ប្រទេសចិនបានអនុញ្ញាតឲ្យឯកអគ្គរដ្ឋទូតកាណាដាជួបជាមួយនឹងពលរដ្ឋកាណាដាទីពីរ ដែលត្រូវបានដាក់ឃុំក្រោមហេតុផលដែលនៅមិនទាន់ច្បាស់នៅឡើយ។ នេះបើតាមការបញ្ជាក់របស់ក្រសួងការបរទេសកាណាដា។
ឯកអគ្គរដ្ឋទូតកាណាដាលោក John McCallum បាននិយាយជាមួយនឹងពាណិជ្ជករកាណាដាលោក Michael Spavor កាលពីថ្ងៃអាទិត្យម្សិលមិញ គឺក្នុងរយៈពេល ២ ថ្ងៃក្រោយមក បន្ទាប់ពីលោកបានជួបជាមួយនឹងអតីតមន្ត្រីការទូតលោក Michael Kovrig ដែលជាពលរដ្ឋកាណាដាម្នាក់ទៀតដែលត្រូវរដ្ឋាភិបាលចិនចាប់ដាក់ឃុំដែរ។
សេចក្ដីប្រកាសរបស់ក្រសួងការបរទេសកាណាដាបានបញ្ជាក់កាលពីថ្ងៃអាទិត្យម្សិលមិញថា លោក John McCallum នឹងបន្តផ្ដល់សេវាផ្នែកកុងស៊ុលដល់លោក Spavor និងស្វែងរកវិធីបន្ថែមទៀតដើម្បីជួបលោក។
រដ្ឋាភិបាលចិនបានឃុំឃាំងលោក Spavor និងលោក Kovrig បន្ទាប់ពីប៉ូលិសកាណាដាបានចាប់ខ្លួនអ្នកស្រី Meng Wanzhou ប្រធានផ្នែកហិរញ្ញវត្ថុក្រុមហ៊ុន Huawei របស់ចិន កាលពីដើមខែនេះនៅក្នុងទីក្រុង Vancouver ប្រទេសកាណាដា តាមសំណើរបស់សហរដ្ឋអាមេរិក។
អ្នកស្រី Meng Wanzhou ឥឡូវនេះត្រូវបានតុលាការដោះលែងឲ្យនៅក្រៅឃុំ រង់ចាំលទ្ធភាពដែលអាចត្រូវធ្វើបត្យាប័នបញ្ជូនទៅកាន់សហរដ្ឋអាមេរិក ក្រោមបទចោទប្រកាន់ថាបានរំលោភលើការដាក់ទណ្ឌកម្មរបស់អាមេរិកលើប្រទេសអ៊ីរ៉ង់។
ប្រទេសកាណាដាបានបដិសេធថា ការចាប់ខ្លួនអ្នកស្រី Meng Wanzhou មិនមែនជារឿងនយោបាយនោះទេ ប៉ុន្តែគឺជាកិច្ចការផ្លូវតុលាការពិតប្រាកដ និងជាករណីដែលខ្លួនបំពេញតាមកាតព្វកិច្ចរបស់ខ្លួនដែលព្រមព្រៀងជាមួយនឹងសហរដ្ឋអាមេរិក៕
