ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

គណបក្ស​កាន់​អំណាច​ប៉ាគីស្ថាន​ជ្រើសរើស​អ្នក​កាន់​តំណែង​បន្ត​​បណ្តោះ​អាសន្ន​បន្ទាប់​ពី​នាយក​រដ្ឋមន្ត្រី ​Sharif​ ​ត្រូវ​ដកចេញ​ពី​តំណែង


នាយក​រដ្ឋ​មន្ត្រី​ប៉ាគីស្ថាន Nawaz Sharif ដែល​ត្រូវ​បាន​គេ​បណ្តេញ​ចេញ​ពី​តំណែង​បាន​ថ្លែង​ទៅ​កាន់​សមាជិក​បក្ស​របស់​លោក​ នៅ​ទីក្រុង​អ៊ីស្ថាម៉ាបាដ កាល​ពី​ថ្ងៃទី​២៩ ខែ​កក្កដា ២០១៧។
នាយក​រដ្ឋ​មន្ត្រី​ប៉ាគីស្ថាន Nawaz Sharif ដែល​ត្រូវ​បាន​គេ​បណ្តេញ​ចេញ​ពី​តំណែង​បាន​ថ្លែង​ទៅ​កាន់​សមាជិក​បក្ស​របស់​លោក​ នៅ​ទីក្រុង​អ៊ីស្ថាម៉ាបាដ កាល​ពី​ថ្ងៃទី​២៩ ខែ​កក្កដា ២០១៧។

គណបក្ស​កាន់​អំណាច​នៅ​ប៉ាគីស្ថាន​បាន​តែង​តាំង​មេដឹកនាំ​ប្រទេស​បណ្តោះ​អាសន្នម្នាក់ ដែល​បាន​បង្ក​ឲ្យ​មាន​ការ​មិន​ពេញចិត្ត​ពី​គណបក្ស​ប្រឆាំង។ ការ​តែងតាំង​នេះ​ត្រូវ​បាន​ធ្វើ​ឡើង​មួយ​ថ្ងៃ​បន្ទាប់​ពី​លោក​នាយករដ្ឋមន្ត្រី​ Nawaz Sharif ​ត្រូវ​បាន​តុលាការ​កំពូល​ដក​ចេញ​ពី​តំណែង​ចំពោះ​ការ​លាក់​បាំង​ទ្រព្យសម្បត្តិ​របស់​លោក។ ​

លោក ​Sharif វ័យ​៦៧ឆ្នាំ បាន​ធ្វើ​ជា​ប្រធាន​កិច្ចប្រជុំ​បន្ទាន់​មួយ​កាល​ពី​ថ្ងៃ​សៅរ៍ ជាមួយ​នឹង​គណបក្ស​សម្ព័ន្ធ​មូស្លីម​ប៉ាគីស្ថាន​របស់​លោក នៅ​ក្នុង​ទីក្រុង​អ៊ីស្លាម៉ាបាដ​ ទី​ដែល​មេដឹកនាំ​នានា​បាន​ជ្រើសតាំង​អតីត​រដ្ឋមន្ត្រី​ប្រេង ​គឺ​លោក ​Shahid Khaqan Abbasi ឲ្យ​ដឹកនាំ​បន្ត​ពី​លោក​ក្នុង​រយៈ​ពេល​៤៥​ថ្ងៃ។ លោក Abbasi នៅ​តែ​ត្រូវ​ទទួល​បាន​ការ​បោះឆ្នោត​ទុកចិត្ត​ពី​សភា​ជា​មុន​សិន មុន​នឹង​ចូល​កាន់​តំណែង​បាន។

ប្រធានាធិបតី​ប៉ាគីស្ថាន ​លោក ​Mamnoon Hussain ​បាន​កោះ​ឲ្យ​មាន​ការ​ប្រជុំ​ពិសេស​មួយ​នៅ​រដ្ឋសភាជាតិ​នៅ​ថ្ងៃ​អង្គារ ដើម្បី​បោះឆ្នោត​ជ្រើសរើស​នាយករដ្ឋមន្ត្រី​ថ្មី​នៅ​ក្នុង​រដ្ឋសភា​ដែល​គណបក្ស​របស់​លោក ​Sharif​ មាន​សំឡេង​ភាគច្រើន។​

​បណ្តា​មេដឹកនាំ​គណបក្ស​ក៏​បាន​សម្រេច​នៅ​ក្នុង​កិច្ចប្រជុំ​នេះ​ថា ប្អូន​ប្រុស​របស់​លោក Sharif គឺ​លោក Shahbaz Sharif នឹង​ឈរ​ឈ្មោះ​នៅ​ក្នុង​ការ​បោះឆ្នោត​សភា​មួយ សម្រាប់​កៅអី​ដែល​នៅ​ទំនេរ​របស់​លោក​នាយករដ្ឋមន្ត្រី​ដែល​ត្រូវ​ដក​ចេញ​ពី​តំណែង​រូបនេះ ដូច្នេះ​លោក Shahbaz Sharif ​អាច​ក្លាយ​ទៅ​ជា​សមាជិក​សភា​ជាតិ​ហើយ​និង​អាច​កាន់​តំណែង​ជា​នាយករដ្ឋមន្ត្រី​ប៉ាគីស្ថាន​ជា​អចិន្ត្រៃយ៍​ផង​ដែរ។ នេះ​បើ​យោង​តាម​ការ​ប្រកាស​របស់​ក្រុមមន្ត្រី៕

XS
SM
MD
LG