ការិយាល័យដ៏ស្ងាត់ជ្រងំរបស់លោក Kim Joo Il នៅតំបន់ជាយក្រុងភាគនារតីនៃទីក្រុងឡុងដ៍ មិនមានការខុសប្លែកពីអ្វីដែលលោកបានប្រឈមនៅពេលដែលលោកបានបម្រើជាអនុសេនីយ៍ឯកនៅក្នុងកងទ័ពកូរ៉េខាងជើងទេ។
លោក Kim បានរត់គេចចេញពីប្រទេសកូរ៉េខាងជើងនៅឆ្នាំ២០០៥ដោយហែលទឹកឆ្លងកាត់ទន្លេនៅស្រុកកំណើតរបស់លោកនៅក្នុងខេត្ត Hamkyong ភាគខាងជើង។ បន្ទាប់ពីរសាត់ក្នុងទន្លេអស់រយៈពេលជាច្រើនម៉ោង លោកបានទៅដល់ប្រទេសចិន។ ចេញពីទីនោះ លោកបានធ្វើដំណើរឆ្លងកាត់ប្រទេសវៀតណាម កម្ពុជាហើយបន្ទាប់មកប្រទេសថៃ ជាទីបញ្ចប់បានទៅដល់ចក្រអង់គ្លេស២ឆ្នាំក្រោយមក។
លោកឥឡូវនេះជាបណ្ណាធិការកាសែត Free NK នៅក្នុងរដ្ឋធានីនៃចក្រភពអង់គ្លេសដែលមានគោលបំណងលាតត្រដាងការពិតពីជីវិតនៅក្នុងរដ្ឋឯកោហើយនិងការរំលោភធ្វើបាបដែលធ្វើឡើងដោយរដ្ឋាភិបាល។
លោក Kim និយាយថា លោកបានរត់គេចខ្លួនពីមាតុភូមិរបស់លោកពីព្រោះតែ ការកើនឡើងនូវការខូចចិត្តនិងការស្រងាកចិត្តជាមួយមេដឹកនាំផ្តាច់ការកូរ៉េខាងជើង។ លោកជឿថា ជនជាតិកូរ៉េខាងជើងកាន់តែច្រើនឡើងនឹងព្យាយាមរត់គេចខ្លួន ប្រសិនបើមិនមានការភ័យខ្លាចពីការសងសឹកប្រឆាំងនឹងសមាជិកគ្រួសារដែលស្ថិតនៅក្នុងប្រទេសទេនោះ។
ក្រុងកំណើតរបស់លោកគឺ ក្រុង Kilju-gun ស្ថិតក្នុងតំបន់តែមួយដែលនៅទីនោះរដ្ឋាភិបាលរបស់ Kim Jong Un បានធ្វើការសាកល្បងអាវុធនុយក្លេអ៊ែរចំនួន៦ដង។ លោកនិយាយថា៖ «ខ្ញុំមានសាច់ញាតិដែលកំពុងរស់នៅក្រុង Kilju នៅឡើយ។ ដូច្នេះ ខ្ញុំព្រួយបារម្ភអំពីការប៉ះពាល់នៃវិទ្យុសកម្មនិងការខូចខាតពីការសាកល្បងអាវុធនុយក្លេអ៊ែរដែលក្រុមគ្រួសាររបស់ខ្ញុំមាន»។
ថ្លែងតាមអ្នកជិតខាងម្នាក់ដែលបានធ្វើជាអ្នកបកប្រែ លោក Kim និយាយថា មានវណ្ណ:សង្គមមួយនៅកូរ៉េខាងជើងដែលព្យាយាមការពារអំណាច ទ្រព្យសម្បត្តិនិងប្រាក់កាសរបស់ខ្លួន ហើយវណ្ណៈសង្គមនោះមិនដែលជំទាស់ប្រឆាំងរដ្ឋាភិបាលទេ។ ក៏ប៉ុន្តែ លោកបាននិយាយទៀតថា មានវណ្ណៈសង្គមមួយទៀតដែលពួកគេមានការអត់ឃ្លាននិងមានជីវភាពរស់នៅប្រចាំថ្ងៃដ៏លំបាកដែលចង់រើបម្រះ។
