ភ្ជាប់​ទៅ​គេហទំព័រ​ទាក់ទង

អូបាម៉ា​ប្រាប់​ប្រធានាធិបតី​ស៊ីរី​ឲ្យ​ដឹកនាំ​ការ​ផ្លាស់ប្តូរ​ឬ​ក៏​ត្រូវ​ចុះចេញ


លោក​ប្រធានាធិបតី​ បារ៉ាក់​ អូបាម៉ា​ (Barack Obama)នៅ​ក្នុង​ការ​ថ្លែង​សុន្ទរកថា​ស្តីអំពី​គោលនយោបាយ​ការ​បរទេស​របស់​អាមេរិក​ចំពោះ​មជ្ឈិមបូព៌ា​ប្រទេស នៅ​ក្រសួង​ការបរទេស​អាមេរិក​ នៅថ្ងៃទី១៩ ខែឧសភា ឆ្នាំ ២០១១។

នៅ​ក្នុង​ការ​ថ្លែង​សុន្ទរកថា​ស្តីអំពី​គោលនយោបាយ​ការ​បរទេស​របស់​អាមេរិក​ចំពោះ​មជ្ឈិមបូព៌ា​ប្រទេស​ លោក​ប្រធានាធិបតី​ បារ៉ាក់​ អូបាម៉ា​ (Barack Obama) បាន​មាន​ប្រសាសន៍​ថា​ ជម្រើស​ដែល​លោក​ប្រធានាធិបតី​ស៊ិរី​ បាស្ហា អាល់ អាសាដ​ (Bashar al-Assad)​ ត្រូវ​ជ្រើសរើស​ គឺ​ លោក​ត្រូវ​ដឹកនាំ​ប្រទេស​របស់​លោក​ឆ្ពោះ​ទៅ​រក​លិទ្ធិ​ប្រជាធិបតេយ្យ​ ឬ​បើ​មិន​អញ្ចឹង​ទេ​ លោក​ត្រូវ​ចុះ​ចេញ​ពី​តំណែង។​ ការ​អធិប្បាយ​របស់​លោក​អូបាម៉ា​នេះ​ បាន​ធ្វើ​ឡើង​មួយ​ថ្ងៃ​ក្រោយពី​រដ្ឋបាល​របស់​លោក​ បាន​ស្នើ​ឲ្យ​ដាក់​ទណ្ឌកម្ម​លើ​មេដឹកនាំ​ស៊ិរី​ និង​ជំនួយការ​សំខាន់ៗ។

ការ​ថ្លែង​សុន្ទរកថា​របស់​លោក​ប្រធានាធិបតី​ បារ៉ាក់​ អូបាម៉ា​ មិន​បាន​ទាមទារ​ដោយ​ចំៗ​ ឲ្យ​លោក​ប្រធានាធិបតី​ស៊ិរី​ចុះចេញ​ពី​តំណែង​ទេ​ ក៏ប៉ុន្តែ​ ការ​អធិប្បាយ​របស់​លោក​គឺ​ជា​ការ​បង្ហាញ​ថា​ ការ​អត់ធ្មត់​របស់​អាមេរិក​ គឺ​មាន​កាន់តែ​តិច​ទៅៗ​ ចំពោះ​លោក​ប្រធានាធិបតី​ បាស្ហា អាល់ អាសាដ​ ដែល​បាន​ ធ្វើ​សកម្មភាព​ផ្ទុយ​ពី​ការ​សន្យា​របស់​លោក​ ដែល​ថា​នឹង​ធ្វើ​កំណែ​ទម្រង់​ ហើយ​បែរ​ទៅ​ជា​ធ្វើការ​បង្ក្រាប​យ៉ាងខ្លាំង​ទៅ​លើ​ក្រុម​បាតុករ​វិញ​នោះ។

