ប្រធានាធិបតីអាមេរិក ដូណាល់ ត្រាំបាននិយាយកាលពីថ្ងៃអង្គារថា លោកមានជំនួបកំពូលដ៏អស្ចារ្សជាមួយប្រធានាធិបតីរុស្ស៊ី Vladimir Putin នៅក្នុងរដ្ឋធានី Helsinki ទោះបីលោកបានប្រឈមការរិះគន់យ៉ាងខ្លាំងចំពោះការសុខចិត្តទទួលយកការបដិសេធរបស់ប្រធានាធិបតី Putin ថា រុស្ស៊ីមិនបានជ្រៀតជ្រែកក្នុងការបោះឆ្នោតហើយប្រធានាធិបតីត្រាំមិនបានការពារការសន្និដ្ឋានរបស់ភ្នាក់ងារស៊ើបការណ៍សម្ងាត់របស់សហរដ្ឋអាមេរិកថា រដ្ឋាភិបាលក្រុងមូស្គូបានជ្រៀតជ្រែកនៅក្នុងការប្រកួតប្រជែងការបោះឆ្នោតប្រធានាធិបតីឆ្នាំ២០១៦។
លោកប្រធានាធិបតីត្រាំបាននិយាយតាមសារក្នុងប្រព័ន្ធ Twitter ថា «ខណៈដែលខ្ញុំ មានជំនួបដ៏អស្ចារ្សជាមួយអង្គការអូតង់ដែលបានបង្កើនប្រាក់យ៉ាងច្រើន ខ្ញុំក៏មានជំនួបកាន់តែប្រសើរឡើងជាមួយប្រធានាធិបតីរុស្ស៊ី Vladimir Putin។ ជាការគួឲ្យសង្វែក ជំនួបដ៏អស្ចារ្សទាំងនេះមិនបានត្រូវគេរាយការណ៍ទេ។ ព័ត៌មានក្លែងក្លាយបានរាយការណ៍ឆ្កួតលីលា»។
នៅវិមានរដ្ឋសភា Capitol Hill លោក Paul Ryan ប្រធានសភាតំណាងរាស្ត្រ ខាងគណបក្សសាធារណរដ្ឋមកពីរដ្ឋ Wisconsin បានឆ្លើយតបទៅនឹងការវាយតម្លៃរបស់ប្រធានាធិបតីត្រាំ។
លោក Ryan បាននិយាយថា «សូមធ្វើការបញ្ជាក់ឲ្យច្បាស់ថា រុស្ស៊ីបានជ្រៀតជ្រែកក្នុងការបោះឆ្នោតរបស់យើង។ យើងដឹងថា ពួកគេបានជ្រៀតជ្រែកក្នុងការបោះឆ្នោតរបស់យើង ហើយយើងបានអនុម័តការដាក់ទណ្ឌកម្មលើរុស្ស៊ីដើម្បីឲ្យពួកគេទទួលខុសត្រូវ»៕
