ភ្ជាប់​ទៅ​គេហទំព័រ​ទាក់ទង

លោក​អូបាម៉ា​ ដែល​ចុះខ្សោយ​ខាង​នយោបាយ​​​ ប្រុងប្រៀប​ខ្លួន​ប្រឈម​ជាមួយ​ចិន

  • Luis Ramirez

លោក​ប្រធានាធិបតី​បារ៉ាក់​អូបាម៉ា​​លើក​ដៃ​​នៅលើ​យន្តហោះ​ Air Force One ជាសញ្ញាទៅ​កាន់​អ្នកជូនដំណើរ​

លោក​ប្រធានាធិបតី​សហ​រដ្ឋ​អាមេរិក​បារ៉ាក់ ​អូបាម៉ា​បាន​ធ្វើ​ដំណើរ​កាល​ពី​ថ្ងៃ​អាទិត្យទៅ​កាន់​ទ្វីប​អាស៊ីដើម្បី​ចូលរួម​សន្និសីទកំពូល​ខាង​សេដ្ឋ​កិច្ច​នៅ​ក្នុង​ប្រ​ទេស​ចិន ​ភូមា​និង​ប្រទេស​អូស្រ្តាលីដែល​ជា​ដំណើរ​បំពេញ​ទស្សន​កិច្ច​រយៈ​ពេល​មួយ​សប្តាហ៍ដែល​មាន​គោល​បំណង​ធ្វើ​ឲ្យ​ប្រសើរ​ឡើង​នូវ​ទំនាក់​ទំនង​ជាមួយ​រដ្ឋាភិបាល​ទីក្រុង​ប៉េកាំង​ ជំរុញ​ការ​នាំ​ចេញ​ទំនិញ​របស់​អាមេរិក​ ​ហើយ​នឹង​ធ្វើ​ការ​បញ្ជាក់​ឡើង​វិញ​ដល់​ដៃគូ​នានា​នៅ​អាស៊ី​ចំពោះ​ការ​ប្រឈម​នឹង​អាកប្បកិរិយា​ដ៏​គគ្លើនកាន់​តែកើន​ឡើង​របស់​ចិននៅ​ក្នុង​តំបន់។ ​លោក​អូបាម៉ា​នឹង​ប្រឈម​នឹង​សំណួរស្តី​ពី​ការ​សម្រេច​ចិត្ត​របស់​សហ​រដ្ឋ​អាមេរិក​ផ្លាស់​ប្តូរការ​យកចិត្ត​ទុកដាក់​ខាង​យោធា​របស់​ខ្លួន​នៅ​តំបន់​អាស៊ី​ ​រួមមាន​ ថា​តើការ​ធ្វើ​ឲ្យ​មាន​តុល្យភាព​ឡើង​វិញ​អាច​កើត​មាន​ឡើង​ដែរ​ឬ​ទេ។ ​ដោយ​អំណាច​របស់​លោក​បានត្រូវ​បន្ថយ​ ​បន្ទាប់​ពី​បរាជ័យ​របស់​គណ​បក្សលោកនៅ​ក្នុង​ការ​បោះឆ្នោត​សភា​នោះ ​ពួក​អ្នក​វិភាគ​និយាយ​ថា ​ការ​សន្យា​ ឬ​ការ​ធានា​អះអាង​ណាមួយ​របស់​លោក​ប្រធានាធិបតីដែលធ្វើ​ជាមួយ​ដៃគូ​អាស៊ី​នឹង​ត្រូវ​ជួបការ​មន្ទិល​សង្ស័យ។​

ដំណើរ​បំពេញ​ទស្សន​កិច្ច​នេះ​កើត​មាន​ឡើង​ចំ​ពេល​វេលា​មិនល្អ​សម្រាប់​ប្រធានាធិបតី​អូបាម៉ា​ទេ។ ​ចិន ​ដែល​មាន​សេដ្ឋ​កិច្ចរីក​ចម្រើន​យ៉ាង​ឆាប់​រហ័សហើយ​នឹង​ការលូតលាស់​សមត្ថភាព​ខាង​យោ​ធាក្នុង​មហា​សមុទ្រ​ប៉ាស៊ី​ហ្វិក​នោះ​ បាន​ប្រុង​ប្រៀប​បង្កើន​ការ​ប្រឈមមុខ​ជាមួយ​មេ​ដឹកនាំ​សហ​រដ្ឋ​អាមេរិក ដែលឥឡូវនេះបាន​ចុះ​ខ្សោយ​អំណាចដោយ​សារ​លទ្ធផល​នៃ​ការ​បោះ​ឆ្នោត។​

