ភ្ជាប់​ទៅ​គេហទំព័រ​ទាក់ទង

លោក​អូបាម៉ា៖​បញ្ហា​ប្រទេស​អារ៉ាប៊ី ​សាអូឌីត​និង​​យេម៉ែន​ជា​ភាព​ស្មុគស្មាញ​ថ្មី​មួយ

  • Luis Ramirez

ប្រធានាធិបតី​អាមេរិក​លោក​បារ៉ាក់ អូបាម៉ា​ និយាយថា បញ្ហា​ប្រទេស​អារ៉ាប៊ី ​សាអូឌីត​និង​​យេម៉ែន​ជា​ភាព​ស្មុគស្មាញ​ថ្មី​មួយ​នៅ​ក្នុង​ការ​ប្រយុទ្ធ​ជាមួយ​ក្រុម​រដ្ឋ​ឥស្លាម​។

ការ​ចូល​ទីវង្គត់​របស់​ព្រះ​មហាក្សត្រ​ Abdullah​ នៃ​ប្រទេស​អារ៉ាប់ប៊ី ​សាអូឌីត​ ​និង​ការ​ដួល​រលំ​នៃ​រដ្ឋាភិបាល​នៃ​ប្រទេស​យេម៉ែន ​បាន​ធ្វើ​ឲ្យ​មាន​ភាព​មិន​ប្រាកដ​ប្រជា​បន្ថែម​ទៀត​ដល់​កិច្ច​ខំ​ប្រឹងប្រែង​របស់​សហ​រដ្ឋអាមេរិក​ដើម្បី​ប្រយុទ្ធ​ប្រឆាំង​ក្រុម​ជន​សកម្ម​ប្រយុទ្ធ​នៅ​ក្នុង​តំបន់​មជ្ឈឹម​បូព៌ា​ ក៏ដូចជាការ​រាំង​ខ្ទប់​ឥទ្ធិពល​របស់​ប្រទេស​អ៊ីរ៉ង់នៅ​ក្នុង​តំបន់​នោះ។​ នេះជា​ភាព​ស្មុគស្មាញ​ថ្មី​ភ្លាមៗដែល​រដ្ឋបាល​របស់​លោក​អូបាម៉ា​កំពុង​ប្រឈម​មុខ​ ​និង​គោល​នយោបាយ​របស់រដ្ឋបាល​លោកនៅ​តំបន់​មជ្ឈឹម​បូព៌ា។​

ទិដ្ឋភាព​ដ៏​ស្មុគស្មាញ​ស្តីពី​ឧបទ្វីប​អារ៉ាប់ក្លា​យ​ជា​រឿង​ស្មុគស្មាញ​កាន់​តែ​ខ្លាំង​ឡើងនៅពេល​ប្រទេស​អារ៉ាប់ប៊ី ​សាអូឌីត​បាន​បញ្ចុះ​សព​ព្រះ​មហាក្សត្រ​របស់​ខ្លួន​ហើយ​បានតែងតាំង​ព្រះ​អង្គម្ចាស់ ​Salman ​ព្រះ​អនុជ​របស់​ព្រះ​អង្គ​ជា​អ្នក​ស្នង​តំណែង។​

នៅ​ឯ​សេត​វិមាន​កាល​ពី​ថ្ងៃ​សុក្រ ​ក្រុមមន្រ្តី​បាន​សម្តែងនូវ​ក្តី​សង្ឃឹម​ថា​អារ៉ាប៊ី​សាអូឌីត​នឹង​បន្ត​ធ្វើ​ការ​ជាមួយ​សហ​រដ្ឋ​អាមេរិកដើម្បី​រារាំង​ក្រុម​ជ្រុល​និយម​កុំ​ឲ្យ​បោះ​ទីតាំងនៅ​ក្នុង​ប្រទេស​យេម៉ែន ​ហើយ​ប្រើ​ប្រាស់​ប្រទេស​នោះ​ដើម្បី​ធ្វើ​ការ​វាយ​ប្រហារ​ភេរវ​កម្ម​នៅ​ជុំ​វិញ​ពិភព​លោក។​

