ប៉ូលិសបានឃុំខ្លួនបុរសម្នាក់ ដែលបានបំផ្ទុះគ្រាប់បែកនៅជិតកន្លែងរង់ចាំរថយន្តក្រុង Port Authority Bus Terminal ក្នុងក្រុងញូវយ៉ក កាលពីថ្ងៃចន្ទកន្លងទៅនេះ។ បុរសរូបនេះ បានបំផ្ទុះគ្រាប់បែក ដែលមានសណ្ឋានជាបំពង់ទីប ជាប់នឹងទ្រូង ដោយបង្កឲ្យរងរបួសខ្លួនឯង និងមនុស្សបីនាក់ផ្សេងទៀត។ អភិបាលក្រុងញូវយ៉កលោក Bill de Blasio បានហៅឧបទ្ទវហេតុនោះថាជា «ការប៉ុនប៉ងវាយប្រហារភេរវកម្ម»។
ស្នងការប៉ូលិសក្រុងញូវយ៉កលោក James O'Neill បានកំណត់អត្តសញ្ញាណជនសង្ស័យនោះតាមឈ្មោះ Akayed Ullah អាយុ ២៧ឆ្នាំ ដែលឥឡូវនេះកំពុងទទួលបានការព្យាបាលអាការៈរលាក និងរបួសនៅមន្ទីរពេទ្យមួយ និងកំពុងស្ថិតក្រោមការឃុំខ្លួនរបស់ប៉ូលិស។
លោក O'Neill បានប្រាប់អ្នកសារព័ត៌មានថា យុវជនឈ្មោះ Ullah មាន «បំណង» បំផ្ទុះគ្រាប់បែកបំពង់ទីបនោះ។
របាយការណ៍ព័ត៌មាននានានិយាយថា Ullah បានមកសហរដ្ឋអាមេរិកពីប្រទេសបង់ក្លាដែស ប្រមាណពីប្រាំពីរឆ្នាំមុន និងជាពលរដ្ឋអាមេរិកអចិន្ត្រៃយ៍ពេញសិទ្ធិ។
មន្ទីរសង្គ្រោះអគ្គិភ័យក្រុងញូវយ៉កបានបញ្ជាក់ថា ជនរងរបួសបីនាក់ពីឧបទ្ទវហេតុបំផ្ទុះគ្រាប់បែកនេះ មិនមានគ្រោះថ្នាក់ដល់ជីវិតទេ៕
