នៅពេលដែលប្រទេសកូរ៉េខាងជើងបង្កើនការគាបសង្កត់ខាងយោធាលើកូរ៉េខាងត្បូង មេដឹកនាំកូរ៉េខាងជើងលោក Kim Jong Un បានអវត្តមានពីសាធារណជន។
លោក Kim Jong Un ដែលបានចេញបង្ហាញខ្លួនជាសាធារណៈបន្តិចបន្តួចក្នុងឆ្នាំនេះហាក់ដូចជា ផ្ទេរអំណាចឱ្យប្អូនស្រីលោកដែលមានអំណាចច្រើនជាងមុនឱ្យមើលការខុសត្រូវលើការបង្ករឿងរបស់រដ្ឋាភិបាលក្រុងព្យុងយ៉ាងប្រឆាំងនឹងរដ្ឋាភិបាលក្រុងសេអ៊ូល។
អ្នកស្រី Kim Yo Jong ដែលធ្លាប់ត្រូវគេចាត់ទុកថាជាជំនួយការសំខាន់ម្នាក់របស់បងប្រុស បានចាប់ផ្តើមចេញសេចក្តីថ្លែងការណ៍សាធារណៈរបស់អ្នកស្រីផ្ទាល់កាលពីខែមីនា។ ចាប់តាំងពីពេលនោះមកអ្នកស្រីបានក្លាយទៅជាមុខមាត់សាធារណៈនៃគោលជំហរគឃ្លើនជាងមុនរបស់កូរ៉េខាងជើងប្រឆាំងនឹងកូរ៉េខាងត្បូង។
កាលពីសប្តាហ៍ទីមួយនៃខែមិថុនាកូរ៉េខាងជើងបានប្រកាសថាខ្លួននឹងកាត់ផ្តាច់បណ្តាញទំនាក់ទំនងផ្លូវការទាំងអស់ជាមួយកូរ៉េខាងត្បូង។ កាលពីថ្ងៃអង្គារ ទី១៦ ខែមិថុនា កូរ៉េខាងជើងបានប្រើគ្រឿងផ្ទុះដើម្បីបំផ្ទុះអាគារដែលជាស្ថានទូតអន្តរកូរ៉េនៅខាងជើងព្រំដែនរវាងប្រទេសទាំងពីរនេះ។ មួយថ្ងៃបន្ទាប់មកកូរ៉េខាងជើងបានប្រកាសថាខ្លួននឹងដាក់ក្រុមទាហានជាថ្មី និងធ្វើសមយុទ្ធយោធាជាថ្មីឡើងវិញនៅជិតព្រំដែន។
គេដឹងមិនច្បាស់លាស់ទេហេតុដូចម្តេចបានជាកូរ៉េខាងជើងសម្រេចនៅពេលនេះថាជាពេលវេលាដើម្បីបង្កើនមុខមាត់សាធារណៈរបស់អ្នកស្រី Kim Yo Jong។ ភាពមានអំណាចជាងមុនរបស់អ្នកស្រីត្រូវចំពេលគ្នាជាមួយពាក្យចចាមអារាមដែលមិនបានត្រូវបញ្ជាក់ថាពិតឬយ៉ាងណាអំពីសុខភាពលោក Kim Jong Un ដែលលេចមានឡើងនៅពេលលោកអវត្តមានបីអាទិត្យកាលពីចុងខែឧសភា និងដើមខែមិថុនា។
កង្វល់ខាងសុខភាព
លោក Kim Jong Un អាយុ៣៦ឆ្នាំដែលឡើងទម្ងន់ច្រើនកាលពីប៉ុន្មានឆ្នាំមុននេះមិនបានបង្ហាញខ្លួនជាសាធារណៈនៅក្នុងពិធីសំខាន់មួយផ្តល់កិត្តិយសដល់សពជីតាលោកដែលជាមេដឹកនាំបង្កើតប្រទេសកូរ៉េខាងជើង។ ការនិយាយស្មានៗតាមបណ្តាញផ្សាយព័ត៌មានក៏មានច្រើននៅពេលបន្ទាប់មកដោយមានរួមបញ្ចូលរបាយការណ៍ថាលោកទទួលការវះកាត់បេះដូងផងដែរ។
