ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

អាមេរិក​ថា អាហ្វហ្គានីស្ថាន​នឹង​ក្លាយ​ជា«រដ្ឋ​ឥត​បាន​ការ» ប្រសិន​បើ​ក្រុម​តាលីបង់​ដណ្ដើម​អំណាច​បាន


រដ្ឋមន្ត្រី​ការបរទេស​សហរដ្ឋ​អាមេរិក លោក Antony Blinken ចូលរួម​ថ្លែង​សុន្ទរកថា​រួម​គ្នា​ជាមួយ​រដ្ឋមន្ត្រី​ការបរទេស​ឥណ្ឌា​នៅ​ទីក្រុង​ញូវដែលី ប្រទេស​ឥណ្ឌា ថ្ងៃទី២៨ ខែកក្កដា ឆ្នាំ២០២១។
រដ្ឋមន្ត្រី​ការបរទេស​សហរដ្ឋ​អាមេរិក លោក Antony Blinken ចូលរួម​ថ្លែង​សុន្ទរកថា​រួម​គ្នា​ជាមួយ​រដ្ឋមន្ត្រី​ការបរទេស​ឥណ្ឌា​នៅ​ទីក្រុង​ញូវដែលី ប្រទេស​ឥណ្ឌា ថ្ងៃទី២៨ ខែកក្កដា ឆ្នាំ២០២១។

អាហ្វហ្គានីស្ថាន​នឹង​ក្លាយ​ជា«រដ្ឋ​ឥត​បាន​ការ»ប្រសិន​បើ​ក្រុម​តាលីបង់​ដណ្ដើម​អំណាច ​ដោយ​ប្រើ​កម្លាំង​បាន។ នេះ​បើ​តាម​ការ​បញ្ជាក់​របស់​លោក Antony Blinken រដ្ឋមន្ត្រី​ការបរទេស​សហរដ្ឋ​អាមេរិក​កាល​ពី​ថ្ងៃ​ពុធ។ លោកBlinken ថ្លែង​ដូច្នេះ ស្រប​ពេល​ដែល​ប្រតិភូ​ជាន់ខ្ពស់​មួយ​ក្រុម​មក​ពី​ក្រុម​តាលីបង់​បាន​ធ្វើ​ទស្សនកិច្ច​ទៅ​កាន់​ប្រទេស​ចិន​ដើម្បី​ធានា​ដល់​ក្រុម​មន្ត្រី​ចិន​នូវ​កាតព្វកិច្ច​ជា​អន្តរជាតិ​របស់​ពួកគេ។ នេះ​បើ​យោង​តាម​សេចក្ដីរាយការណ៍​របស់​ទីភ្នាក់ងារ​ព័ត៌មាន AFP។

នៅ​ក្នុង​ប្រទេស​ចិន មេដឹកនាំ​ក្រុម​តាលីបង់​បាន​ធានា​ដល់​រដ្ឋាភិបាល​ក្រុង​ប៉េកាំង​ថា ក្រុម​របស់​ខ្លួន​នឹង​មិន​អនុញ្ញាត​ឲ្យ​អាហ្វហ្គានីស្ថាន​ត្រូវ​បាន​ប្រើប្រាស់​ជា​មូលដ្ឋាន​សម្រាប់​រៀបចំ​ផែនការ​ប្រឆាំង​នឹង​ប្រទេស​មួយ​ផ្សេង​ទៀតនោះ​ទេ។

គណៈប្រតិភូ​មួយ​ក្រុម​ដោយ​រួម​មាន​ទាំង​សហ​ស្ថាបនិក​ក្រុម​តាលីបង់​លោក Mullah Abdul Ghani Baradar ផង​នោះ កំពុង​ស្ថិត​នៅ​ក្នុង​ប្រទេស​ចិន​ដើម្បី​ចូលរួម​ក្នុង​កិច្ច ប្រជុំ​មួយ​ចំនួន ខណៈ​ដែល​ក្រុម​ឧទ្ទាម​នេះ​បន្ដ​ប្រតិបត្តិការ​ប្រយុទ្ធ​នៅ​ទូទាំង​ប្រទេស​អាហ្វហ្គានីស្ថាន ដោយ​រួម​មាន​ទាំង​តំបន់​មួយ​ចំនួន​ដែល​មាន​ព្រំដែន​រួម​គ្នា​ផង​ដែរ។ ​

ព្រំដែន​រវាង​ប្រទេស​អាហ្វហ្គានីស្ថាន​និង​ប្រទេស​ចិន​មាន​ប្រវែង​ត្រឹម​តែ ៧៦ គីឡូម៉ែត្រតែ​ប៉ុណ្ណោះ ហើយ​ពុំ​មាន​ផ្លូវ​ថ្នល់​សម្រាប់​ឆ្លង​កាត់​គ្នា​បាន​នោះ​ទេ ប៉ុន្តែ​រដ្ឋាភិបាល​ក្រុង​ប៉េកាំង​ភ័យខ្លាច​ថា ប្រទេស​អាហ្វហ្គានីស្ថាន​អាច​នឹង​ត្រូវ​បាន​ប្រើប្រាស់​ជា​មូលដ្ឋាន​មួយ​សម្រាប់​ក្រុម​ផ្ដាច់ខ្លួន Uyghur នៅ​ក្នុង​តំបន់ Xinjiang ប្រទេស​ចិន។

អ្នកនាំពាក្យ​ក្រុម​តាលីបង់ លោក Mohammad Naeem បាន​ប្រាប់​ទីភ្នាក់ងារ​ព័ត៌មាន​ AFP ថា ក្ដី​បារម្ភ​ទាំង​នោះ​ពុំ​មាន​មូលដ្ឋាន​ច្បាស់លាស់​នោះ​ទេ៕

XS
SM
MD
LG