លោកប្រធានាធិបតីស.រ.អា. បារ៉ាក់ អូបាម៉ា បានមានប្រសាសន៍ថា សោហ៊ុយប្រចាំឆ្នាំចំនួន ៨០ពាន់លានដុល្លារក្នុងការដាក់គុកពួកអ្នកទោសនៅក្នុងពន្ធនាគារស.រ.អា. បានក្លាយទៅជាចំនួនច្រើនហួសហេតុ ហើយលោកបានថ្លែងថា រយៈពេលជាប់គុកយូរសម្រាប់ពួកអ្នកប្រព្រឹត្តល្មើសមិនឃោរឃៅជាញឹកញយមានរួមបញ្ចូលមនុស្សមានបញ្ហាជំងឺផ្លូវចិត្តនិងមនុស្សញៀនគ្រឿងញៀនផងដែរ។
នៅក្នុងសុន្ទរកថាប្រចាំសប្តាហ៍របស់លោកតាមវិទ្យុ លោក អូបាម៉ាបានមានប្រសាសន៍ថា ជិត៦០ភាគរយនៃក្រុមអ្នកទោសចំនួន២លាន២សែននាក់ក្នុងប្រទេសអាមេរិកមានបញ្ហាជំងឺផ្លូវចិត្ត ហើយថា ៧០ភាគរយជាអ្នកប្រើគ្រឿងញៀនជាប្រចាំដែលត្រូវការឱ្យមានការព្យាបាល។
នៅក្នុងការជំរុញយុទ្ធនាការរបស់លោកដែលមានរយៈពេលច្រើនខែមកហើយដើម្បីឱ្យមានការកែទម្រង់ប្រព័ន្ធយុត្តិធម៌ព្រហ្មទណ្ឌ លោក អូបាម៉ាក៏បានអំពាវនាវឱ្យមានគោលនយោបាយថ្មីៗដែលមានគោលដៅជួយពួកអ្នកទោសជាង៦សែននាក់ដែលបានត្រូវដោះលែងពីគុកក្នុងពេលមួយឆ្នាំៗឱ្យក្លាយទៅជាសមាជិកមានផលប្រយោជន៍របស់គ្រួសារនិងសហគមន៍ពួកគេ។
លោកប្រធានាធិបតីបានមានប្រសាសន៍ថា ក្នុងពេលប៉ុន្មានថ្ងៃខាងមុខនេះសេតវិមាននឹងអំពាវនាវដល់វិស័យជំនួញឱ្យសន្យាថា នឹងជួលពួកអ្នកទោសដែលបានជាប់ឃុំឃាំងក្នុងពន្ធនាគារក្រោយពេលពួកគេបានអនុវត្តទោសនោះរួចហើយ ហើយលោកបាននិយាយដែរថា នឹងមានការបង្ហាញសេចក្តីល្អិតល្អន់នៃវិធានការថ្មីៗដែលធានារ៉ាប់រងថា ពួកអតីតអ្នកទោសមានអ្វីដែលលោកហៅថា «ភាពយុត្តិធម៌ក្នុងការប្រកួតប្រជែងដើម្បីមានការងារសហព័ន្ធធ្វើ»។
ដោយសរសេរអត្ថបទមួយចុះផ្សាយកាលពីថ្ងៃសុក្រនៅក្នុងកាសែត New York Times លោក Jason Furman ប្រធាននៃក្រុមប្រឹក្សាអ្នកផ្តល់យោបល់ខាងសេដ្ឋកិច្ចរបស់សេតវិមាន បានហៅកំណើនចំនួនអ្នកទោសនៅក្នុងគុកស.រ.អា.ថា «ច្រើនហួសនិស្ស័យ» ដោយមានអត្រាមនុស្សជាប់គុកច្រើនជាងអត្រាមធ្យមភាគពិភពលោកបួនដង៕
