ពួកបេក្ខជនខាងគណបក្សសាធារណរដ្ឋឈ្នះបានអាសនៈល្មមគ្រប់គ្រាន់នៅក្នុងការបោះឆ្នោតសភាសហរដ្ឋអាមេរិកកាលពីថ្ងៃអង្គារម្សិលមិញដើម្បីត្រួតត្រាព្រឹទ្ធសភា (Senate)។
មកត្រឹមការបោះឆ្នោតពាក់កណ្តាលអាណត្តិនៅថ្ងៃអង្គារ ពួកគណបក្សប្រជាធិបតេយ្យបានកាន់កាប់៥៥អាសនៈភាគច្រើននៃអាសនៈសរុបចំនួន១០០របស់ព្រឹទ្ធសភា ក៏ប៉ុន្តែកាលពីថ្ងៃអង្គការពួកគណបក្សសាធារណរដ្ឋបានបង្កើនអាសនៈយ៉ាងហោចណាស់ក៏៧អាសនៈដែរដោយបានឈ្នះនៅក្នុងរដ្ឋ Arkansas, Colorado, Iowa, Montana, North Carolina, South Dakota និង West Virginia។ តំណែងព្រឹទ្ធសភា១ភាគ៣ ត្រូវធ្វើការបោះឆ្នោតសារជាថ្មីកាលពីថ្ងៃអង្គារ រួមមានអាសនៈរដ្ឋ Kentuckyដែលត្រូវបានកាន់កាប់ដោយលោក Mitch McConnel មេដឹកនាំព្រឹទ្ធសភាខាងគណបក្សសាធារណរដ្ឋមកពីរដ្ឋ Kentucky។ លោក បានកាន់តំណែងនេះ៦អាណត្តិ។
ពួកគណបក្សសាធារណរដ្ឋក៏បានបង្កើនសំឡេងភាគច្រើនកាន់តែកើនឡើងនៅក្នុងសភាតំណាងរាស្រ្ត (House) ដោយធ្វើឲ្យពួកគេត្រួតត្រាសភាពេញលេញក្នុងអំឡុងពេលនៃការកាន់អំណាចរយៈពេល២ឆ្នាំចុងក្រោយរបស់អាណត្តិលោកប្រធានាធិបតី បារ៉ាក់ អូបាម៉ា។
ដោយសារការគាំទ្ររបស់ប្រធានាធិបតីមានចំនួនទាប ពួកកាន់អំណាចខាងគណបក្សប្រជាធិបតេយ្យមួយចំនួន បានបដិសេធពុំព្រមអញ្ជើញលោកប្រធានាធិបតីធ្វើយុទ្ធនាការឲ្យពួកគេ ហើយជារឿយៗ បាននិយាយយោងដល់បញ្ហាដែលពួកគេ មិនយល់ស្របជាមួយលោកប្រធានាធិបតីដូចជាបញ្ហាថែទាំសុខភាពឬថាមពល។
ដោយត្រួតត្រាសភា ពួកគណបក្សសាធារណរដ្ឋ អាចបង្កើនជម្លោះថ្មីជាមួយលោកប្រធានាធិបតីអូបាម៉ាលើបញ្ហាការចុះហត្ថលេខាលើសេចក្តីព្រាងច្បាប់ ការធ្វើកំណែទម្រង់សុខភាព ដែលបានធ្វើឲ្យពលរដ្ឋរាប់លាននាក់ការពារការធានារ៉ាប់រងខាងសុខភាពដែលពួកគេមិនអាចទិញបានកាលពីពេលមុន។ ពួកគណបក្សសាធារណរដ្ឋជាច្រើនឃើញថា ច្បាប់នោះមានការពាក់ព័ន្ធពីរដ្ឋាភិបាលខ្លាំងពេក ហើយបានអំពាវនាវម្តងហើយម្តងទៀតឲ្យលុបច្បាប់នោះចោល។
ពួគគណបក្សសាធារណរដ្ឋក៏បានវាយប្រហារចំណាត់ការវិបត្តិជំងឺអ៊ីបូឡារបស់ប្រធានាធិបតីអូបាម៉ា ហើយបានអំពាវនាវឲ្យផ្តល់ការយល់ព្រមដល់បំពង់បង្ហូរប្រេងពីប្រទេសកាណាដាកាត់តាមតំបន់ភាគកណ្តាលសហរដ្ឋអាមេរិក និងកាត់បន្ថយការគ្រប់គ្រងរបស់រដ្ឋាភិបាលលើពាណិជ្ជកម្ម។ សមាជិកសភាគណបក្សប្រឆាំងខ្លះ ក៏បានជំទាស់នឹងចំណាត់ការរបស់លោកប្រធានាធិបតីពីការធ្វើអន្តរាគមន៍របស់ប្រទេសរុស្ស៊ីក្នុងប្រទេសអ៊ុយក្រែនហើយនឹងការវាយប្រហារតាមអាកាសរបស់សហរដ្ឋអាមេរិកប្រឆាំងពួកជនសកម្មប្រយុទ្ធរដ្ឋអ៊ីស្លាមក្នុងប្រទេសអ៊ីរ៉ាក់និងប្រទេសស៊ីរី។
ក្នុងសហរដ្ឋអាមេរិក គណបក្សសំខាន់ៗទាំង២ក៏ឈ្លោះប្រកែកគ្នាលើនយោបាយនៃការចំណាយនិងពន្ធដារនិងការធ្វើកំណែទម្រង់អន្តោប្រវេសន៍ដែរ៕
