កូរ៉េខាងជើងប្រាប់ឱ្យដឹងថា ឱកាសមានតិចសម្រាប់ជំនួបកំពូលមួយលើកទៀតជាមួយសហរដ្ឋអាមេរិក បន្ទាប់ពីលោកប្រធានាធិបតីដូណាល់ ត្រាំ នៅសប្តាហ៍នេះ បាននិយាយថា លោកបើកចំហរឱ្យមានជំនួបម្តងទៀតជាមួយមេដឹកនាំកូរ៉េខាងជើង គីម ជុងអ៊ុន។
ទីភ្នាក់ងារព័ត៌មានកណ្តាលផ្លូវការរបស់កូរ៉េខាងជើង (KCNA) បានប្រាប់ឱ្យដឹងថា លោកស្រី Kim Yo Jong ជាប្អូនស្រីរបស់គីម ជុងអ៊ុន បាននិយាយថា ជំនួបកំពូលមួយលើកទៀត «នឹងគ្មានប្រយោជន៍សម្រាប់យើងទេ» ប្រសិនបើសហរដ្ឋអាមេរិក មិនផ្លាស់ប្តូរវិធីដោះស្រាយរបស់ខ្លួនដល់ការចរចានុយក្លេអ៊ែរដែលជាប់គាំងនោះទេ។
លោកស្រី Kim Yo Jong បាននិយាយទៀតថា «វាជាមតិផ្ទាល់ខ្លួនរបស់ខ្ញុំ ក៏ប៉ុន្តែ ជំនួបកំពូលរវាងសហរដ្ឋអាមេរិក និងកូរ៉េខាងជើង នឹងមិនកើតមានឡើងនៅឆ្នាំនេះទេ»។
ទោះជាយ៉ាងណាក៏ដោយ លោកស្រីបាននិយាយថា ទំនាក់ទំនងរវាងលោកត្រាំ និងគីម ជុងអ៊ុន នៅតែខ្លាំងហើយ ទំនងការពារមិនឱ្យមានការបង្កហេតុខ្លាំង។
នៅដើមសប្តាហ៍នេះ លោកប្រធានាធិបតីត្រាំបាននិយាយថា លោកបើកចំហរឱ្យមានជំនួបម្តងទៀតជាមួយគីម ជុងអ៊ុន។
លោកប្រធានាធិបតីត្រាំបានប្រាប់នៅក្នុងកិច្ចសម្ភាសន៍ជាមួយទូរទស្សន៍ Gray ថា «ខ្ញុំយល់ថា ពួកគេចង់ជួប ហើយយើងប្រាកដជាចង់ធ្វើដូច្នេះដែរ»។
អត្ថាធិប្បាយនេះបានធ្វើឱ្យមានការងឿងឆ្ងល់ ពីព្រោះតែកូរ៉េខាងជើងបាននិយាយជាច្រើនខែហើយថា ខ្លួន មិនមានចំណាប់អារម្មណ៍ក្នុងការបន្តការចរចាជាមួយសហរដ្ឋអាមេរិកទេ។
កូរ៉េខាងជើងមានការរកាំចិត្តចំពោះសហរដ្ឋអាមេរិកដែលបដិសេធពុំព្រមបន្ធូរបន្ថយការដាក់ទណ្ឌកម្មសេដ្ឋកិច្ច និងផ្តល់ការធានាសន្តិសុខនៅក្នុងការដោះដូរវិធានការមានកម្រិតដើម្បីរុះរើកម្មវិធីនុយក្លេអ៊ែររបស់ខ្លួន៕
