពផ្សាយដោយទស្សនាវដ្តី Jane's Defense Weekly របស់ក្រុមហ៊ុន HIS បានបង្ហាញថា មាន«កន្លែងធំមួយ»ដែលស្ថិតក្នុងការសាងសង់នៅឯថ្មប៉ប្រះទឹក Johnson South។ កាលពីខែឧសភាឆ្នាំទៅមិញ កងយោធាហ្វីលីពីនបានរាយការណ៍ថា មានកប៉ាល់ចិនមួយគ្រឿងកំពុងដឹកខ្សាច់និងថ្មដើម្បីពង្រីកតំបន់ថ្មប៉ប្រះទឹកនោះ។
រូបភាពចុងក្រោយក៏បានបង្ហាញឲ្យឃើញអ្វីដែលមើលទៅហាក់បីដូចជាកន្លែងចតឧទ្ធម្ភាគចក្រ និងប៉មប្រើសម្រាប់ប្រឆាំងនឹងយន្តហោះ ដែលទាំងនោះកើតចេញពីការសាងសង់នៅចំណុចថ្មប៉ប្រះទឹក Gaven ចាប់តាំងពីខែមីនាឆ្នាំមុនរហូតដល់ខែមករាឆ្នាំនេះ។ របាយការណ៍នោះសរសេរថា សកម្មភាពនៅតំបន់ Gaven មាន«ស្លាកស្នាមដូចគ្នា»ទៅនឹងសកម្មភាពរានដីនៅឯថ្មប៉ប្រះទឹក Hughes ដែលវៀតណាមបានទាមទារយកជារបស់ខ្លួន។ អ្នកនាំពាក្យកិច្ចការបរទេសរបស់ហ្វីលីពីន លោក Charles Jose មានប្រសាសន៍ថា ប្រទេសរបស់លោកមាន«ការព្រួយបារម្ភយ៉ាងខ្លាំង»អំពីសកម្មភាពរុករានដីរបស់ចិន។
«យើងបានកត់សម្គាល់ឃើញថា ការសាងសង់របស់ចិននៅលើទីតាំងទាំងនោះ គឺក្នុងគោលបំណងផ្លាស់ប្តូរលក្ខណៈ ស្ថានភាពនិងកម្មសិទ្ធិដែនសមុទ្រនៅលើទីតាំងទាំងនោះ។ ហើយយើងបានជំរុញយ៉ាងខ្លាំងឲ្យប្រទេសចិនបញ្ឈប់សកម្មភាពរានដីដែលពួកគេកំពុងធ្វើនោះ។»
រដ្ឋាភិបាលទីក្រុងម៉ានីលបានធ្វើការប្រឆាំងជាមួយនឹងរដ្ឋាភិបាលទីក្រុងប៉េកាំងជាច្រើនដងអំពីសកម្មភាពរានដីរបស់ចិននៅចំណុចផ្ទាំងថ្មដែលទាមទារដោយប្រទេសហ្វីលីពីនក្នុងចំណោមប្រជុំកោះស្រ្ពែតលី (Spratly Islands)។ លោក Jose និយាយថា ការឆ្លើយតបរបស់ចិនទៅនឹងការតវ៉ាចុងក្រោយពីរឿងនៅតំបន់ថ្មប៉ប្រះទឹក Johnson South គឺថា ពួកគេមានអធិបតេយ្យភាពដែលមិនអាចប្រកែកបានទៅលើប្រជុំកោះក្នុងសមុទ្រចិនភាគខាងត្បូង។
នេះគឺជាជំហររបស់ចិនទាក់ទិននឹងសកម្មភាពរបស់ខ្លួននៅលើ ឬនៅជុំវិញតំបន់ផ្ទាំងថ្មនិងនៅមាត់ច្រាំងសមុទ្រទាំងនោះ។ លើសពីនេះទៅទៀត ក្រសួងការបរទេសចិនបាននិយាយថា ខ្លួនមានសិទ្ធិក្នុងការចូលរួមក្នុងសកម្មភាពសាងសង់ទាំងឡាយនៅលើប្រជុំកោះដែលខ្លួនគ្រប់គ្រង។ ប្រទេសចិន ហ្វីលីពីន វៀតណាម ប៊្រុយណេ ម៉ាឡេស៊ី និងតៃវ៉ាន់ បានអះអាងទាមទាររៀងៗខ្លួននូវដែនសមុទ្រដែលគេតែងតែធ្វើដំណើរឆ្លងកាត់និងសម្បូរទៅដោយធនធាន។
