ភ្ជាប់​ទៅ​គេហទំព័រ​ទាក់ទង

លោកស្រី​មូរ សុខហួរ​៖ កម្ពុជា​គួរ​ដាក់​លក្ខខណ្ឌ​ដល់​ថៃ​ពី​បញ្ហា​ពលករខ្មែរ

  • ម៉ែន គឹមសេង

រូបឯកសារ៖ ពលករ​ចំណាកស្រុក​កម្ពុជា​រង់ចាំ​ធ្វើ​សំណុំឯកសារ នៅពេល​ដែល​ពួកគេ​ត្រូវ​ធ្វើ​ដំណើរ​ត្រឡប់​ទៅប្រទេស​កម្ពុជាវិញ ក្រោយ​ពេល​ដែល​រដ្ឋាភិបាល​ថៃ​បាន​ចាត់​វិធានការ​ទប់ស្កាត់​ការ​ធ្វើចំណាកស្រុកខុសច្បាប់​របស់​ពលករ​ចូលក្នុង​ប្រទេស​ថៃ កាលពីថ្ងៃទី១៥ ខែមិថុនា ឆ្នាំ២០១៤។

រដ្ឋាភិបាល​កម្ពុជា​ជំរុញ​ឱ្យ​ពលករ​ចំណាក​ស្រុក​ដែល​កំពុង​ធ្វើការ​នៅ​ប្រទេស​ថៃ​ដោយ​ខុស​ច្បាប់​ចុះ​ឈ្មោះ​ស្នើសុំ​ឯកសារ​យ៉ាង​យូរ​ត្រឹម​ដើម​ខែ​កញ្ញា​ខាងមុខ ​ប៉ុន្តែ​អ្នក​ជំនាញ​មើល​ឃើញ​ថា​ ពេលវេលា​ផ្តល់​ជូន​នេះ​មិន​គ្រប់គ្រាន់​ទេ​ ក្នុងការ​ដោះស្រាយ​សម្រាប់​ពលករ​ខុស​ច្បាប់​ខ្មែរ​រាប់សែន​នាក់។

ក្នុងពេល​ជាមួយ​គ្នា​នេះ​ដែរ ​អ្នក​នយោបាយ​គណបក្ស​ប្រឆាំង​បាន​ស្តី​បន្ទោស​ដល់​អំពើ​ពុក​រលួយ​ក្នុង​ស្ថាប័ន​នៃ​ប្រទេស​ថៃ​និង​កម្ពុជា ​ដែល​បង្ក​ការ​លំបាក​ដល់​ពលករ​ និង​កង្វះ​សមត្ថភាព​របស់​មន្ត្រី​ខ្មែរ​ក្នុង​ការ​ចរចា​ជាមួយ​នឹង​រដ្ឋាភិបាល​ថៃ។

លោក ហេង សួរ ​អ្នក​នាំពាក្យ​ក្រសួង​ការងារ​ បាន​បញ្ជាក់​តាម​បណ្តាញ​ហ្វេសប៊ុក​ផ្ទាល់​ខ្លួន​របស់​លោក​ កាលពី​ថ្ងៃទី​២៣ ខែ​កក្កដា​ ដោយ​ស្នើ​ឱ្យ​ពលករ​ដែល​មិនមាន​ឯកសារ​អ្វី​ទាំងអស់​ ក៏​ដូចជា​អ្នក​ដែល​ធ្លាប់​មាន​ឯកសារ ​ប៉ុន្តែ​ផ្លាស់ប្តូរ​ការងារ ​ហើយ​ក្លាយ​ទៅ​ជា​មិន​ស្រប​ច្បាប់​ក្នុង​ពេល​កន្លង​មក ​គឺ​ត្រូវ​ពន្យល់​ទៅដល់​ថៅកែ​ឱ្យ​ទៅ​ប្រកាស​ឈ្មោះ​នៅក្នុង​ការិយាល័យ​ចំនួន​៩៧កន្លែង​ ដែល​បាន​បង្កើត​ឡើង​នៅ​ទូទាំង​ប្រទេស​ថៃ​ដើម្បី​ស្នើសុំ​ឯកសារ ​បើ​មិន​ដូច្នេះ​ទេ​ថៅកែនឹង​ទទួល​រង​នូវ​ការ​ផាកពិន័យ​យ៉ាង​ធ្ងន់ធ្ងរ​ពី​ក្រសួង​ការងារ​ថៃ​។

