សហរដ្ឋអាមេរិកបានបញ្ជាក់ថា ព្រំដែនរវាងតំបន់ Gaza និងប្រទេសអេហ្ស៊ីបនឹងបើកឡើងវិញ ប៉ុន្តែពេលវេលានៃការបើកឡើងវិញនេះនៅមិនច្បាស់នៅឡើយដោយសារតែអង្គការសហប្រជាជាតិបានព្រមានអំពីស្ថានភាពមនុស្សធម៌បន្ទាន់ធ្ងន់ធ្ងរនៅក្នុងតំបន់ Gaza ហើយប្រទេសអ៊ីស្រាអែលបានប្រាប់ពលរដ្ឋប៉ាឡេស្ទីនដែលរស់នៅផ្នែកខាងជើងនៃតំបន់នេះឱ្យចាកចេញមុនពេលខ្លួនធ្វើប្រតិបត្តិការយោធា។
រដ្ឋមន្ត្រីការបរទេសសហរដ្ឋអាមេរិកលោក Antony Blinken ដែលគ្រោងនឹងត្រឡប់ទៅកាន់ប្រទេសអ៊ីស្រាអែលវិញនៅថ្ងៃចន្ទនេះបន្ទាប់ពីធ្វើទស្សនកិច្ចទៅកាន់ប្រទេសផ្សេងទៀតជាច្រើននៅក្នុងតំបន់ បាននិយាយថា សហរដ្ឋអាមេរិកបានធ្វើការជាមួយនឹងប្រទេសអេហ្ស៊ីប អ៊ីស្រាអែល និងអង្គការសហប្រជាជាតិដើម្បីធានាធ្វើយ៉ាងណាឱ្យជំនួយអាចចូលទៅដល់តំបន់ Gaza និងបានទៅដល់ដៃរបស់អ្នកដែលត្រូវការជំនួយទាំងនេះ។
លោក Blinken បានបញ្ជាក់នៅថ្ងៃចន្ទនេះនៅលើបណ្ដាញសង្គមអនឡាញ X ថា៖ «ក្នុងពេលប៉ុន្មានថ្ងៃកន្លងមកនេះ ខ្ញុំបានធ្វើដំណើរទៅប្រទេសអ៊ីស្រាអែល ហ្ស៊កដានី បារ៉ែន កាតា អេមីរ៉ាតអារ៉ាប់រួម អារ៉ាប៊ីសាអូឌីត និងអេហ្ស៊ីប។ អ្វីដែលខ្ញុំបានឮពីគ្រប់ដៃគូទាំងអស់គឺទស្សនៈរួមមួយនៅក្នុងការបង្ការជម្លោះនេះមិនឱ្យរីកសាយភាយ ការពារជីវិតជនស្លូតត្រង់ និងបញ្ជូនជំនួយទៅកាន់អ្នកដែលត្រូវការជំនួយទាំងនេះនៅក្នុងតំបន់ Gaza»។
ខុទ្ទកាល័យរបស់នាយករដ្ឋមន្ត្រីអ៊ីស្រាអែលលោក Benjamin Netanyahu បានបញ្ជាក់នៅក្នុងសេចក្ដីថ្លែងការណ៍មួយនៅថ្ងៃចន្ទនេះថា មិនមានកិច្ចព្រមព្រៀងដែលមានស្រាប់ណាមួយសម្រាប់បទឈប់បាញ់គ្នាដើម្បីអនុញ្ញាតឱ្យមានការបញ្ជូនជំនួយទៅកាន់តំបន់ Gaza និងសម្រាប់ជនបរទេសចាកចេញនោះទេ។
ប្រធានទីភ្នាក់ងារជនភៀសខ្លួនប៉ាឡេស្ទីននៃអង្គការសហប្រជាជាតិបាននិយាយកាលពីថ្ងៃអាទិត្យថា តំបន់ Gaza «កំពុងត្រូវបានគេច្របាច់កឱ្យស្លាប់» និងថាក្នុងពេលឆាប់ៗខាងមុខនេះគ្រឿងផ្គត់ផ្គង់នានាដូចជាទឹក ស្បៀងអាហារ និងថ្នាំពេទ្យនឹងអស់។
អគ្គលេខាធិការអង្គការសហប្រជាជាតិលោក Antonio Guterres បានអំពាវនាវដល់ក្រុមសកម្មប្រយុទ្ធហាម៉ាស់ (Hamas) ដែលបានវាយប្រហារលើប្រទេសអ៊ីស្រាអែលនិងចាប់ខ្លួនមនុស្សជាង ១៥០ នាក់ធ្វើជាចំណាប់ខ្មាំង ឱ្យដោះលែងចំណាប់ខ្មាំងទាំងនោះជាបន្ទាន់ដោយគ្មានលក្ខខណ្ឌ។ លោកក៏បានជំរុញផងដែរឱ្យអ៊ីស្រាអែលអនុញ្ញាតឱ្យមានការបញ្ជូនជំនួយនិងបុគ្គលិកមនុស្សធម៌ចូលទៅកាន់តំបន់ Gaza ដោយគ្មានការរារាំង។
លោក Netanyahu បានសន្យាកាលពីថ្ងៃអាទិត្យនៅក្នុងការ «កម្ទេចក្រុមហាម៉ាស់» ស្របពេលដែលទាហានអ៊ីស្រាអែល ៣០០.០០០ នាក់បានប្រមូលផ្ដុំគ្នានៅព្រំដែនជាប់តំបន់ Gaza មុនពេលធ្វើប្រតិបត្តិការតាមផ្លូវគោកដែលគ្រោងទុកមួយដើម្បីស្វែងរកនិងវាយប្រហារក្រុមសកម្មប្រយុទ្ធហាម៉ាស់។
បន្ទាប់ពីមានការវាយប្រហារឆ្លងព្រំដែនជាច្រើនលើកនៅភាគខាងជើងប្រទេសអ៊ីស្រាអែលដែលធ្វើឡើងដោយក្រុមសកម្មប្រយុទ្ធ Hezbollah នៅក្នុងប្រទេសលីបង់មក អ៊ីស្រាអែលបានប្រកាសនៅថ្ងៃចន្ទនេះអំពីការជម្លៀសពលរដ្ឋចេញពីភូមិចំនួន ២៨ នៅក្នុងរង្វង់ ២ គីឡូម៉ែត្រពីព្រំដែន៕
ព័ត៌មានខ្លះសម្រាប់សេចក្ដីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន AP ទីភ្នាក់ងារសារព័ត៌មាន AFP និងទីភ្នាក់ងារសារព័ត៌មាន Reuters។
