ភ្ជាប់​ទៅ​គេហទំព័រ​ទាក់ទង

អូបាម៉ា៖ ស.រ.អា.​​នឹង​ដើរ​ចេញ​ពី​កិច្ច​ព្រមព្រៀង​ជាមួយ​អ៊ីរ៉ង​​បើ​សិនវា​នាំ​ដល់​ការ​ផលិត​អាវុធ​បរមាណូ


ប្រធានាធិតី​ បារ៉ាក់អូបាម៉ា​ ថ្លែង​ក្នុង​សន្និសីទ​កាសែត​រួមគ្នាជាមួយ​ប្រធាធិបតី​ប្រេស៊ីល​ Dilma Rousseff នៅ​សេតវិមាន​ កាលពីថ្ងៃទី៣០ ខែមិថុនា ឆ្នាំ២០១៥។

លោក​ប្រធានាធិបតី​ស.រ.អា.​បារ៉ាក់ អូបាម៉ា ​កាលពី​ថ្ងៃ​អង្គារ បាន​មាន​ប្រសាសន៍​ថា ​ស.រ.អា.​នឹង​«ដើរ​ចេញ»​ពី​លទ្ធភាព​នៃ​ការ​មាន​កិច្ចព្រមព្រៀង​បរមាណូ​មួយ​ជា​មួយ​ប្រទេស​អ៊ីរ៉ង់​ប្រសិន​បើ​លោក​មិន​ជឿ​ថា​កិច្ច​ព្រមព្រៀង​នេះ​នឹង​អាច​រារាំង​មាគារ​របស់​រដ្ឋាភិបាល​ក្រុង​តេហេរ៉ង់ ​ឆ្ពោះ​ទៅ​កាន់​ការ​ផលិត​អាវុធ​បរមាណូ​ទេ​នោះ។

លោក​អូបាម៉ា​បាន​មាន​ប្រសាសន៍​នៅ​ក្នុង​សន្និសីទ​កាសែត​មួយ​នៅ​ឯសេតវិមាន​ថា​ ប្រទេស​អ៊ីរ៉ង់​ត្រូវ​តែ​យល់ព្រមដល់​«យន្តការ​ផ្ទៀងផ្ទាត់​ខ្លាំង​និង​ហ្មត់ចត់មួយ»​ស្តីពី​ការ​កាត់​បន្ថយ​កម្មវិធី​អភិវឌ្ឍ​បរមាណូ​របស់​ខ្លួន។ ​លោក​ប្រធានាធិបតី​បាន​មាន​ប្រសាសន៍​បន្ថែម​ថា ​រដ្ឋាភិបាល​ក្រុង​តេហេរ៉ង់​ត្រូវ​តែ​ធ្វើតាម​កិច្ចព្រមព្រៀង​

ក្របខណ្ឌ​មួយ​ដែល​ខ្លួន​បាន​សម្រេច​កាលពី​ពេល​មុន​ក្នុង​ឆ្នាំ​នេះ​ ជា​មួយ​ស.រ.អា.​និង​ប្រទស​មហា​អំណាច​ពិភព​លោក​៥​ផ្សេងទៀត​ដែល​អនុញ្ញាត​ឱ្យ​ក្រុម​អធិការ​ចូល​ទៅ​មើល​កន្លែង​បរមាណូ​អ៊ីរ៉ង់​ដើម្បី​ពិនិត្យ​ផ្ទៀងផ្ទាត់​ថា ​អ៊ីរ៉ង់​ធ្វើតាម​ការ​ប្តេជ្ញា​របស់​ផង​ខ្លួន​ឬទេ។​

លោក​អូបាម៉ា​បាន​មាន​ប្រសាសន៍​ថា៖ «ការណ៍​នេះ​ស្រេច​តែ​លើ​ខាង​អ៊ីរ៉ង់ទេ»។

អត្ថាធិប្បាយ​របស់​លោក​អូបាម៉ា​មាន​ឡើង​នៅ​ពេល​ដែល​ស.រ.អា.​ ប្រទេស​អាល្លឺម៉ង់​ បារាំង​ រុស្សី​ ចិន​និង​ប្រទេស​អង់គ្លេស​បាន​បន្ត​កិច្ចចរចា​ជាមួយ​ប្រទេស​អ៊ីរ៉ង់​ក្នុង​ក្រុងវ្យែន (Vienne) ​ហួស​ពី​ថ្ងៃ​កំណត់​ចុង​ក្រោយ​បង្អស់​កាល​ពី​ថ្ងៃ​អង្គារ​សម្រាប់​ធ្វើឱ្យ​សម្រេច​កិច្ច​ព្រម​ព្រៀង​មួយ។​

ក្រសួង​ការ​បរទេស​ស.រ.អា.​បាន​និយាយ​ថា ​ពួក​អ្នក​ធ្វើការ​ចរចា​អ៊ីរ៉ង់​បាន​សម្រេច​ពន្យា​ពេល​រហូត​ដល់​ថ្ងៃ​ទី​៧​ខែ​កក្កដា​នូវ​វិធានការ​នៅ​ក្រោម​កិច្ច​ព្រមព្រៀង​បណ្តោះ​អាសន្ន​ដើម្បី«អនុញ្ញាត​ឱ្យ​មាន​ពេល​វេលាថែម​ទៀត»​សម្រាប់​កិច្ច​ចរចា​អំពី​កម្មវិធីបរមាណូ​នៃ​ប្រទេស​អ៊ីរ៉ង់​ដើម្បី​ឱ្យមាន​ដំណោះ​ស្រាយមួយ​សម្រាប់​រយៈពេល​យូរ៕

XS
SM
MD
LG