លោក​ Josh Earnestអ្នក​នាំ​ពាក្យ​សេតវិមាន ​បាន​មាន​ប្រ​សាសន៍​ថា៖

«ដោយសារ​ប្រទេស​ទាំង​២​មាន​ព្រំដែន​រួម ដូច​នេះ​ប្រទេស​អារ៉ាប់ប៊ី សាអូឌីត​មានការព្រួយ​កង្វល់ជាពិសេស​អំពី​សកម្មភាព​របស់​ពួក​ជ្រុល​និយម​នៅ​ក្នុង​ប្រទេស​យេម៉ែន‍»។​

ទិដ្ឋ​ភាព​នេះ​បាន​ធ្លាក់ចូល​ក្នុង​ភាព​មិន​ប្រាកដ​ប្រជា​កាន់​តែ​ខ្លាំង​ឡើង​ ​បន្ទាប់​ពី​ការ​ដួល​រលំរដ្ឋាភិបាល​យេម៉ែន​ ដែល​គាំទ្រ​ដោយសហ​រដ្ឋ​អាមេរិក។​

យេម៉ែន​ជា​ដៃ​គូ​ដ៏​សំខាន់​មួយ​របស់​សហ​រដ្ឋ​អាមេរិកនៅ​ក្នុង​ការ​ប្រយុទ្ធ​ប្រឆាំង​ក្រុម​អាល់​កៃដា​ (al-Qaida) នៅ​ក្នុង​ឧបទ្វីប​អារ៉ាប់ ​ដែល​ក្រុម​នោះ​បាន​ប្រកាសទទួល​ខុស​ត្រូវ​ការ​វាយ​ប្រហារនៅ​ក្នុង​ទីក្រុង​ប៉ារីស​នៅ​ខែ​នេះ។​

មេ​ដឹកនាំ​កាល​ពី​គ្រា​មុន​បាន​អនុញ្ញាត​ឲ្យ​សហ​រដ្ឋ​អាមេរិក​ធ្វើ​ការ​វាយ​ប្រហារ​ដោយ​ប្រើ​យន្តហោះ​គ្មាន​មនុស្ស​បើក​ទៅ​លើ​គោល​ដៅ​នានា​របស់​ក្រុម​ al-Qaida​ ​ក្នុង​ប្រទេស​។​ ឥឡូវនេះ​ អនាគត​នៃ​ការ​វាយ​ប្រហារ​ទាំង​នោះ​ និង​កិច្ច​ប្រតិបត្តិការប្រឆាំង​ភេរវកម្ម​ផ្សេងទៀត ​នៅ​មិន​ទាន់​មាន​ភាពច្បាស់​លាស់​នៅ​ឡើយ​ទេ។​

ប្រទេស​អារ៉ាប់​ប៊ី សាអូឌីត​គឺ​ជា​ដៃគូ​ដ៏​ខ្លាំង​មួយ​របស់​សហ​រដ្ឋ​អាមេរិក​សម្រាប់​បញ្ហា​នៅ​ប្រទេស​យេម៉ែន ​និង​ការ​ប្រយុទ្ធ​ប្រឆាំង​ក្រុមរដ្ឋ​អ៊ីស្លាម។​ ជន​ជាតិ​អារ៉ាប់​ប៊ី សាអូឌីត​រាប់​រយ​នាក់ស្បថអំពី​ភាព​ស្មោះត្រង់​ចំពោះ​ព្រះ​មហាក្សត្រ​សោយរាជ្យ​ថ្មី ​គឺស្តេច​ Salman ដែល​នេះ​ការ​ចង្អុល​បង្ហាញ​ថា ​អន្តរកាល​នេះ​បាន​ដំណើរការទៅ​យ៉ាង​រលូន។​