«ប្រជាពលរដ្ឋ​ស៊ិរី​បាន​បង្ហាញ​សេចក្តី​ក្លាហាន​របស់​ពួកគេ​ នៅ​ក្នុង​ការ​ទាមទារ​ឲ្យ​មាន​ការ​ផ្លាស់ប្តូរ​មួយ​ ដើម្បី​ឆ្ពោះ​ទៅ​រក​លិទ្ធិ​ប្រជាធិបតេយ្យ។​ ហើយ​ឥឡូវ​នេះ​ ជម្រើស​ដែល​លោក​ប្រធានាធិបតី​ អាសាដ​ ត្រូវ​ជ្រើសរើស​ គឺ​លោក​ត្រូវ​ដឹកនាំ​ប្រទេស​របស់​លោក​ឲ្យ​មាន​ការ​ផ្លាស់ប្តូរ​ ឬ​មួយ​លោក​ត្រូវ​ចុះចេញ​ពី​តំណែង។​ រដ្ឋាភិបាល​ស៊ិរី​ ត្រូវតែ​ឈប់​បាញ់​បាតុករ​ ហើយ​អនុញ្ញាត​ឲ្យ​មាន​បាតុកម្ម​ដោយ​សន្តិវិធី​ ដោះលែង​អ្នកទោស​នយោបាយ​ និង​បញ្ឈប់​ការ​ចាប់ខ្លួន​ដោយ​អយុត្តិធម៌។ រដ្ឋាភិបាល​ស៊ិរី​ ត្រូវតែ​អនុញ្ញាតិ​ឲ្យ​អ្នកឃ្លាំមើល​សិទ្ធិ​មនុស្ស​ អាច​ចូល​ទៅ​ទីក្រុង​មួយ​ចំនួន​ ដូចជា​ទីក្រុង​ ដារ៉ា​ (Daraa)​ ជាដើម​ ហើយ​ចាប់ផ្តើម​កិច្ច​សន្ទនា​ប្រាកដប្រជា​មួយ​ ដើម្បី​ឲ្យ​ការ​ផ្លាស់ប្តូរ​ឈាន​ទៅ​រក​លិទ្ធិ​ប្រជាធិបតេយ្យ​ មាន​ដំណើរការ​ទៅមុខ»។

លោក​អូបាម៉ា​ បាន​មាន​ប្រសាសន៍​ទៀត​ថា​ ប្រទេស​ស៊ិរី​ បាន​យក​គំរូ​តាម​ឲ្យ​ប្រទេស​អ៊ីរ៉ង់​ដែល​ជា​សម្ព័ន្ធមិត្ត​របស់​ខ្លួន​ និង​ស្វែងរក​ជំនួយ​ពី​រដ្ឋាភិបាល​តេអេរ៉ង់​ (Tehran)​ នៅ​ក្នុង​អ្វី​ដែល​លោក​បាន​ហៅ​ថា​ «កលល្បិច​នៃ​ការ​គាបសង្កត់»។​ លោក​អូបាម៉ា​ បាន​ថ្លែង​ថា​ ការណ៍​នេះ​ ឆ្លុះ​បញ្ចាំង​ឲ្យ​ឃើញ​ពី​«ការ​និយាយ​ខុសពី​ការ​ប្រព្រឹត្ត»​របស់​របប​គ្រប់គ្រង​អ៊ីរ៉ង់​ ដោយ​លោក​អូបាម៉ា​និយាយ​ថា​ របប​នេះ​ គាំទ្រ​ដល់​សិទ្ធិ​របស់​បាតុករ​នៅ​ក្រៅ​ប្រទេស​ តែ​គាបសង្កត់​ប្រជាពលរដ្ឋ​នៅ​ក្នុង​ប្រទេស​របស់​ខ្លួន។

នៅ​ល្ងាច​មុន​ថ្ងៃ​ដែល​លោក​ប្រធានាធិបតី​ថ្លែង​សុន្ទរកថា​នេះ​ រដ្ឋបាល​របស់​លោក​បាន​ប្រកាស​ អំពី​ការ​ដាក់​ទណ្ឌកម្ម​ថ្មី​មួយ​ទៅ​លើ​ប្រទេស​ស៊ីរី​ ដែល​នោះ​ជា​លើក​ទីមួយ​ហើយ​ ដែល​ការ​ដាក់​ទណ្ឌកម្ម​នោះ​គឺ​សំដៅ​ផ្ទាល់​ទៅ​លើ​លោក​ប្រធានាធិបតី​បាស្ហា អាល់ អាសាដ​ និង​ទីប្រឹក្សា​សំខាន់ៗ៕

ប្រែសម្រួល​ដោយ​ លី ម៉ូរីវ៉ាន់

XS
SM
MD
LG