ប្រជាជនអាហ្វហ្គានីស្ថានជាង ៦០០ នាក់ ដែលមានទាំងបុរស ស្ត្រី និងកុមារ បានប្រជ្រៀតគ្នាជិះយន្ដហោះយោធារបស់សហរដ្ឋអាមេរិកចាកចេញពីរដ្ឋធានីកាប៊ុល ប្រទេសអាហ្វហ្គានីស្ថាន បន្ទាប់ពីរដ្ឋធានីនេះត្រូវបានដណ្ដើមគ្រប់គ្រងទាំងស្រុងដោយក្រុមតាលីបង់។ នេះបើតាមសេចក្ដីរាយការណ៍របស់ទីភ្នាក់ងារព័ត៌មាន Reuters។
មន្ត្រីសហរដ្ឋអាមេរិកម្នាក់បានប្រាប់ទីភ្នាក់ងារព័ត៌មាន Reuters ថា មនុស្សប្រហែល ៦៤០ នាក់បាននាំគ្នាប្រវេប្រវាតោងឡើងយន្ដហោះចាកចេញពីរដ្ឋធានីកាប៊ុល នៅពេលដែលមនុស្សរាប់ពាន់នាក់ផ្សេងទៀត ដែលចង់ភៀសខ្លួនចេញពីប្រទេសអាហ្វហ្គានីស្ថានដែរនោះ បាននាំគ្នាសម្រុកទៅកកកុញនៅអាកាសយានដ្ឋានអន្តរជាតិរបស់អាហ្វហ្គានីស្ថាន ក្នុងរដ្ឋធានីកាប៊ុលនោះ។
មន្ត្រីរូបនោះបានឱ្យដឹងថា៖ «ចំនួនអ្នកដំណើរខ្ពស់ខុសពីធម្មតានេះគឺដោយសារតែការប្រែប្រួលផ្នែកសន្ដិសុខយ៉ាងឆាប់រហ័ស ដែលតម្រូវឱ្យក្រុមការងារលើយន្ដហោះនោះសម្រេចចិត្តភ្លាមៗ ដើម្បីធានាថា អ្នកដំណើរទាំងនោះត្រូវបានបញ្ជូនចេញប្រទេស [អាហ្វហ្គានីស្ថាន] ភ្លាមៗ»។
ក្រុមហ៊ុនផលិតយន្ដហោះប៊ូអ៊ីង (Boeing) បានឱ្យដឹងថា យន្ដហោះរបស់ខ្លួនប្រភេទ C-17 Globemaster III នេះ ជាទូទៅអាចដឹកអ្នកដំណើរបានត្រឹមតែ ១៣៤ នាក់ប៉ុណ្ណោះ ដោយមានកៅអីអង្គុយសងខាងសម្រាប់អ្នកដំណើរចំនួន ៥៤ នាក់ និងអាចឱ្យអ្នកដំណើរអង្គុយលើកម្រាលបានចំនួន ៨០ នាក់ទៀត៕