នៅលើប្រជុំកោះស្រ្ពែតលី ប្រទេសវៀតណាម និងតៃវ៉ាន់បានបង្កើតឡើងនូវកោះធម្មជាតិតូចៗមួយចំនួន ដោយប្រើប្រាស់ហេដ្ឋារចនាសម្ព័ន្ធយោធាការពារយ៉ាងរឹងមាំ។ ប្រទេសម៉ាឡេស៊ីក៏បានសាងសង់រមនីយដ្ឋានសម្រាប់លោតទឹកនៅជុំវិញកន្លែងចុះចតយន្តហោះនៅលើផ្ទាំងថ្មដែលខ្លួនគ្រប់គ្រង ហើយប្រទេសហ្វីលីពីនបានជំរុញឲ្យមានប្រជាជនស៊ីវិលរស់នៅនៅលើកោះធំដែលខ្លួនទាមទារ។
ក៏ប៉ុន្តែ អ្នកនិពន្ធនៃទស្សនាវដ្តីយោធា Jane's Defense ប្រចាំតំបន់អាស៊ីប៉ាស៊ីហ្វិក លោក James Hardy មានប្រសាសន៍ថា ចិនដែលពីមុនមកមិនធ្លាប់កាន់កាប់កោះណាមួយសោះនៅតំបន់នោះ កំពុងតែកែប្រែថ្មប៉ប្រះទឹកឲ្យក្លាយទៅជាកោះសិប្បនិម្មិត។ លោកបានបន្ថែមថា សំណង់ដែលចិនកំពុងតែកសាងឲ្យទៅជាកោះនោះ បង្កើតបានជាខ្សែចង្វាក់ឆ្លងកាត់ប្រជុំកោះស្រ្ពែតលី។
លោកមានប្រសាសន៍ថា៖ «ប៉ុន្តែពួកគេនៅតែមានសមត្ថភាពហើយពួកគេនឹងដា់ក់ការការពារនិងកំណត់ទីតាំងដើម្បីបញ្ជាក់ពីអធិបតេយ្យភាពដែលពួកគេទាមទារទៅលើចំណែកផ្សេងៗទៀតនៃកោះស្ព្រែតលីនោះ។ នោះគឺជាបញ្ហា។ អ្វីៗទាំងអស់គឺជាការបង្ខិតបង្ខំ។ ខ្ញុំគិតថា នោះជាអ្វីដែលយើងគិតថានឹងកើតមានឡើង។ ពួកគេមិនចាំបាច់បង្កសង្រ្គាមទេ។ ពួកគេគ្រាន់តែធ្វើឲ្យទីនោះមានការលំបាកសម្រាប់អ្នកផ្សេងទៀតដែលចង់ទៅកាន់ទីនោះទៅបានហើយ»។
រូបថតមានប្រភពមកពីទស្សនាវដ្តី Jane's ប្រទេសហ្វីលីពីន និងរដ្ឋាភិបាលចិន បានបង្ហាញឲ្យឃើញថា មកដល់បច្ចុប្បន្ននេះ ចិនកំពុងតែបង្កើតឡើងនូវកោះសិប្បនិម្មិតមួយចំនួននៅថ្មប៉ប្រះទឹក Cuateron ប៉ប្រះទឹក Fiery Cross ប៉ប្រះទឹក Gaven ប៉ប្រះទឹក Hughes និងថ្មប៉ប្រះទឹក Johnson South។ ប្រទេសវៀតណាមក៏បានទាមទារតំបន់ថ្មប៉ប្រះទឹកទាំងអស់នោះដែរ នៅខណៈពេលដែលប្រទេសហ្វីលីពីនក៏ទាមទារតំបន់ទាំងអស់នោះលើកលែងតែថ្មប៉ប្រះទឹក Hughes៕
ប្រែសម្រួលដោយ នៀម ឆេង