លោកនិយាយថា «ខ្ញុំចង់ដាស់តឿនពួកគេហើយផ្តល់ព័ត៌មានដល់ពួកគេ ដូច្នេះ ខ្ញុំបានបោះពុម្ភផ្សាយកាសែតដើម្បីផ្គត់ផ្គង់ព័ត៌មានពីខាងក្រៅដល់ពួកគេ»។
លោក Kim បាននិយាយបន្តទៀតថា៖ «ក្នុងនាមជាពលរដ្ឋម្នាក់ដែលធ្លាប់រស់នៅ កូរ៉េខាងជើង ខ្ញុំចង់បានព័ត៌មានដ៏ខ្លាំងបំផុត ហើយខ្ញុំបានបោះពុម្ភផ្សាយកាសែតមួយដែលហៅថា Free NK ពីព្រោះតែភាពជាបន្ទាន់ ការជឿជាក់ក្នុងបេសកម្មដែលខ្ញុំចាំបាច់បញ្ជូនព័ត៌មានពីខាងក្រៅចូលក្នុងប្រទេសកូរ៉េខាងជើង»។ «ទោះបីមានបណ្តាញព័ត៌មានផ្សេងៗដែលអាចត្រូវបានប្រើប្រាស់ក៏ដោយ ហេតុផលដែលខ្ញុំជ្រើសរើសកាសែតគឺថា មិនមានឧបករណ៍បណ្តាញព័ត៌មានផ្សេងទៀតដែលពលរដ្ឋទូទៅអាចទទួលបាន ហើយពួកគេជាមហាជនដែលអាចផ្លាស់ប្តូរសង្គមកូរ៉េខាងជើង»។
នៅពេលដែលលោក Kim បានចាប់ផ្តើមកាសែត Free NK គោលដៅរបស់លោកត្រូវបោះពុម្ភផ្សាយកាសែត១ម៉ឺនក្បាលដើម្បីទម្លាក់ពីបាឡុងចូលក្នុងប្រទេសកូរ៉េខាងជើង។ ទោះជាយ៉ាងណាក៏ដោយ ផែនការដំបូងមិនបានទទួលជោគជ័យពីព្រោះតែស្ថានភាពអាកាសធាតុនៅលើឧបទ្វីបកូរ៉េ។
លោក Kim បាននិយាយទៀតថា «ជាទូទៅ ខ្យល់បក់ពីកូរ៉េខាងជើងទៅកូរ៉េខាងត្បូង ដូច្នេះ យើងមិនអាចបង្ហោះបាឡុងបានទេ។ ផ្ទុយទៅវិញ យើងបានបង្ហោះបាឡុងពីខែឧសភាឬខែមិថុនាទៅខែតុលា» នៅពេលដែលស្ថានភាពអាកាសធាតុអនុគ្រោះកាន់តែខ្លាំងឡើង។
នៅពេលនោះ លោក Kim និងសម្ព័ន្ធមិត្តរបស់លោកបានទម្លាក់កាសែតពី៥ពាន់ទៅ១ម៉ឺនក្បាលជារៀងរាល់ខែ លោក Kim សង្ឃឹមថា កាសែតនោះខ្លះនឹងត្រូវពលរដ្ឋកូរ៉េខាងជើងក្រខ្សត់រើសមកអាននៅពេលដែលពួកគេស្វែងរកម្ហូបអាហារ និងអុសនៅភ្នំ។
លោកបានពន្យល់ទៀតថា ទោះបីបាឡុងនោះបានត្រូវគេបាញ់ទម្លាក់ក៏ដោយ ដុំកាសែតដែលគេខ្ចប់បានធ្លាក់ហើយបានចែកចាយនៅតំបន់ធំៗ។
