ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ប្រធានាធិបតី​កូរ៉េ​ខាង​ត្បូង​ស្នើ​ឲ្យ​មាន​កិច្ច​ប្រជុំ​ម្ដង​ទៀត​រវាង​លោក Trump និង​លោក Kim Jong Un


រូបឯកសារ៖ ជំនួបរវាងប្រធានាធិបតីអាមេរិកលោក ដូណាល់ ត្រាំ និងមេដឹកនាំកូរ៉េខាងជើងលោក Kim Jong Un នៅព្រំដែនប្រទេសកូរ់េទាំងពីរ ក្នុងក្រុង Panmunjom ប្រទេសកូរ៉េខាងត្បូង កាលពីថ្ងៃទី៣០ ខែមិថុនា ឆ្នាំ២០១៩។
រូបឯកសារ៖ ជំនួបរវាងប្រធានាធិបតីអាមេរិកលោក ដូណាល់ ត្រាំ និងមេដឹកនាំកូរ៉េខាងជើងលោក Kim Jong Un នៅព្រំដែនប្រទេសកូរ់េទាំងពីរ ក្នុងក្រុង Panmunjom ប្រទេសកូរ៉េខាងត្បូង កាលពីថ្ងៃទី៣០ ខែមិថុនា ឆ្នាំ២០១៩។

ប្រធានាធិបតី​កូរ៉េ​ខាង​ត្បូង​លោក Moon Jae In បាន​និយាយ​ថា លោក​សង្ឃឹម​ថា ប្រធានាធិបតី​សហរដ្ឋ​អាមេរិក​លោក Donald Trump និង​មេដឹកនាំ​កូរ៉េ​ខាង​ជើង​លោក Kim Jong Un នឹង​ជួប​ពិភាក្សា​គ្នា​ម្ដង​ទៀត មុន​ការ​បោះ​ឆ្នោត​ប្រធានាធិបតី​សហរដ្ឋ​អាមេរិក​ចូល​មក​ដល់​នៅ​ខែ​វិច្ឆិកា​ខាង​មុខ។

មន្ត្រី​កូរ៉េ​ខាង​ត្បូង​ម្នាក់​បាន​បញ្ជាក់​នៅ​ថ្ងៃ​ពុធ​នេះ​ថា កាល​ពី​ពេល​ថ្មីៗ​នេះ លោក Moon Jae In បាន​ស្នើ​ដូច្នេះ​ទៅ​កាន់​សេតវិមាន​ប្រធានាធិបតី​អាមេរិក។ មន្ត្រី​រូប​នេះ​បាន​បន្ថែម​ថា ភាគី​សហរដ្ឋ​អាមេរិក «យល់» អំពី​គោល​ជំហរ​របស់​លោក Moon Jae In។

មន្ត្រី​សហរដ្ឋ​អាមេរិក​មិន​បាន​ឆ្លើយតប​ជា​សាធារណៈ​ចំពោះ​យោបល់​របស់​លោក Moon Jae In នៅ​ឡើយ​ទេ។ លោក Moon Jae In បាន​លើក​ឡើង​ដូច្នេះ​ដំបូង​នៅ​ក្នុង​កិច្ច​សន្ទនា​មួយ​កាល​ពី​ថ្ងៃ​អង្គារ​ម្សិលមិញ​រវាង​លោក និង​មន្ត្រី​សហភាព​អឺរ៉ុប​មួយ​ចំនួន។

លោក Steve Biegun អនុ​រដ្ឋមន្ត្រី​ការបរទេស​សហរដ្ឋ​អាមេរិក បាន​បញ្ជាក់​កាល​ពី​ដើម​សប្ដាហ៍​នេះ​ថា កិច្ច​ប្រជុំ​ម្ដង​ទៀត​រវាង​លោក Trump និង​លោក Kim Jong Un ទំនងជា​មិន​អាច​ធ្វើ​បាន​មុន​ខែ​វិច្ឆិកា​នោះ​ទេ ដោយ​មួយ​ផ្នែក​បណ្ដាល​មក​ពី​ការ​ព្រួយ​បារម្ភ​ទាក់ទិន​នឹង​រឿង​ជំងឺ​កូវីដ១៩។

ប៉ុន្តែលោក Biegun ដែល​ជា​អ្នក​ចរចា​ចម្បង​របស់​សហរដ្ឋ​អាមេរិក​លើ​កិច្ចការ​កូរ៉េ​ខាង​ជើងបាន​និយាយ​ថា រដ្ឋាភិបាល​ក្រុង​វ៉ាស៊ីនតោន​នៅតែ​បើក​ចំហរ​ចំពោះ​ការ​ពិភាក្សា​ជាមួយ​នឹង​រដ្ឋាភិបាល​ក្រុង​ព្យុងយ៉ាង។ លោក​បាន​បន្ថែម​ថា គោល​បំណង​របស់​សហរដ្ឋ​អាមេរិក​គឺ​នៅតែ​ដដែល ដែល​នោះ​គឺ «ការ​លុប​បំបាត់​ទាំងស្រុង​ចុងក្រោយ​នៃ​អាវុធ​នុយក្លេអ៊ែរ​នៅ​លើ​ឧបទ្វីប​កូរ៉េ»៕

XS
SM
MD
LG