ពួកអ្នកហែក្បួនធម្មយាត្រារាប់រយនាក់កាលពីថ្ងៃសៅរ៍មកពីសហគមន៍ជនជាតិភាគតិច Sikh របស់ឥណ្ឌា បានឆ្លងព្រំដែនអន្តរជាតិជាមួយប្រទេសប៉ាគីស្ថានដោយមិនមានទិដ្ឋាការដែលជាលើកទី១ក្នុងរយៈពេល៧២ឆ្នាំ ដើម្បីគោរពទីកន្លែងពិសិដ្ឋរបស់ពួកគេ។
កិច្ចសហប្រតិបត្តិការដ៏កម្រនេះដើម្បីសម្របសម្រួលការធ្វើដំណើរខាងសាសនាកើតមានឡើងនៅពេលដែលមានការធ្លាក់ចុះយ៉ាងខ្លាំងនៅក្នុងចំណងទាក់ទងដ៏តានតឹងរវាងប្រទេសដែលមានអាវុធនុយក្លេអ៊ែរទាំង២ដែលបណ្តាលមកពីសកម្មភាពកាលពីពេលថ្មីៗនេះរបស់ឥណ្ឌានៅក្នុងតំបន់ Kashmir ដែលមានជម្លោះ។ ទាំងឥណ្ឌានិងប៉ាគីស្ថានបានត្រួតត្រាផ្នែកនានានៃតំបន់ហេមពាន្តហើយទាមទារតំបន់នោះរៀងៗខ្លួន។
ធម្មយាត្រាឥណ្ឌា រួមមានពួកអ្នកនយោបាយនិងមន្រ្តីជាន់ខ្ពស់ បានធ្វើដំណើរកាត់តាមច្រករបៀងព្រំដែនដែលមានប្រវែង៤,១គីឡូម៉ែត្រដែលទើបបង្កើតថ្មីហើយបានធ្វើដំណើរត្រង់ទៅកាន់ទីសក្ការៈបូជានៅក្នុងទីក្រុង Kartarpur នៅក្នុងខេត្ត Punjab។
ទីសក្ការៈបូជា Gurwara Sahib ជាវត្តមួយដែលត្រូវបានគេជឿជាក់ថា បានស្ថាបនានៅលើទីកន្លែងដែល Guru Nanak អ្នកបង្កើតលទ្ធិ Sikh បានចំណាយពេល១៨ឆ្នាំនៃជីវិតរបស់លោកមុនពេលលោកបានស្លាប់នៅទីនោះនៅក្នុងសតវត្សរ៍ទី១៦។
នាយករដ្ឋមន្រ្តីប៉ាគីស្ថានលោក Iran Khan បានសម្ភោធរបៀងព្រំដែននោះ ស្របនឹងខួបកំណើតទីទី៥៥០ឆ្នាំរបស់ Guru Nanak។
លោកនាយករដ្ឋមន្រ្តីប៉ាគីស្ថាននិយាយថា៖ «ខ្ញុំសូមស្វាគមន៍អស់លោកអ្នក ហើយខ្ញុំមានការសប្បាយរីករាយដែលបានស្ថិតនៅទីនេះជាមួយអស់លោក អ្នកដែលបានឃើញមនុស្សលើកទី១ដែលឆ្លងកាត់ពីប្រទេសឥណ្ឌាតាមរបៀងព្រំដែនដើម្បីគោរពទីកន្លែងសក្ការៈបូជានេះ»៕
