ប្រធានាធិបតីហ្វីលីពីនលោក Rodrigo Duterte បាននិយាយនៅថ្ងៃព្រហស្បតិ៍នេះថា លោកទំនងជានឹងធ្វើតាមករណីប្រទេសរុស្ស៊ី ដោយដកប្រទេសហ្វីលីពីនចេញពីសមាជិកភាពរបស់តុលាការព្រហ្មទណ្ឌអន្តរជាតិ ICC។ អ្នករិះគន់រូបលោក បានលើកឡើងថា លោកអាចត្រូវគេចោទប្រកាន់នៅតុលាការព្រហ្មទណ្ឌអន្តរជាតិនេះ ពីបទសម្លាប់មនុស្សរាប់ពាន់នាក់នៅក្នុងយុទ្ធនាការប្រយុទ្ធប្រឆាំងគ្រឿងញៀនរបស់លោក។
នៅក្នុងសេចក្ដីប្រកាសមួយមុនពេលលោក Duterte ចាកចេញទៅកាន់ប្រទេសប៉េរូដើម្បីចូលរួមនៅក្នុងកិច្ចប្រជុំកំពូលប្រចាំឆ្នាំនៃក្រុមមេដឹកនាំមកពីតំបន់អាស៊ីប៉ាស៊ីហ្វិក លោក Duterte បាននិយាយថា អង្គការសហប្រជាជាតិគ្មានប្រយោជន៍ក្នុងការជួយបញ្ចប់សង្គ្រាមនៅក្នុងពិភពលោក។ លោកបាននិយាយថា ប្រសិនបើប្រទេសចិន និងប្រទេសរុស្ស៊ី សម្រេចចិត្តបង្កើតអង្គការពិភពលោកថ្មី ប្រទេសហ្វីលីពីននឹងក្លាយជាប្រទេសដំបូងគេក្នុងការចូលជាសមាជិកអង្គការថ្មីនេះ ហើយនឹងចាកចេញពីសមាជិកភាពរបស់អង្គការសហប្រជាជាតិ ដោយលោកបាននិយាយថា អង្គការសហប្រជាជាតិនេះគឺរងឥទ្ធិពលពីសហរដ្ឋអាមេរិក។
លោក Duterte ថា លោកចង់ដកប្រទេសហ្វីលីពីនចេញពីសមាជិកភាពរបស់តុលាការព្រហ្មទណ្ឌអន្តរជាតិ ដោយសារតែប្រទេសតូចៗតែងតែរងគ្រោះ ប៉ុន្តែមិនមានសកម្មភាពណាមួយត្រូវបានតុលាការព្រហ្មទណ្ឌអន្តរជាតិអនុវត្តលើស្ថានការណ៍នៅក្នុងប្រទេសស៊ីរី និងប្រទេសអ៊ីរ៉ាក់នោះទេ ដែលនៅទីនោះ មានស្ត្រី និងកុមាររាប់ពាន់នាក់បានស្លាប់ដោយការសង្គ្រាម។
លោក Duterte ក៏បានរិះគន់កិច្ចព្រមព្រៀងសាកលលោកស្ដីពីការប្រយុទ្ធប្រឆាំងនឹងការប្រែប្រួលអាកាសធាតុ ដោយនិយាយថា កិច្ចព្រមព្រៀងនេះ មិនមានការដាក់ទោសទណ្ឌណាមួយដល់អ្នកប្រព្រឹត្តិល្មើសនោះទេ៕