ច្បាប់ថ្មី​របស់​ថៃ​ដែល​បាន​អនុម័ត​កាលពី​ចុងខែ​មិថុនា​ នឹង​ធ្វើការ​ពិន័យ​ពលករ​ខុស​ច្បាប់​ម្នាក់​រហូត​ដល់​៣០០០ដុល្លារ ​និង​ត្រូវជាប់​គុក​រហូត​ដល់​៥ឆ្នាំ។ រីឯ​ថៅកែ​អាច​រង​ការ​ពិន័យ​រហូត​ដល់​២៣.៥៧១ដុល្លារ ​សម្រាប់​ពលករ​ខុស​ច្បាប់​ម្នាក់។

លោក​ ហេង សួរ ​បាន​បន្ថែមទៀត​ថា៖​

«ដោយ​ឡែក​សម្រាប់​យើង​ បើសិន​ទោះបី​ជា​ថៅកែ​គាត់​មិន​ចុះ​បញ្ជី​ឈ្មោះ​យើង​នៅ​ចន្លោះ​ថ្ងៃទី​២៤ ​ខែកក្កដា​ដល់​ថ្ងៃទី​៧ ខែសីហា​ខាងមុខ​ក៏ដោយ ​ក៏​ចាប់ពី​ថ្ងៃទី​៨ ខែ​សីហា​រហូត​ដល់​ថ្ងៃទី​៩ ខែ​កញ្ញា​ក៏​យើង​អាច​បង្ហាញ​ខ្លួន​នៅ​ការិយាល័យ​ស្រង់​ទិន្នន័យ​ជនបរទេស​ទាំង​៩៧​កន្លែង​ហ្នឹង​ដែរ។ ប៉ុន្តែ​អ្វី​ដែល​ជា​ការ​ល្អ​បំផុត​ គឺ​ឱ្យ​ថៅកែ​គាត់​ទៅចុះ​ឈ្មោះ​យើង​ជាមុន​សិន​ជាមួយ​នឹង​មន្ត្រី​នៃ​ក្រសួង​ការងារ​ថៃ​ ដែល​ធ្វើការ​នៅ​ទាំង​៩៧​កន្លែង​ហ្នុង‍»។

ការ​អនុវត្ត​ច្បាប់​ការងារថ្មី​នៅ​ប្រទេសថៃ​ដែល​មាន​លក្ខណៈ​តឹងរ៉ឹង ​បាន​នាំ​ឱ្យ​ពលរដ្ឋ​ខ្មែរ​រាប់​ពាន់​នាក់​វិល​ត្រឡប់​មក​ប្រទេស​វិញ​ដោយ​ស្ម័គ្រចិត្ត ​និង​បង្ខំ​ក្នុង​ខែ​កក្កដា​នេះ។

ក្រសួង​ការងារ​បញ្ជាក់​ថា​ ពលករ​ខ្មែរ​ធ្វើការ​នៅ​ប្រទេស​ថៃ​មាន​ចំនួន​ ១.០៥០.០០០ នាក់ ក្នុងនេះ​ពលករ​ខុសច្បាប់​មាន​តែ​ជាង​៣០ម៉ឺននាក់​ទេ​ ដែល​ត្រូវ​ធ្វើ​ការ​ចុះបញ្ជី និង​ប្រគល់​ឯកសារ​រហូត​ដល់​ចុងឆ្នាំ​២០១៧​នេះ។

ប៉ុន្តែ​លោក ​ឌី ថេហូយ៉ា មន្ត្រី​កម្មវិធី​នៃ​មជ្ឈមណ្ឌល​សម្ព័ន្ធ​ភាព​ការងារ​ និង​សិទ្ធិមនុស្ស​យល់​ថា​ ពេលវេលា​ដែល​ផ្តល់​ជូននេះ​នឹង​មិន​គ្រប់គ្រាន់​ក្នុងការ​ចុះ​ឈ្មោះ​ពលករ​ខ្មែរ​ដែល​កំពុង​ធ្វើការ​ដោយ​ខុស​ច្បាប់​ទេ​ ព្រោះ​មាន​ចំនួន​ច្រើន​ជាង​តួលេខ​របស់​រដ្ឋាភិបាល។ លោក​ ហូយ៉ា បន្ថែម​ថា ​ក្នុង​ចំណោម​ពលករ​ដែល​ធ្វើ​ការ​នៅ​ប្រទេ​សថៃ​ចន្លោះពី​១,២លាន​ទៅ​១,៧លាននាក់​ គឺ​៦០​ភាគរយ​គ្មាន​ឯកសារ​ត្រឹមត្រូវ​ទេ។