ប៉ុន្មាន​ថ្ងៃ​មុន​ពេល​ចាក​ចេញ​ដើម្បី​ចូល​រួម​សន្និសីទ​កំពូល​សេដ្ឋ​កិច្ច​អាស៊ីក្នុង​រដ្ឋ​ធានីប៉េកាំង​ហើយ​នឹង​ការ​ប្រឈម​មុខ​សភា​ថ្មី​ដែល​ត្រួតត្រា​ដោយពួក​គណបក្ស​សា​ធារណ​រដ្ឋ​នោះ​ ​លោក​អូបាម៉ា​បាន​ប្រាប់​ពួក​អ្នក​យក​ព័ត៌មាន​ថា ​បេសក​កម្ម​មួយ​នៃ​បេសក​កម្ម​នានា​របស់​លោក​ក្នុង​តំបន់​អាស៊ី​គឺ​ជំរុញ​ការ​នាំ​ចេញ​ទំនិញ​របស់​អាមេរិក​ដើម្បី​បង្កើត​ការងារ​នៅ​ក្នុងអាមេរិក។​

«យើង​អាចធ្វើ​ការជាមួយ​គ្នា​ដើម្បី​ធ្វើឲ្យ​លូតលាស់​ការ​នាំ​ចេញ​នូវ​ទំនិញ​របស់​យើង ​ហើយ​នឹង​បើក​ទីផ្សារ​ថ្មី​សម្រាប់​ក្រុម​ហ៊ុន​របស់​យើង ​ដើម្បី​លក់​ទំនិញធ្វើ​នៅអាមេរិកកាន់​តែ​ច្រើន​ឡើងទៅ​កាន់​ផ្នែក​នានារបស់​ពិភព​លោក។ ​នេះ​ជា​អ្វីដែល​ខ្ញុំ​នឹង​ត្រូវ​ផ្តោត​ការ​យក​ចិត្ត​ទុកដាក់ នៅពេល​ដែល​ខ្ញុំ ​ធ្វើ​ដំណើរ​ទៅ​កាន់​តំបន់​អាស៊ី​នៅ​សប្តាហ៍​នេះ»។​

ក៏​ប៉ុន្តែ​ការ​ជំរុញ​របៀប​វារៈ​នេះជាមួយ​ចិន​មិនមែន​ជា​ការ​ងាយ​ស្រួល​ទេ។​

មុន​ពេល​លោក​ប្រធានាធិបតី​បាន​អញ្ជើញ​ទៅ​ដល់​ទីក្រុង​ប៉េកាំង ​មាន​សញ្ញា​នៃ​បញ្ហា​ប្រឈម​កំពុង​រង់​ចាំ​ប្រធានាធិបតី​សហ​រដ្ឋ​អាមេរិក។ ​កាសែត​ផ្លូវការ​មួយ​របស់​ចិន​បាន​និយាយ​នៅ​ក្នុង​របៀប​បង្អាប់​ថា ​ការ​បោះឆ្នោតដែល​គណបក្ស​របស់​លោក​ប្រធានាធិបតី​ចាញ់​ ហើយ​នឹង​ការថយ​ចុះអំណាច​គឺ​ជា​ផល​វិបាក​នៃ​បរាជ័យ​របស់​លោក​អូបាម៉ា។ ​កាសែត​នោះ ក៏​បាន​ពណ៌នា​លោក​ប្រធានា​ធិបតី​ថា ​សោះកក្រោះ​និងគ្មាន​ខ្លឹម​សារ។​

ពួក​អ្នក​វិភាគ​និយាយ​ថា សម្រាប់​លោក​ប្រធានាធិបតី​អាមេរិក​ ​ចិន​ដែល​កំពុង​ពង្រីក​យោធា​របស់​ខ្លួន​ហើយ​នឹង​ការ​ទាម​ទារយក​ដែន​សមុទ្រ​ក្នុង​សមុទ្រ​ចិន​ខាង​កើត ​និង​ខាង​ត្បូង​គឺជា​បញ្ហា​ប្រឈមខាង​សន្តិសុខ​ដ៏​ធំ​បំផុត​ដែល​ត្រូវ​ដោះ​ស្រាយ។​

កាល​ពី​ឆ្នាំ​ទៅ​ នៅ​ក្នុង​រដ្ឋ ​California ​ប្រធានាធិបតី​អូបាម៉ា ​និង​មេ​ដឹកនាំ​ចិន​ ស៊ី ​ជីងពីងបាន​ព្រម​ព្រៀង​គ្នា​ថា ​ពួក​អស់​លោក​ត្រូវ​ការ​គម្រូ​ថ្មី​មួយ​សម្រាប់​ទំនាក់​ទំនងរវាងមហា​អំណាចបច្ចុប្បន្ន ហើយ​នឹង​មហា​អំណាច​មួយ​ទៀត​ ​ដែល​កំពុង​ងើប​ឡើង។​

