ការប្រឆាំងចម្បងទៅនឹងជ័យជម្នះរបស់លោក Bola Tinubu ក្នុងការបោះឆ្នោតប្រធានាធិបតីកាលពីខែកុម្ភៈកន្លងទៅក្នុងប្រទេសនីហ្សេរីយ៉ា ត្រូវបានធ្វើឡើងដោយគូប្រជែងរបស់លោក គឺ លោក Atiku Abubakar នៃគណបក្សប្រជាធិបតេយ្យប្រជាជន ឬ PDP និងលោក Peter Obi នៃគណបក្សការងារ។
នៅក្នុងសេចក្តីថ្លែងការណ៍ដាច់ដោយឡែកពីគ្នាកាលពីថ្ងៃទី៦ ខែកញ្ញាកន្លងទៅ គណបក្សទាំងពីរបានច្រានចោលសេចក្តីសម្រេចរបស់តុលាការដែលបញ្ជាក់ថា លោក Tinubu បានទទួលជ័យជម្នះក្នុងការបោះឆ្នោតនោះ។ គណបក្សការងារលើកឡើងថា យុត្តិធម៌មិនត្រូវបានផ្តល់ឱ្យ ហើយថា ចៅក្រមបានប្រើអំណាចលើច្បាប់ដើម្បីបង្អាក់ឆន្ទៈរបស់ពលរដ្ឋនីហ្សេរីយ៉ា។
គណបក្ស PDP បានរិះគន់សេចក្តីសម្រេចនេះនិងបាននិយាយថា សាលក្រមរបស់តុលាការផ្ទុយពីក្បួនច្បាប់ជារួម និងមិនបានពិចារណាលើអង្គហេតុ និងក្រឹត្យក្រមច្បាប់នោះឡើយ។
លោក Atiku និងលោក Obi បានស្វះស្វែងជំរុញឱ្យមានការធ្វើមោឃភាពលើការជាប់ឆ្នោតរបស់លោក Tinubu ដោយលើកឡើងពីការក្លែងបន្លំ និងការប្រើអំណាចដោយចេតនាពីសំណាក់គណៈកម្មាធិការរៀបចំការបោះឆ្នោត ដើម្បីធ្វើឱ្យលទ្ធផលលម្អៀងទៅកាន់គណបក្សកាន់អំណាច។
ប៉ុន្តែអង្គចៅក្រមដែលមានប្រាំរូប បានច្រានចោលបណ្តឹងតវ៉ារបស់គណបក្សប្រឆាំង ដោយឈរលើមូលដ្ឋានថា គណបក្សប្រឆាំងខ្វះភស្តុតាងដើម្បីគាំទ្រអំណះអំណាងរបស់ខ្លួន ដែលថា ភាពមិនប្រក្រតីបានធ្វើឱ្យលម្អៀងលទ្ធផលឆ្នោត និងថា ការស្វះស្វែងរបស់គណបក្សប្រឆាំងគឺជារឿងដែលមិនអាចទៅរួច។
លោក Buchi Oneal ជាពលរដ្ឋនីហ្សេរីយ៉ាម្នាក់ ដែលរស់នៅក្នុងរដ្ឋធានីអាប៊ូហ្សា បានបង្ហាញប្រតិកម្មទៅនឹងសាលក្រមរបស់តុលការដូចនេះថា៖
«ខ្ញុំពិតជាមានការខកចិត្តខ្លាំងណាស់ ហើយមើលតាមអារម្មណ៍ទូទៅ មនុស្សមួយចំនួនក៏ខកចិត្តខ្លាំងណាស់ដែរ។ អ្នកអាចមើលតាមដងផ្លូវ តើអ្នកឃើញភាពសប្បាយរីករាយដែរឬទេ? នេះគឺបង្ហាញថា ពលរដ្ឋមានការខកចិត្តខ្លាំង»។
លោក Atiku និងលោក Obi ទទួលបានចំណាត់ថ្នាក់ទីពីរនិងទីបី រៀងៗខ្លួន ក្នុងការបោះឆ្នោតប្រធានាធិបតីក្នុងប្រទេសនីហ្សេរីយ៉ា កាលពីខែកុម្ភៈកន្លងទៅ។
