ប្រទេសកូរ៉េខាងជើងបានបញ្ជាក់ថា ខ្លួនត្រៀមផ្ញើខិត្តប័ណ្ណឃោសនារាប់លានសន្លឹកទៅប្រទេសកូរ៉េខាងត្បូង ដើម្បីជាការសងសឹកចំពោះសកម្មភាពស្រដៀងគ្នានេះដែរ ដែលបានធ្វើឡើងកាលពីពេលថ្មីៗនេះដោយសកម្មជនប្រឆាំងនឹងកូរ៉េខាងជើង។
ទីភ្នាក់ងារព័ត៌មាន KCNA របស់កូរ៉េខាងជើង បានផ្សាយនៅថ្ងៃចន្ទនេះថា កូរ៉េខាងជើងនឹងបង្ហោះបាឡុងចំនួន ៣ ពាន់ ដែលផ្ទុកខិត្តប័ណ្ណប្រឆាំងកូរ៉េខាងត្បូងចំនួនប្រហែល ១២ លានសន្លឹក ឆ្លងព្រំដែនចូលប្រទេសកូរ៉េខាងត្បូង។
ការគំរាមនេះគឺជាសកម្មភាពថ្មីចុងក្រោយបង្អស់របស់រដ្ឋាភិបាលក្រុងព្យុងយ៉ាងសម្រាប់ការសន្យារបស់ខ្លួនដែលថា នឹងកាត់ផ្ដាច់រាល់ទំនាក់ទំនងទាំងអស់ជាមួយនឹងកូរ៉េខាងត្បូង ទាក់ទិននឹងបញ្ហាខិត្តប័ណ្ឌឃោសនានេះ៕