លោក Kim សង្ឃឹមថា ការប្រឹងប្រែងរបស់លោកនឹងជួយផ្លាស់ប្តូរផ្នត់គំនិតរបស់ពលរដ្ឋកូរ៉េខាងជើងដើម្បីលើកទឹកចិត្តពួកគេឲ្យព្យាយាមរត់គេចខ្លួនឬប្រយុទ្ធប្រឆាំងនឹងរដ្ឋាភិបាល។ក៏ប៉ុន្តែ លោកក៏ចង់ប្រើប្រាស់កាសែតដើម្បីទទួលបាន និងចែកចាយព័ត៌មានពីខាងក្នុងប្រទេសកូរ៉េខាងជើង ឲ្យកាន់តែសុក្រិត្យឡើង ដើម្បីឲ្យសហគមន៍អន្តរជាតិអាចវិនិច្ឆ័យកាន់តែប្រសើរឡើងថាតើត្រូវទាក់ទងជាមួយប្រទេសនេះយ៉ាងដូចម្តេច។
លោក Kim បាននិយាយទៀតថា លោកសង្ស័យថា ការដាក់ទណ្ឌកម្មសេដ្ឋកិច្ចរបស់អន្តរជាតិនឹងបង្ខំឲ្យមេដឹកនាំកូរ៉េខាងជើង គីម ជុងអ៊ុនបោះបង់ចោលនូវការស្វះស្វែងផលិតអាវុធនុយក្លេអ៊ែរ។
លោក Kim និយាយទៀតថា «កម្មវិធីនុយក្លេអ៊ែររបស់កូរ៉េខាងជើង មិនមានគោលបំណងឲ្យបានទទួលជ័យជម្នះក្នុងសង្គ្រាមប្រឆាំងនឹងសហរដ្ឋអាមេរិកទេ។ ក៏ប៉ុន្តែ ផ្ទុយទៅវិញ កូរ៉េខាងជើងជឿថា ការអភិវឌ្ឍអាវុធនុយក្លេអ៊ែរជាឧបករណ៍មួយដែលផ្តល់រង្វាន់និងធានារបបនោះ ដូច្នេះ កូរ៉េខាងជើងខំព្យាយាមក្នុងការអភិវឌ្ឍនិងបង្កហេតុដោយប្រើអាវុធនុយក្លេអ៊ែរ»។
ក៏ប៉ុន្តែ លោកជឿថា ការដាក់ទណ្ឌកម្មនោះធ្វើឲ្យមានបញ្ហានៅក្នុងទីក្រុងព្យុងយ៉ាង ជាពិសេស បើចិន គោរពនូវការសន្យារបស់ខ្លួនដើម្បីអនុវត្តនូវការដាក់ទណ្ឌកម្មនោះ។
លោក Kim និយាយបន្ថែមទៀតថា «ប្រសិនបើ ចិនបិទប្រេងឬហាមឃាត់ការចេញចូលរបស់ពាណិជ្ជករកូរ៉េខាងជើង ឬមិនចេញទិដ្ឋាការដល់ពលរដ្ឋកូរ៉េខាងជើង បន្ទាប់មកកូរ៉េខាងជើងប្រឈមនឹងវិបត្តិផ្ទៃក្នុង»។
លោក Kim និយាយទៀតថា ពួកវរជនកូរ៉េខាងជើងយល់ថា ពួកគេមិនអាចឈ្នះសង្គ្រាមនុយក្លេអ៊ែរជាមួយសហរដ្ឋអាមេរិកទេ ក៏ប៉ុន្តែ «ពួកគេមានអាវុធនុយក្លេអ៊ែរនិងទ្រព្យសម្បត្តិជាឧបករណ៍ដើម្បីការពារការគ្រប់គ្រងរបស់ពួកគេនិងជាសន្លឹកបៀសម្រាប់ធ្វើការចរចា»។
លោកបានជជែកឲ្យហេតុផលថា ដោយមូលហេតុនេះ សហរដ្ឋអាមេរិកគួរស្វះ ស្វែងធ្វើឲ្យមានកំណែទម្រង់ដល់កូរ៉េខាងជើងតាមរយៈការទូតជាជាងអំណាចខាងយោធា។
លោក Kim និយាយថា «សហរដ្ឋអាមេរិកក៏ចាំបាច់មានតួនាទីដើម្បីធ្វើឲ្យមានស្ថិរភាពនិងសន្តិភាពនៅអន្តរជាតិដែរ»៕
ប្រែសម្រួលដោយ ជឹង ប៉ូជីន
