អនុប្រធានាធិបតីសហរដ្ឋអាមេរិកលោក Mike Pence បានប្រាប់លោក Juan Guaido ជាអ្នកដែលអាមេរិកបានទទួលស្គាល់ថាជាប្រធានាធិបតីបណ្តោះអាសន្នរបស់ប្រទេសវ៉េណេស៊ុយអេឡាថាសហរដ្ឋអាមេរិកនៅគាំទ្រពីក្រោយលោក១០០ភាគរយ។
លោក Pence បានថ្លែងដូច្នេះនៅអំឡុងកិច្ចប្រជុំត្រីភាគីមួយជាមួយលោក Guiado និងប្រធានាធិបតីកូឡុំប៊ីលោក Ivan Duque ដែលរៀបចំឡើងនៅទីក្រុង Bogota ប្រទេសកូឡុំប៊ី។ ខណៈលោក Pence និងពួកមេដឹកនាំក្នុងតំបន់ត្រូវគេរំពឹងថានឹងពិភាក្សាគ្នាអំពីយុទ្ធសាស្ត្រដើម្បីធ្វើយ៉ាងណាឲ្យប្រធានាធិបតីវ៉េណេស៊ុយអេឡាលោក Nicolas Maduro ចុះចេញពីតំណែងឲ្យបានឆាប់បំផុត និងអំពីមធ្យោបាយនានាដើម្បីដឹកជញ្ជូនជំនួយមនុស្សធម៌ដែលកំពុងស្តុកទុកនៅខាងព្រំដែនប្រទេសប្រេស៊ីល និងប្រទេសកូឡុំប៊ីចូលទៅក្នុងប្រទេសវ៉េណេស៊ុយអេឡាដើម្បីចែកដល់ប្រជាពលរដ្ឋវ៉េណេស៊ុយអេឡាដែលកំពុងប្រឈមនឹងការខ្វះខាតម្ហូបអាហារ និងថ្នាំពេទ្យជាដើម។
លោក Pence នឹងថ្លែងសន្ទរកថាអំពីការកើនឡើងនៃវិបត្តិនៅវ៉េណេស៊ុយអេឡាទៅកាន់ក្រុមលីម៉ា ដែលជាគណកម្មាធិការមួយត្រូវបានបង្កើតឡើងដើម្បីដោះស្រាយវិបត្តិនយោបាយនៅក្នុងប្រទេសវ៉េណេស៊ុយអេឡា។
លោកអនុប្រធានាធិបតីក៏ត្រូវគេរំពឹងថានឹងជួបជាមួយពួកមេដឹកនាំវ៉េណេស៊ុយអេឡា និងក្រុមគ្រួសាររបស់ពួកគេដែលនិរទេសខ្លួន មុននឹងលោកវិលត្រឡប់មករដ្ឋធានីវ៉ាស៊ីនតោនវិញ៕
