របាយការណ៍មួយនៅក្នុងកាសែត The New York Times កាលពីថ្ងៃពុធបានលាតត្រដាងឱ្យដឹងអំពីទំហំនៃការស៊ើបការសម្ងាត់ដែលលោកប្រធានាធិបតីស.រ.អា. Donald Trump បានទទួលអំពី មុខនាទីដោយផ្ទាល់របស់ប្រធានាធិបតីរុស្សី Vladimir Putin នៅក្នុងការជ្រៀតជ្រែករបស់ប្រទេសរុស្សីក្នុងការបោះឆ្នោតប្រធានាធិបតីស.រ.អា.កាលពីឆ្នាំ២០១៦។
សេចក្តីរាយការណ៍នេះបានបំភ្លឺអំពីការប៉ុនប៉ងរបស់ប្រធានាធិបតី Trump ដើម្បីបង្វែរការយកចិត្តទុកដាក់ពីមុខនាទីរបស់រដ្ឋាភិបាលក្រុងម៉ូស្គូនៅក្នុងជ័យជម្នះរបស់លោកលើលោកស្រី Hillary Clinton បេក្ខជនប្រធានាធិបតីស.រ.អា.ខាងគណបក្សប្រជាធិបតេយ្យ ដោយមានរួមបញ្ចូលសេចក្តីថ្លែងការណ៍ចុះឡើងរបស់លោកដែលដំបូងឡើយមានភាពផ្ទុយគ្នា ហើយបន្ទាប់មកមានការទទួលស្គាល់ការរកឃើញរបស់សហគមន៍ស៊ើបការសម្ងាត់ចាប់តាំងពីជំនួបរបស់លោកជាមួយលោក Putin នៅក្នុងក្រុង Helsinki កាលពីថ្ងៃចន្ទ។
សារព័ត៌មាន The New York Times និយាយថាលោក Trump បានដឹងជាដំបូងអំពីការជ្រៀតជ្រែករបស់រុស្សីកាលពីថ្ងៃទី៦ខែមករាឆ្នាំ២០១៧ គឺពីរសប្តាហ៍មុនការសម្ពោធតំណែងប្រធានាធិបតីរបស់លោក នៅក្នុងការប្រជុំគ្នាមួយនៅក្នុងអាគារ Trump Towerក្នុងបូរីញូវយ៉កជាមួយលោក John Brennan នាយក CIA នៅពេលនោះ; លោក James Clapper នាយកមន្ទីរស៊ើបការសម្ងាត់ជាតិនៅពេលនោះ លោក James Comey នាយក FBI នៅពេលនោះនិងលោកឧត្តមនាវី Mike Rogers នាយកទីភ្នាក់ងារសន្តិជាតិនៅពេលនោះ។
មន្ត្រីជាន់ខ្ពស់ទាំងនេះបានបង្ហាញប្រធានាធិបតីជាប់ឆ្នោត Trump នូវព័ត៌មានសម្ងាត់ដែលបង្ហាញថា Putin បានបញ្ជាដោយផ្ទាល់ខ្លួនគាត់ឱ្យចូលលួចយកព័ត៌មានពីទិន្នន័យកុំព្យូទ័រនៅស.រ.អា.និងឱ្យធ្វើយុទ្ធនាការបំភ្លៃព័ត៌មានដែលមានរួមបញ្ចូលអត្ថបទនិងអ៊ីម៉ែល ពីនាយទាហានរុស្ស៊ីនិងព័ត៌មានពីប្រភពសម្ងាត់បំផុតម្នាក់ជិតស្និទ្ធនឹង Putin។
ភ័ស្តុតាងមានរួមបញ្ចូលអ៊ីម៉ែល ដែលបានត្រូវលួចពីគណៈកម្មាធិការជាតិនៃគណបក្សប្រជាធិបតេយ្យដែលមានសារៈសំខាន់ណាស់ក្នុងការទាក់ទាញអ្នកបោះឆ្នោតចេញពីលោកស្រី Clinton។
ក៏ប៉ុន្តែនៅក្រោយជំនួបនោះមក លោក Trump បានចេញផ្សាយសេចក្តីថ្លែងការណ៍មួយបន្ទោស «ប្រទេសរុស្សី ប្រទេសចិននិងប្រទេសឯទៀតៗ ព្រមទាំងក្រុមនិងប្រទេសខាងក្រៅផ្សេងទៀត»៕
