មន្រ្តីស៊ីវិលនិងមន្ត្រីសន្តិសុខជាន់ខ្ពស់ក្នុងប្រទេសប៉ាគីស្ថាន និយាយថា ពួកគេ «បានព្យាយាមយ៉ាងខ្លាំងក្លាក្នុងការបញ្ចុះបញ្ជូលក្រុមតាលីបង់អាហ្វហ្គានីស្ថានដើម្បីចរចាបញ្ចប់សង្គ្រាមជាមួយដៃគូជម្លោះនៅក្នុងប្រទេសអាហ្វហ្គានីស្ថាននោះ។ ក្រុមមន្ត្រីទាំងនេះក៏បានបដិសេធការចោទប្រកាន់ដែលថា រដ្ឋាភិបាលប៉ាគីស្ថានស្ថិតនៅពីក្រោយជ័យជម្នះក្នុងសមរភូមិរបស់ពួកតាលីបង់នៅក្នុងប្រទេសអាហ្វហ្គានីស្ថាន។
ក្រុមតាលីបង់បានកាន់កាប់ស្រុកនិងទីរួមខេត្តជាច្រើនកន្លែងនៅក្នុងប្រទេសអាហ្វហ្គានីស្ថានហើយកំពុងរុលទៅមុខក្នុងការកាន់កាប់ទីតាំងជាច្រើនផ្សេងទៀតចាប់តាំងពីដើមខែឧសភាមក ខណៈពេលដែលសហរដ្ឋអាមេរិកនិងសម្ព័ន្ធមិត្តអង្គការអូតង់បានចាប់ផ្តើមដកកងទ័ពរបស់ខ្លួនដែលនៅសល់ចុងក្រោយចេញពីប្រទេសដែលហែកហួរដោយសង្រ្គាមអស់រយៈពេល២០ឆ្នាំនេះ។
ក្នុងករណីមួយចំនួន កងកម្លាំងសន្តិសុខនិងកងកម្លាំងការពារជាតិរបស់អាហ្វហ្គានីស្ថាន ដែលទទួលបានការបណ្តុះបណ្តាលពីកងកម្លាំងសហរដ្ឋអាមេរិកនោះបានចុះចូលឬបោះបង់ទីតាំងឈរជើងរបស់ពួកគេនៅតាមបណ្តាស្រុកនានាដើម្បីគេចចេញពីការរុលចូលមកដល់ដោយក្រុមតាលីបង់ដោយពួកគេមួយចំនួនបានរត់គេចខ្លួនទៅកាន់ប្រទេសប៉ាគីស្ថាន អ៊ីរ៉ង់និងតាហ្សីគីស្ថាន។
មន្ត្រីសន្តិសុខជាន់ខ្ពស់ប៉ាគីស្ថានមួយចំនួនបានបដិសេធនូវលទ្ធភាពដែលថា ក្រុមតាលីបង់និងដណ្តើមកាន់កាប់រដ្ឋធានីកាប៊ុលដោយពួកគេលើកឡើងនៅក្នុងកិច្ចប្រជុំមួយថាកងកម្លាំងសន្តិសុខរបស់អាហ្វហ្គានីស្ថាន «មានការហ្វឹកហាត់ល្អជាង» និង«មានឧបករណ៍ទំនើបជាងក្រុមតាលីបង់ដែលអាចរារាំងពួកគេមិនអោយដណ្តើមយករដ្ឋធានីកាប៊ុលបាន។
ប្រធានាធិបតីអាហ្វហ្គានីស្ថានលោក Ashraf Ghani បាននិយាយកាលពីខែមុនថាកងទ័ពប្រយុទ្ធ jihadi (ជីហាត) ចំនួន១ម៉ឺននាក់កាលពីពេលថ្មីៗនេះបានចូលទៅក្នុងប្រទេសប៉ាគីស្ថាននិងកន្លែងដទៃទៀតដើម្បីចូលរួមជាមួយក្រុមតាលីបង់ក្នុងការប្រយុទ្ធប្រឆាំងនឹងកងកម្លាំងសន្តិសុខជាតិរបស់លោកក្នុងប្រទេសអាហ្វហ្គានីស្ថាន។
បេសកជនពិសេសអាមេរិកទទូលបន្ទុកការបង្រួបបង្រួមជាតិក្នុងប្រទេសអាហ្វហ្គានីស្ថានលោក Zalmay Khalilzad ដែលបានចូលរួមចរចារផែនការសន្តិភាពដ៏សំខាន់ជាមួយក្រុមតាលីបង់នោះបានលើកឡើងកាលពីសប្តាហ៍មុនថា កងកម្លាំងអាហ្វហ្គានីស្ថាន«គួធ្វើការងារបានល្អប្រសើរជាងអ្វីដែលគេកំពុងធ្វើ» ក្នុងការប្រយុទ្ធប្រឆាំងជាមួយក្រុមបះបោរនោះ។
លោក Khalilzad បានថ្លែងប្រាប់វីអូអេថា៖ «យើងបន្តគាំទ្រកងកម្លាំងសន្តិសុខរបស់អាហ្វហ្គានីស្ថាន» ហើយយើងបេ្តជ្ញាចិត្តក្នុងការគាំទ្រកម្លាំងនេះឲ្យបានល្អក្នុងពេលអនាគត»៕
