កងកម្លាំងអ៊ីស្រាអែលបានធ្វើការវាយឆ្មក់ដ៏ប្រល័យមួយនៅថ្ងៃអង្គារនេះ ទៅលើតំបន់ត្រួតត្រា West Bank និងបានប្រយុទ្ធជាមួយក្រុមយុទ្ធជនហាម៉ាស់នៅក្នុងតំបន់ហ្កាហ្សាភាគខាងត្បូង ខណៈដែលរដ្ឋមន្ត្រីការពារជាតិ អ៊ីស្រាអែលលោក Yoav Gallant បានទាត់ចោលនូវវិធានការមួយរបស់រដ្ឋអាជ្ញាកំពូលនៃតុលាការព្រហ្មទណ្ឌអន្តរជាតិ ដែលមានបំណងចេញដីការចាប់ខ្លួនរូបលោកនិងនាយករដ្ឋមន្ត្រីអ៊ីស្រាអែល លោក Benjamin Netanyahu។
ក្រុមមន្ត្រីសុខាភិបាលប៉ាឡេស្ទីននិយាយថា ទាហានអ៊ីស្រាអែលបានសម្លាប់មនុស្ស ៧ នាក់ ក្នុងអំឡុងពេលវាយឆ្មក់ចូលទៅក្នុងទីក្រុង Jenin ក្នុងតំបន់ West Bank ដោយប្រធានមន្ទីរពេទ្យរដ្ឋាភិបាលក្រុង Jenin និយាយថា ក្នុងចំណោមអ្នកស្លាប់ទាំងនោះ មានម្នាក់ជាវេជ្ជបណ្ឌិតវះកាត់ផងដែរ។
កងយោធាអ៊ីស្រាអែលបានរាយការណ៍ពីប្រតិបត្តិការ តាមប្រមាញ់មួយទៅលើក្រុមសកម្មប្រយុទ្ធ និងថា កម្លាំងរបស់ខ្លួនបានបាញ់ទៅលើក្រុមយុទ្ធជនមួយចំនួន។
ទាហានថ្មើរជើងអ៊ីស្រាអែលនិងយន្តហោះបានចូលរួមក្នុងការប្រយុទ្ធក្នុងទីក្រុង Rafah ក្នុងតំបន់ហ្កាហ្សាភាគខាងត្បូង ខណៈទាហានអ៊ីស្រាអែលមួយចំនួនទៀត បានប្រយុទ្ធជាមួយក្រុមហាម៉ាស់នៅក្នុងតំបន់ហ្កាហ្សាភាគខាងជើងនិងកណ្តាល។ នេះបើតាមការឱ្យដឹងរបស់ក្រុមយោធាអ៊ីស្រាអែល។
លោក Gallant បានចេញសេចក្តីថ្លែងការណ៍មួយនៅថ្ងៃអង្គារនេះ ដោយហៅការសុំឱ្យចេញដីកាចាប់ខ្លួនពីតុលាការព្រហ្មទណ្ឌអន្តរជាតិ សម្រាប់រូបលោកនិងនាយករដ្ឋមន្ត្រីអ៊ីស្រាអែល លោកNetanyahu ថាជារឿងគួឱ្យ «ខ្មាសអៀន»។
រដ្ឋអាជ្ញាតុលាការព្រហ្មទណ្ឌអន្តរជាតិ លោក Karim Khan បានប្រកាសកាលពីថ្ងៃចន្ទថា លោកកំពុងស្វះស្វែងដើម្បីចេញដីកាចាប់ខ្លួន សម្រាប់លោក Netanyahu និងលោក Gallant ក៏ដូចជាមេដឹកនាំក្រុមហាម៉ាស់ ៣ នាក់ ក្នុងតំបន់ហ្កាហ្សាផងដែរ ពីបទឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិ ដែលពាក់ព័ន្ធនឹងសង្គ្រាមអ៊ីស្រាអែលនិងក្រុមហាម៉ាស់។
លោក Netanyahu បាននិយាយកាលពីថ្ងៃចន្ទថា ទង្វើរបស់រដ្ឋអាជ្ញារូបនេះ ជាទង្វើ«ខ្វះសីលធម៌ដ៏ធំមួយ»។
ប្រធានាធិបតីសហរដ្ឋអាមេរិក លោក Joe Bidenបា នរិះគន់លើអ្វីដែលលោកហៅថា ជាការសម្រេចរបស់រដ្ឋអាជ្ញាតុលាការព្រហ្មទណ្ឌអន្តរជាតិ ដែលចាត់ទុកពីភាពស្មើគ្នារវាងការវាយប្រហារនិងការចាប់ចំណាប់ខ្មាំងរបស់របស់ក្រុមភេរវករហាម៉ាស់នៅក្នុងតំបន់ភាគខាងត្បូងអ៊ីស្រាអែល និងប្រតិបត្តិការយោធារបស់អ៊ីស្រាអែលក្នុងតំបន់ហ្កាហ្សា៕
ព័ត៌មានខ្លះក្នុងអត្ថបទនេះត្រូវបានស្រង់ចេញពីទីភ្នាក់ងារសារព័ត៌មាន The Associated Press Agence France-Presse និងទីភ្នាក់ងារសារព័ត៌មាន Reuters។
វេទិកាបញ្ចេញមតិ