លោក ហូយ៉ា​ បាន​បន្ថែម​ថា៖

«តាម​ខ្ញុំ​អង្កេត​មើល​ ខ្ញុំ​មិន​មាន​ជំនឿ​ថា​នឹង​បាន​ដោះស្រាយ​ច្រើន​ទេ​ ប្រសិន​បើ​មិន​មាន​ការ​ផ្សព្វផ្សាយ​ច្បាស់លាស់​ ហើយ​ប្រជាពលរដ្ឋ​ក៏ដូចជា​ពលករ​ចំណាក​ស្រុក​ដែល​អត់​ទទួល​បាន​ព័ត៌មាន​ និង​ទីពីរ​គឺ​មាន​ចំនួន​ច្រើន​ ហើយ​មិន​ដឹងថា​ ថៅកែ​គាត់​អាច​រត់​ទាន់ ​ឬ​មួយ​យ៉ាង​ណា​ទេ។ ប៉ុន្តែ​សម្រាប់​ខ្ញុំ​ផ្ទាល់ គឺ​មិន​អាច​គ្រប់​គ្រាន់​សម្រាប់​ពួក​គាត់​ទេ‍»។

លោកស្រី មូរ សុខហួរ ​អ្នក​តំណាងរាស្រ្ត​ និង​ជា​អនុប្រធាន​គណបក្ស​សង្គ្រោះជាតិ​លើក​ឡើង​ថា​ រដ្ឋាភិបាល​កម្ពុជា​ និង​រដ្ឋាភិបាល​ថៃ​គួរតែ​ចរចា​គ្នា​ដោយ​ឈរ​លើ​ការពិត ដែល​ពលករ​កម្ពុជា​បាន​ចូលរួម​ចំណែក​ដល់​ការ​រីក​ចម្រើន​សេដ្ឋកិច្ច​ប្រទេស​ទាំងពីរ។ លោក​ស្រី​បញ្ជាក់​ថា​ ក្នុងមួយឆ្នាំៗ​ពលករ​ចំណាក​ស្រុក​ផ្ញើប្រាក់​មក​ជួយ​គ្រួសារ​វិញ​រហូត​ដល់​១០០០លានដុល្លារ​ ដែល​ជួយ​ដល់​ការ​រីកចម្រើន​សេដ្ឋកិច្ច​កម្ពុជា​ រីឯ​ប្រទេស​ថៃ​វិញ​ក៏​ត្រូវ​ការ​ពលករ​ខ្មែរ​ធ្វើការ​ដែរ​ក្នុង​វិស័យ​ជាច្រើន ​ដូច​ជា​កសិកម្ម​ សំណង់ និង​ម្អូប​អាហារ​ជាដើម។

លោកស្រី​បន្ថែម​ថា៖

«ដូច្នេះ យើង​យល់​ឃើញ​ថា​ គួរតែ​រាជរដ្ចាភិបាល​ទាំងពីរ​ទទួល​ស្គាល់​នូវ​វិភាគទាន​ដ៏​ធំធេង​ហើយ​បញ្ចប់ទៅ​ការ​ធ្វើ​ឱ្យ​ពលករ​ចំណាកស្រុក​របស់​យើង​[រងការ​លំបាក]​ជាពិសេស​ប្រទេស​កម្ពុជា​យើង​មាន​ពលករ​ដែល​ប្រទេសថៃ​ត្រូវការ‍»។

