ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ពេល​សហភាព​អឺរ៉ុប​ប្រកាស​កំណត់​ពន្ធលើ​អង្ករ​កម្ពុជា អតីត​មន្ត្រី​គណបក្ស​ប្រឆាំង​ត្រូវ​ចាប់​ខ្លួន


លោក គង់ ម៉ាស់ មន្ត្រីគណបក្ស​សង្គ្រោះ​ជាតិ​ពី​ស្រុក​រមាស​ហែក ខេត្ត​​ស្វាយ​រៀង ត្រូវ​បាន​ឃាត់​​ខ្លួន​កាល​ពីថ្ងៃ​ទី​​១៦ មករា ២០១៩ (រូបថត៖ ហ្វេសប៊ុក​)

អតីត​មន្ត្រី​គណបក្ស​ប្រឆាំង​ម្នាក់​នៅ​ខេត្ត​ស្វាយ​រៀង​ត្រូវ​អាជ្ញាធរ​ចាប់​ខ្លួន​កាល​ពី​ថ្ងៃ​ពុធ ដោយ​ចោទ​ថា​ ព្យាយាម​ផ្តួល​រំលំ​រដ្ឋាភិបាលក្រោយ​ពី​លោក​បង្ហោះ​សារ​រិះគន់​ថា រដ្ឋាភិបាល​មិន​បាន​យក​ចិត្ត​ទុក​ដាក់​ជួយ​ការពារ​ថ្លៃ​ផលិត​ផល​កសិករ ​សិប្បករ មិន​ជួយ​រក​ទីផ្សារ​លក់​ផលិត​ផល ​មិន​គិត​គូរ​បញ្ហា​ព្រំដែនបញ្ហា​អន្តោប្រវេសន៍​ បញ្ហា​អត់​ការងារ​ធ្វើ​នាំ​ឲ្យ​មាន​ពលករ​ចំណាក​ស្រុក ហើយថាពលរដ្ឋ​ត្រូវ​ហ៊ាន​ងើប​តវ៉ា។​

ការ​ចាប់​ខ្លួន​លោក ​គង់​ ម៉ាស​ ធ្វើ​ឡើង​ក្រោយ​ពី​លោក​រិះគន់រដ្ឋាភិបាល​ទាក់​ទង​សហភាព​អឺរ៉ុប​យក​ពន្ធ​អង្ករ​កម្ពុជា​ចូល​ទីផ្សារ​សហភាព​អឺរ៉ុប។ ទំព័រ​ហ្វេសប៊ុក​ដែល​គេជឿ​ថា ជា​គណនីរបស់​លោក​សរសេរ​ថា ​ទឹក​ទីមួយ!​សហភាព​អ៊ឺរ៉ុប​បាន​សម្រេច​ជំហាន​ដំបូង​ដាក់​ទណ្ឌកម្ម​ដោយ​ការ​យក​ពន្ធ​ជិត​២០០​ដុល្លារ​សម្រាប់​ការ​នាំអង្ករ​កម្ពុជា​មួយ​តោនចូល​ទៅ​ផ្សារ​អឺរ៉ុប។​

នៅ​ថ្ងៃ​សហភាព​អឺរ៉ុប​ចាប់​ផ្តើម​យក​ពន្ធ​អង្គរ​នេះ ​មន្ត្រីរដ្ឋាភិបាលកម្ពុជា​និង​គណបក្ស​កាន់​អំណាច​ប្រកាស​ថា ​ពន្ធគយ​របស់​សហភាព​អឺរ៉ុប​លើ​អង្ករពី​កម្ពុជា​គឺជា​«អាវុធ» ​ប្រឆាំង​នឹង​កសិករ​ក្រីក្រ​ហើយ​នឹង​ធ្វើឱ្យ​ប៉ះ​ពាល់​ដល់​ប្រជាជន​រាប់​លាន​នាក់​ដែល​កំពុង​ព្យាយាម​គេច​ចេញ​ពី​ភាពក្រីក្រ។ ​

ឆ្លើយ​តប​នឹង​ការ​ទាមទារ​របស់​ប្រទេស​អ៊ីតាលីឲ្យ​ការពារ​ទីផ្សារសហភាព​អឺរ៉ុបបាន​កំណត់​យក​ពន្ធ​អង្ករ​ពី​កម្ពុជា​និង​ភូមា​រយៈ​ពេល​បីឆ្នាំគឺ​ឆ្នាំទី១​យក​ពន្ធ​១៧៥​អឺរ៉ូ​ជិត​២០០​ដុល្លារ ​ឆ្នាំ​ទី​២​យក​១៣២​អឺរ៉ូ​ស្មើ១៥០ដុល្លារ និង​ឆ្នាំទី​៣​យក​១០៩​អឺរ៉ូ​ស្មើ​១២៥​ដុល្លារ​ក្នុង​អង្ករ​មួយ​តោន។​

មន្ត្រី​គណបក្ស​ប្រជាជន​កម្ពុជា​របស់​លោក​នាយក​រដ្ឋមន្រ្តី​ ហ៊ុន សែន​ ដែល​កំពុង​កាន់​អំណាច​និយាយ​ថា ​ការ​សម្រេច​ចិត្ត​នេះ​គឺជា​សកម្មភាព​ពាណិជ្ជ​កម្ម​រើសអើង។​ ក្រសួង​ពាណិជ្ជកម្ម​បាន​ហៅ​ការ​សម្រេច​ចិត្ត​របស់​សហ​ភាព​អឺរ៉ុប​ថា ​ជា ​«អាវុធ​សម្លាប់​ខ្មែរ»​និង​ប្រឆាំង​ច្បាប់​ពាណិជ្ជ​កម្ម​អន្តរ​ជាតិ៕

XS
SM
MD
LG