នៅថ្ងៃពុធនេះ ក្រុមពួកតាលីបង់នៅក្នុងប្រទេសប៉ាគីស្ថានដែលមានឈ្មោះថា Tehreek-i-Taliban ឬហៅកាត់ថា TTP បានបញ្ជាក់អំពីការស្លាប់របស់លោក Umar Mansoor ដែលជាមេដឹកនាំកំពូលមួយរូបរបស់ខ្លួន និងជាអ្នកដែលរងការចោទប្រកាន់ថាមានការទទួលខុសត្រូវចំពោះការវាយប្រហារដ៏ប្រល័យជាច្រើនដែលបានធ្វើឡើងនៅក្នុងប្រទេសប៉ាគីស្ថាន។
លោក Mansoor ត្រូវបានគេរាយការណ៍ថាជាមេគំនិតនៅពីក្រោយការសម្លាប់រង្គាលឆ្នាំ ២០១៤ នៅសាលាយោធារដ្ឋក្នុងទីក្រុង Peshawar ប្រទេសប៉ាគីស្ថាន ដែលបានសម្លាប់មនុស្សអស់ជាង ១៤០ នាក់ ដែលភាគច្រើននៃអ្នកទាំងនោះជាកុមារ។
សេចក្ដីប្រកាសរបស់ក្រុម TTP នេះដែលបានផ្ញើតាមអ៊ីម៉ែលទៅកាន់ប្រព័ន្ធផ្សព្វផ្សាយប៉ាគីស្ថាន បានបញ្ជាក់ថា៖ «យើងបញ្ជាក់ថា លោកមេដឹកនាំ Umar Mansoor បានស្លាប់ហើយ ហើយយើងប្រកាសថា លោកមេដឹកនាំ Usman Mansoor Hafizullah នឹងឡើងកាន់តំណែងបន្តជាមេបញ្ជាការក្រុម TTP ប្រចាំក្រុង Darra Adam Khel និងក្រុង Peshawar។
សេចក្ដីប្រកាសនោះមិនបានបញ្ជាក់ឲ្យបានលំអិតបន្ថែមទៀតថាតើមេដឹកនាំរបស់ក្រុម TTP នេះ ត្រូវបានសម្លាប់ដោយរបៀបណា និងក្នុងស្ថានការណ៍ណានោះទេ។
ប៉ុន្តែ ប្រព័ន្ធផ្សព្វផ្សាយរបស់ប៉ាគីស្ថានបានរាយការណ៍ថា មេដឹកនាំរបស់ក្រុម TTP នេះ ត្រូវបានសម្លាប់នៅក្នុងការវាយប្រហារដោយយន្តហោះគ្មានមនុស្សបើករបស់សហរដ្ឋអាមេរិក។ នៅក្នុងរយៈពេលប៉ុន្មានសប្ដាហ៍ចុងក្រោយនេះ មានការវាយប្រហារដោយយន្តហោះគ្មានមនុស្សបើកពីរលើកប្រឆាំងនឹងពួកសកម្មប្រយុទ្ធនៅតំបន់តាមព្រំដែនរវាងប្រទេសអាហ្វហ្គានីស្ថាន និងប្រទេសប៉ាគីស្ថាន ដែលការវាយប្រហារនេះត្រូវបានគេរាយការណ៍មកថា បានសម្លាប់ពួកសកម្មប្រយុទ្ធចំនួន ៣១ នាក់ ដែលក្នុងនោះមានទាំងមេដឹកនាំក្រុម TTP លោក Umar Mansoor ផងដែរ៕