រូបឯកសារ៖ លោកស្រី មូរ សុខហួរ តំណាងរាស្ត្រ និង​អនុប្រធាន​គណបក្ស​សង្គ្រោះ​ជាតិ ទទួល​បន្ទុក​កិច្ចការ​ស្ត្រី កុមារ និង​ពលករ​ចំណាក​ស្រុក មាន​វត្តមាន​នៅ​បន្ទប់​ផ្សាយ​ VOA នៅរដ្ឋធានី​វ៉ាស៊ីនតោន កាលពីថ្ងៃទី៦ ខែមិថុនា ឆ្នាំ២០១៦។
រូបឯកសារ៖ លោកស្រី មូរ សុខហួរ តំណាងរាស្ត្រ និង​អនុប្រធាន​គណបក្ស​សង្គ្រោះ​ជាតិ ទទួល​បន្ទុក​កិច្ចការ​ស្ត្រី កុមារ និង​ពលករ​ចំណាក​ស្រុក មាន​វត្តមាន​នៅ​បន្ទប់​ផ្សាយ​ VOA នៅរដ្ឋធានី​វ៉ាស៊ីនតោន កាលពីថ្ងៃទី៦ ខែមិថុនា ឆ្នាំ២០១៦។

លោកស្រី ​មូរ សុខហួរ ​បន្ថែម​ថា​ បញ្ហា​ធំ​គឺ​នៅ​លើ​ប្រទេស​កម្ពុជា​ដែល​គួរតែ​ដាក់​លក្ខខណ្ឌ​ទៅ​លើ​ប្រទេស​ថៃ​វិញ ដោយ​ឈរ​លើ​ច្បាប់​អន្តរជាតិ​ព្រោះ​ថៃ​មិន​គោរព​ច្បាប់​ជាតិ​ និង​កិច្ច​ព្រមព្រៀង​ទ្វេភាគី​ទេ។

លោកស្រី​បន្ថែម​ថា៖

«ខ្ញុំ​អរគុណ​ហើយ​ដែល​ក្រសួង​ការងារ​ទៅ​ចរចា​ជាមួយ​នឹង​ក្រសួង​ការងារ ​ក៏ប៉ុន្តែ​ក្នុង​ការ​ចរចា​នេះ​ យើង​ដូចជា​ទៅ​សុំ​អង្វរ​គេ​ឱ្យ​គេ​ទទួល​ពលករ​របស់​យើង ​ម៉េច​ក៏​យើង​មិន​ថា​ទៅវិញ​ថា​ ប្រទេស​ថៃ​ត្រូវ​ការ​ពលករ​ពី​ប្រទេស​កម្ពុជា​យើង‍។ យើង​ត្រូវ​ដាក់​លក្ខខណ្ឌ​ទៅវិញ​មិន​មែន​ឱ្យ​ប្រទេស​ថៃ​ដាក់​លក្ខខណ្ឌ​ ហើយ​យើង​រត់​តាម​ប្រទេស​ថៃ​ទេ»។​

លោកស្រី មូរ សុខហួរ ​ស្តីបន្ទោស​ដល់​អំពើ​ពុករលួយ​ក្នុង​ប្រព័ន្ធ​រដ្ឋាភិបាល​ខ្មែរ​និង​ថៃ និង​ការ​យឺតយ៉ាវ​ក្នុង​ការ​ផ្តល់ឯកសារ​ជូន​ពលរដ្ឋ។

ចំណែក​លោក ឌី ថេ​ហូយ៉ា​ យល់​ថា​ ការ​ការពារ​សិទ្ធិ​ពលករ​មាន​សារៈសំខាន់​ជាង​ការ​ហាម​ឃាត់​ព្រោះ​ការ​ធ្វើ​ចំណាក​ស្រុក​ គឺ​ជា​និន្នាការ​ពិភពលោក​នាពេល​បច្ចុប្បន្ន។ លោក​យល់​ថា ​ការពារ​ដែល​មាន​ប្រសិទ្ធភាព​ គឺ​កាត់បន្ថយ​ចំណាយ​លើ​ការ​សុំ​ឯកសារ​ព្រោះ​សព្វថ្ងៃ​នេះ​ពលករ​ម្នាក់​ចំណាយ​យ៉ាង​ហោចណាស់​ចំនួន​៨០០ដុល្លារ ​ដើម្បី​បាន​ទៅ​ធ្វើការ​នៅ​ស្រុក​ថៃ​ ដោយ​ស្រប​ច្បាប់​ និង​ពេលវេលា​សុំ​ឯកសារ​កុំ​ឱ្យ​យូរ​ពេក ​ដែល​អ្នក​ខ្លះ​រង់ចាំ​រហូត​ដល់​៦ខែ​ឬ​១ឆ្នាំ៕

XS
SM
MD
LG