លោក ​Tom Donilon ​អតីត​ទី​ប្រឹក្សា​សន្តិសុខ​ជាតិ​របស់​លោក​អូបាម៉ា ​និយាយ​ថា ​ជំនួប​របស់​មេដឹកនាំ​ទាំង​២​នៅ​ពេល​នេះ​សំខាន់​ណាស់។​

«តាមការ​វិនិច្ឆ័យ​របស់​ខ្ញុំ ​វា​ជា​ជំនួប​ទ្វេភាគីដ៏សំខាន់​បំផុតដែល​លោក​ប្រធានាធិបតី​ធ្វើ​នៅ​ឆ្នាំ​នេះ»។​

ក៏​ប៉ុន្តែ ​លោក ​Robert Daly អតីត​អ្នក​ការ​ទូតសហ​រដ្ឋ​អាមេរិក​ ​រំពឹង​ថា ​គ្មាន​ការ​ពិភាក្សា​របៀប​គួរ​សម​ទៀត​ទេ។​

«សព្វ​ថ្ងៃ​នេះ ​គ្មាន​ភាគី​ណាមួយ​មាន​ឆន្ទៈ​និយាយ​ចំៗ​អំពី​ការ​សម្រប​សម្រួលដែល​ខ្លួន​នឹង​ធ្វើ​នោះ​ទេ។​ ចំពោះ​ប្រទេស​ចិន ​ចំណុច​ជាក់​លាក់ដែល​ចិនមិន​ចូលចិត្ត​នោះ​គឺ​ការ​រៀបចំ​ក្នុង​មហា​សមុទ្រ​ប៉ាស៊ី​ហ្វិកភាគ​ខាង​លិច។ ​ចិនមិន​ដែល​បាន​ឆ្លើយ​បំភ្លឺ​អំពី​អ្វីដែល​ខ្លួន​ចង់​ធ្វើ​ឲ្យ​សម្រេច​ តែ​ធ្វើ​មិន​បាន​ទេ នៅក្រោម​ការ​រៀប​ចំ​នៅពេល​បច្ចុប្បន្ននេះ»។​

បន្ទាប់​ពី​បំពេញ​ទស្សន​កិច្ច​នៅ​ប្រទេស​ចិន ​ប្រធានាធិបតី​អូបាម៉ា​ធ្វើ​ដំណើរ​ទៅ​កាន់​ប្រទេស​ភូមា​ ​ដែល​នៅ​ទី​នោះ​លោក​ប្រធានាធិបតី​នឹង​ជួប​ជាមួយ​ពួក​មេ​ដឹកនាំ​ភូមា ​ហើយ​នឹង​លោកស្រី​អ៊ុង សានស៊ូជី​ មេដឹកនាំ​ប្រឆាំង​ ​ដែលលោក​ប្រធានាធិបតី​បាន​ជួប​កាល​ពី​ដំណើរ​បំពេញ​ទស្សន​កិច្ច​កាលពី​ពេល​មុន។​

នៅ​ឯ​សន្និសីទ​កំពូលអាស៊ី​ខាង​កើតហើយ​នឹង​នៅ​ឯ​ជំនួប​ជាមួយ​សមាគម​ប្រជាជាតិ​អាស៊ី​អាគ្នេយ៍​ លោក​ប្រធានាធិបតី​អូបាម៉ា​នឹង​ដោះ​ស្រាយ​បញ្ហា​ស្តីពី​ការ​តាំង​ចិត្ត​របស់​សហ​រដ្ឋ​អាមេរិក​ផ្តោត​លើ​កម្លាំង​យោ​ធា​របស់​ខ្លួន​នៅ​តំបន់​អាស៊ី។​ ដំណើរ​បំពេញ​ទស្សន​កិច្ច​នេះ​បញ្ចប់​នៅទីក្រុង ​Brisbane ​នៃ​ប្រទេស​អូស្រ្តាលី​ ទីដែលលោក​ប្រធានាធិបតី​អូបាម៉ា​នឹង​ចូល​រួម​សន្និសីទ​កំពូល ​G-20 ​ដែល​នៅ​ទី​នោះ​លោក​ប្រធានាធិបតី​មាន​ផែនការ​ថ្លែង​ស្តី​ពី​តួនាទី​របស់​សហ​រដ្ឋ​អាមេរិកជា​មេ​ដឹកនាំក្នុង​តំបន់​អាស៊ី៕​

លោក​ជឹង ​ប៉ូជីន​ប្រែសម្រួល

XS
SM
MD
LG