លោកប្រធានាធិបតីស.រ.អា. បារ៉ាក់ អូបាម៉ា បានមានប្រសាសន៍ថាស.រ.អា.និងប្រទេសអារ៉ាប៊ីសាអូឌីតនឹងបន្តធ្វើកិច្ចសហប្រតិបត្តិការជិតស្និទ្ធតទៅទៀតនៅក្នុងសកម្មភាពប្រឆាំងនឹងភេរវកម្មនៅក្នុងភូមិភាគមជ្ឈឹមបូព៌ា និងនៅទូទាំងពិភពលោកដោយមានរួមបញ្ចូលទាំងការប្រយុទ្ធប្រឆាំងនឹងក្រុមជនសកម្មប្រយុទ្ធរដ្ឋឥស្លាមផងដែរ។
លោកប្រធានាធិបតីបានមានប្រសាសន៍ថាស.រ.អា.មានកង្វល់ដូចប្រទេសអារ៉ាប៊ីសាអូឌីតដែរអំពីបញ្ហាក្នុងប្រទេសយេម៉ែន (Yemen) និងអំពីសេចក្តីត្រូវការឱ្យមានរដ្ឋាភិបាលមួយមានភាគីទាំងអស់ចូលរួម និងអាចមានដំណើរការបាននៅទីនោះ ហើយសហរដ្ឋអាមេរិកក៏មានកង្វល់ដូចប្រទេសអារ៉ាប៊ីសាអូឌីត ដែរអំពីវិបត្តិនៅក្នុងប្រទេសស៊ីរី។
លោកអូបាម៉ាបានធ្វើកំណត់សម្គាល់របស់លោកនៅមុនជំនួបជាមួយព្រះចៅ Salman នៃប្រទេសអារ៉ាប៊ីសាអូឌីតនៅឯសេតវិមាននៅថ្ងៃសុក្រនៅក្នុងព្រះរាជទស្សនកិច្ចលើកទីមួយរបស់ព្រះចៅអារ៉ាប់អង្គនេះក្នុងស.រ.អា.ចាប់តាំងពីពេលដែលព្រះអង្គបានឡើងសោយរាជ្យកាលពីខែមករានៅក្រោយការចូលទីវង្គតនៃព្រះចៅ Abdullah។
លោកប្រធានាធិបតីស.រ.អា.បានមានប្រសាសន៍ថា លោក និងព្រះចៅគ្រោងនឹងពិភាក្សាគ្នាអំពីការអនុវត្តកិច្ចព្រមព្រៀងបរមាណូដែលបានត្រូវធ្វើការចរចាកាលពីពេលថ្មីៗនេះដែលមានគោលដៅកាត់បន្ថយកម្មវិធីបរមាណូនៃប្រទេសអ៊ីរ៉ង់ជាថ្នូរនឹងការសម្រាលការដាក់ទណ្ឌកម្ម។ ប្រទេសអារ៉ាប៊ីសាអូឌីតមិនគាំទ្រទាំងស្រុងដល់កិច្ចព្រមព្រៀងនេះទេ ហើយយល់ឃើញថាប្រទេសអ៊ីរ៉ង់ជាគូបដិបក្ខនៅក្នុងតំបន់ផងដែរ៕