លោក​ Anthony Cordesmanអ្នក​វិភាគ​ខាង​សន្តិសុខ ​មើល​ឃើញ​ថា ​គ្មាន​ការ​ផ្លាស់​ប្តូរ​ជាដុំ​កំភួន​ណា​មួយនៅ​ក្នុង​ទំនាក់​ទំនង​ទាំងអស់​នោះ​ទេ។​

«និយាយ​ឲ្យ​ត្រង់​ទៅ ​ការ​ចូល​ទិវង្គត់​របស់​ព្រះ​មហា​ក្សត្រ ​Abdullah ​នឹង​មាន​ផល​ប៉ះពាល់​តិចតួច​ណាស់។​ ព្រះ​មហាក្សត្រ​ថ្មីគឺ​ស្តេច​Salman ​ជា​មនុស្ស​ម្នាក់​ដែល​មាន​បទ​ពិសោធន៍​យ៉ាង​ខ្លាំង​បំផុត​នៅ​ក្នុង​ការ​ធ្វើ​ការ​ជាមួយ​សហ​រដ្ឋ​អាមេរិក។ព្រះ​អង្គយល់​ពី​សម្ព័ន្ធ​ភាព​នេះ​យ៉ាង​ច្បាស់‍»។​

សម្ព័ន្ធ​ភាព​នេះ​មាន​បញ្ហា​កាល​ពី​ពេល​ថ្មីៗ​នេះ ​ដូច​ដែល​បាន​បង្ហាញ​ក្នុង​អំឡុង​ដំណើរ​ទស្សន​កិច្ច​របស់​លោក​ប្រធានា​ធិបតីអូបាម៉ា​ទៅ​កាន់​ប្រទេស​អារ៉ាប់​ប៊ី ​សាអូឌីត​កាល​ពី​ខែ​មិនា ​នៅ​ពេល​ដែល​លោក​ប្រធានា​ធិបតី​បាន​ឮអ្វី​ដែល​ពួក​មន្រ្តី​សហ​រដ្ឋ​អាមេរិក​បាន​ពណ៌នា​ថា ​ជា​ការ​ពិភាក្សា​ដោយ​ស្មោះ​ត្រង់​ពី​ព្រះ​មហា​ក្សត្រ​ Abdullah។​

ពល​រដ្ឋ​អារ៉ាប់ប៊ី ​សាអូឌីត​មើលឃើញថា​ ទំនាក់ទំនង​របស់​លោក​អូបាម៉ា​ជាមួយ​ប្រទេស​អ៊ីរ៉ង់ ​រួមមាន​វិស័យ​ការទូត​ក្នុង​បញ្ហា​នុយក្លែអ៊ែរ​ ​ដែល​កំពុង​បន្ត​មាន​ឡើង ​នោះ​គឺ​ជា​ល្បែង​មួយ​ប្រកប​ដោយ​គ្រោះ​ថ្នាក់​ ដែល​អាច​ពង្រឹង​អំណាច​អ៊ីរ៉ង់។

​បន្ទាប់​ពីឡើង​សោយរាជ្យ​កាល​ពី​ថ្ងៃ​សុក្រ​សប្តាហ៍​មុន ​អ្នក​ស្នងរាជ្យ​របស់​ព្រះ​មហា​ក្សត្រ​ Abdullah ​បាន​បង្ហាញព្រះភ័ក្រ្តតាមទូរទស្សន៍​អារ៉ាប់​ប៊ី ​សាអូឌីត​ ហើយ​បាន​មាន​ព្រះ​រាជ​បន្ទូល​ថា ​ព្រះអង្គ​នឹង​បន្ត​គោល​នយោបាយព្រះ​រាម​របស់​ព្រះ​អង្គ ​ដែល​នេះ​ជា​ពាក្យ​ពេជន៍មួយ​ដែលមន្រ្តី​សហរដ្ឋ​អាមេរិក​ស្វាគមន៍៕

ប្រែសម្រួល​ដោយ ​ជឹង ​ប៉ូជីន​

XS
SM
MD
LG