ប្រទេសកូរ៉េខាងជើង និងកូរ៉េខាងត្បូងបានចាប់ផ្តើមកិច្ចចរចាកម្រិតខ្ពស់គ្រាមានអាសន្ននៅក្នុងគោលបំណងមួយ ដើម្បីបញ្ឈប់ភាពមិនឈ្នះមិនចាញ់ដ៏តឹងតែងមួយ ដែលអាចនាំឲ្យគូប្រជែងទាំងពីរនេះខិតទៅរកការច្បាំងគ្នា។
កិច្ចចរចាគ្នានេះបានប្រព្រឹត្តទៅនៅថ្ងៃសៅរ៍នៅឯភូមិព្រំដែន Panmunjom នេះបើតាមការប្រាប់ឲ្យដឹងដោយទីភ្នាក់ងារព័ត៌មាន Yonhap ដែលបានដកស្រង់ពាក្យសម្តីនៃក្រុមមន្ត្រីក្រសួងបង្រួមបង្រួមជាតិរបស់រដ្ឋាភិបាលក្រុងសេអ៊ូល។
លោក Kim Kwan-jin ទីប្រឹក្សាសន្តិសុខជាតិរបស់លោកស្រីប្រធានាធិបតី Park Geun-hye និងលោក Hwang Pyong So អ្នកជំនួយការរបស់មេដឹកនាំកូរ៉េខាងជើង Kim Jong Un បានចូលរួមក្នុងការប្រជុំនេះ ដែលមានកំណត់ចាប់ផ្តើមធ្វើនៅម៉ោង៦ល្ងាចម៉ោងក្នុងមូលដ្ឋាន។
គេមិនទាន់បានផ្សាយជាបន្ទាន់អំពីសេចក្តីល្អិតល្អន់នៃការប្រជុំគ្រាមានអាសន្ននេះនៅឡើយទេ ដែលបានធ្វើឡើងតាមការស្នើសុំរបស់រដ្ឋាភិបាលក្រុង ព្យុងយ៉ាង។ ប្រទេសកូរ៉េខាងជើងបានគំរាមកំហែងថានឹងធ្វើ «សង្គ្រាមពេញទំហឹង» ប្រឆាំងនឹងរដ្ឋាភិបាលក្រុងសេអ៊ូល។
ប្រទេសកូរ៉េខាងជើងបានទុកពេលវេលាឲ្យប្រទេសកូរ៉េខាងត្បូងរហូតដល់ម៉ោង៥ល្ងាចតាមពេលវេលាក្រុងព្យុងយ៉ាងនៅថ្ងៃសៅរ៍នេះឲ្យបញ្ឈប់ការផ្សាយការឃោសនាប្រឆាំងនឹងរដ្ឋាភិបាលក្រុងព្យុងយ៉ាងនៅជិតព្រំដែន។
រដ្ឋាភិបាលក្រុងសេអ៊ូលបានប្រកែកមិនព្រមធ្វើតាមសំណើសុំនេះទេ ហើយការកំណត់ពេលវេលាចុងក្រោយបង្អស់បានកន្លងផុតទៅដោយគ្មានឧប្បត្តិហេតុអ្វីឡើយ៕
