ក្រុមមន្ត្រីកូរ៉េខាងត្បូងនិយាយថា ទាហានកូរ៉េខាងជើងម្នាក់បានចុះចូលដោយ ការដើរឆ្លងកាត់តំបន់គ្មានកងទ័ពដែលត្រូវយាមកាមយ៉ាងតឹងតែង។ តំបន់នោះ ជាតំបន់បែងចែកប្រទេសដែលជាសត្រូវនឹងគ្នាយូរលង់មកហើយ ។
អ្នកនាំពាក្យក្រសួងការពារប្រទេសកូរ៉េខាងត្បូងម្នាក់និយាយថា ទាហានវ័យលើជំទង់ប្រទេសកូរ៉េខាងជើង ត្រូវគេព័ទ្ធចាប់ខ្លួននៅបុស្តិ៍យាមនៃតំបន់ដាច់ស្រយាលមួយក្នុងស្រុក Hwacheon, ខេត្ត Gangwon ស្ថិតនៅផ្នែកកណ្តាលនៃឧបទ្វីបនេះ។
អ្នកនាំពាក្យមិនផ្តល់អត្ថាធិប្បាយលម្អិតទេ ដោយគ្រាន់តែនិយាយថាទាហាន នេះកំពុងស្ថិតក្រោមការស៊ើបអង្កេត។
ទីភ្នាក់ងារសារព័ត៌មាន Yonhap របស់កូរ៉េខាងត្បូងបានរាយការណ៍ថា បញ្ហានេះបានបង្កភាពតានតឹងរវាងប្រទេសទាំងពីរនៅព្រំដែន តែគ្មានការវាយប្រយុទ្ធគ្នាទេ៕
