លោករដ្ឋមន្រ្តីការបរទេសរបស់អារ៉ាប់ប៊ី សាអូឌីតAdel al-Jubierបាននិយាយកាលពីថ្ងៃអាទិត្យថា ព្រះមហាក្សត្រ Salman នៃប្រទេសអារ៉ាប់ប៊ី សាអូឌីតនឹងមិនចូលរួមសន្និសីទកំពូលសហរដ្ឋអាមេរិកនិងអារ៉ាប់នៅសប្តាហ៍នេះ ដែលរៀបចំដោយលោកប្រធានាធិបតីបារ៉ាក់ អូបាម៉ាទេ ដោយលុបចោលផែនការចូលរួមកិច្ចប្រជុំនៅសេតវិមានដែលបានប្រកាសកាលពីប៉ុន្មានថ្ងៃមុនដំបូង។
សន្និសីទកំពូលចាប់ផ្តើមនៅថ្ងៃពុធ ដោយមានគណៈប្រតិភូមកពីក្រុមប្រឹក្សាកិច្ចសហប្រតិបត្តិការតំបន់ឈូងសមុទ្រ ដែលមានប្រទេស៦ជាសមាជិក មក
ទស្សនាសេតវិមាន បន្ទាប់មកនៅថ្ងៃព្រហស្បត៍មានការចរចានៅកន្លែងឈប់សម្រាករបស់ប្រធានាធិបតីនៅ Camp David ផងដែរ។
លោក Jubeir បាននិយាយថា ព្រះមហាក្សត្រ Salman នឹងបញ្ជូនព្រះរាជទាយាទ Mohammed bin Nayef ជំនួសព្រះអង្គ។ លោកបានលើកឡើងថាសន្និសីទកំពូលនេះជាន់គ្នាជាមួយនឹងបទឈប់បាញ់គ្នារយៈពេល៥ថ្ងៃហើយនិងកិច្ចខំប្រឹងប្រែងផ្តល់ជំនួយមនុស្សធម៌នៅក្នុងប្រទេសយេមែនជាប្រទេសជិតខាង ដែលនៅទីនោះប្រទេសអារ៉ាប់ប៊ី សាអូឌីត បានដឹកនាំយុទ្ធនាការវាយប្រហារតាមអាកាសប្រយុទ្ធនឹងក្រុមអ្នកប្រយុទ្ធប្រឆាំងរដ្ឋាភិបាល។
ក្រុមមន្រ្តីរដ្ឋបាលរបស់លោកអូបាម៉ាបាននិយាយថា ការផ្លាស់ប្តូរនោះមិនមែនជាការឆ្លើយតបទៅនឹងបញ្ហាសំខាន់ណាមួយទេ។
ដោយព្រះមហាក្សត្រ Salman អវត្តមាននៅសន្និសីទកំពូលនោះ មានតែមេដឹកនាំនៃប្រទេសកាតា គុយវ៉ែត នឹងដឹកនាំគណៈប្រតិភូ។ Emir Sabah Ahmad al-Sabah នៃប្រទេសគុយវ៉ែតបានធ្វើដំណើរមកកាន់រដ្ឋធានីវ៉ាស៊ីនតោនកាលពីថ្ងៃអាទិត្យហើយ Emir Sheikh Tamimbin Hamad al Thani នៃប្រទេសកាតា កំណត់ពេលចាកចេញពីប្រទេសកាតានៅថ្ងៃច័ន្ទនេះ៕