តុលាការក៏បានច្រានចោលពាក្យបណ្តឹង ជុំវិញការផាកពិន័យរបស់លោក Tinubu ចំនួន ៤សែន៦ម៉ឺនដុល្លារអាមេរិកដល់រដ្ឋាភិបាលអាមេរិក ពាក់ព័ន្ធនឹងបទឧក្រិដ្ឋព្រហ្មទណ្ឌផងដែរ។
តុលាការលើកឡើងថា គណៈកម្មាធិការបោះឆ្នោតមិនមានកាតព្វកិច្ចណាមួយតាមផ្លូវច្បាប់ ក្នុងការបញ្ជូនលទ្ធផលឆ្នោតតាមប្រព័ន្ធអេត្រូនិច ដូចការអះអាងតាមញ្ញត្តិតវ៉ារបស់គណបក្សប្រឆាំងនោះទេ។
លោក Tinubuនិងគណបក្សកាន់អំណាច All Progressives Congress (APC) បានស្វាគមន៍សេចក្តីសម្រេចរបស់តុលាការ និងបានកោតសរសើរចៅក្រមចំពោះភាពម៉្មត់ចត់របស់គេ និងបានអំពាវនាវឱ្យមានការគាំទ្រឱ្យបានខ្លាំងលើសេចក្តីសម្រេចនេះ។
លោក Felix Morka លេខាផ្សព្វផ្សាយសាធារណៈរបស់គណបក្សកាន់អំណាច ថ្លែងដូចនេះថា៖
«វាច្បាស់ណាស់ដែលពួកគេនាំយកករណីមិនមានសង្ឃឹមមួយទៅកាន់តុលាការ។ អ្នកដែលបានស្តាប់សាលក្រមដឹងថា តុលាការមានភាពប្រយ័ត្នប្រយែងក្នុងការពិនិត្យទឡ្ហីករណ៍នានា និងអង្គហេតុដែលបានដាក់ជូនតុលាការ។ ប៉ុន្តែសាជាថ្មីម្តងទៀត យើងជាប្រទេសប្រជាធិបតេយ្យមួយ ហើយសិទ្ធិក្នុងការតវ៉ាទៅនឹងសេចក្តីសម្រេចរបស់តុលាការ គឺជាសិទ្ធិតាមរដ្ឋធម្មនុញ្ញ។ ដូច្នេះ ភាគីពាក់ព័ន្ធគឺមានសេរីភាពក្នុងការប្តឹងបន្តទៅកាន់តុលាការកំពូលរបស់ប្រទេស»។
កាលពីថ្ងៃទី៦ ខែកញ្ញាកន្លងទៅ ក្រុមអ្នកគាំទ្រគណបក្សប្រឆាំងបានប្រមូលផ្តុំតវ៉ានៅជិតតុលាការឧទ្ធរណ៍ ដោយព្រមានថាពួកគេនឹងធ្វើការតវ៉ាតាមដងផ្លូវ ប្រសិនបើសេចក្តីសម្រេចមិនយុត្តិធម៌។
លោក James Mikel ជា អ្នកតវ៉ាម្នាក់ក្នុងចំណោមអ្នកតវ៉ាជាច្រើនបានថ្លែងដូចនេះថា។
«យើងស្នើឱ្យតុលាការធ្វើអ្វីដែលត្រឹមត្រូវ។ ពួកមិនគួរសម្លាប់លទ្ធិប្រជាធិបតេយ្យតូចមួយ ដែលយើងមាននៅក្នុងប្រទេសនេះនោះទេ។ បើមិនដូច្នេះទេ វានឹងមានភាពអនាធិបតេយ្យ។ ខ្ញុំត្រៀមខ្លួនសម្រាប់ភាពអនាធិបតេយ្យ ហើយខ្ញុំមិនខ្លាចស្លាប់នោះទេ»។
គ្មានការប្រឆាំងតវ៉ាលទ្ធផលបោះឆ្នោតប្រធានាធិបតីណាមួយក្នុងប្រទេសនីហ្សេរីយ៉ា បានទទួលជោគជ័យឡើយ ចាប់តាំងពីឆ្នាំ១៩៩៩មក។
គណបក្សប្រឆាំងនិយាយថា ពួកគេនឹងប្តឹងសារទុក្ខនៃសាលក្រមនេះ ទៅកាន់តុលាការកំពូល ហើយមនុស្សជាច្រើនកំពុងរង់ចាំមើលថា តើក្រុមបក្សប្រឆាំងនឹងទទួលបានជោគជ័យដែរឬទេ៕
ប្រែសម្រួលដោយលោក ណឹម សុភ័ក្រ្តបញ្ញា