ពាក្យចចាមអារ៉ាមទាំងនេះបាននាំឱ្យមានការបារម្ភអំពីស្ថិរភាពនៃសន្តតិវង្ស Kim ដែលបានគ្រប់គ្រងប្រទេសកូរ៉េខាងជើងចាប់តាំងពីប្រទេសនេះបានត្រូវបង្កើតកាលពីឆ្នាំ១៩៤៨មក។
លោក Kim Jong Un ជាសមាជិកទីបីនៃគ្រួសារលោកដែលបានគ្រប់គ្រងប្រទេសនេះហាក់ដូចជាមិនបានតែងតាំងអ្នកបន្តតំណែងពីលោកទេ។
លោក Chad O’Carroll ជាប្រធានប្រតិបត្តិនៃអង្គការ Korea Risk Group ដែលបង្កើតគេហទំព័រ NK News។ លោកបាននិយាយថា កង្វល់អំពីសុខភាព និងបញ្ហាការបន្តតំណែងអាចជាការពន្យល់មួយក្នុងបណ្តាការពន្យល់មួយចំនួនអំពីការពង្រីកមុខនាទីដឹកនាំរបស់អ្នកស្រី Kim Yo Jung។
លោក O’Carroll បាននិយាយថា «ខ្ញុំយល់ថា ការណ៍នេះសមហេតុសមផលណាស់។ បើមិនដូច្នេះទេ ហេតុដូចម្តេចមិនឱ្យនរណាផ្សេងទៀតបញ្ជូនសារទាំងនេះ»?
ក៏ប៉ុន្តែទោះ ជាយ៉ាងណាក៏ដោយក៏សមដូចលោក O’Carroll និងជនឯទៀតៗចង្អុលបង្ហាញថាមានការពន្យល់ច្រើនមិនទាក់ទងនឹងសុខភាពរបស់លោក Kim Jong Un ឬស្ថិរភាពនៃរបបគ្រប់គ្រងនេះទេ។
ការបត់បែនច្រើនជាងមុន
លទ្ធភាពមួយគឺថាដោយអនុញ្ញាតឱ្យប្អូនស្រីលោកជាមុខមាត់សាធារណៈនៃការប្រឈមជាមួយកូរ៉េខាងត្បូង លោក Kim Jong Un ប្រហែលអាចរក្សាទុកភាពអាចបត់បែនបានរបស់លោកក្នុងពេលអនាគត។
លោក Ramon Pacheco Pardo ដែលជាអ្នកជំនាញខាងកិច្ចការកូរ៉េនៅឯមហាវិទ្យាល័យ King’s College ក្នុងក្រុង Londres បាននិយាយថា «និយាយឱ្យចំទៅគឺថាលោក Kim Jong Un មិនប្រឡាក់ប្រឡូកនឹងការបង្កើនភាពតានតឹងដោយផ្ទាល់ទេ»។
ក្នុងឆ្នាំ២០១៨ លោក Kim Jong Un បានធ្វើជំនួបកំពូលបីលើកជាមួយសមភាគីកូរ៉េខាងត្បូងរបស់លោកគឺលោកប្រធានាធិបតី Moon Jae-in។
លោក Pacheco Pardo បានថ្លែងថា «បើមានជំនួបកំពូលមួយលើកទៀត វាមានន័យថាលោក Kim Jong Un មិនមែនជាជននាំឱ្យមានការបង្កើនភាពតានតឹងជាមួយកូរ៉េខាងត្បូងទេ»។
កាតព្វកិច្ចខាងចំណងទាក់ទងអន្តរកូរ៉េ
ហេតុផលមួយទៀតដែលនៅពេលនេះអ្នកស្រី Kim Yo Jong ជាអ្នកលេចមុខមាត់គឺការទាក់ទងគ្នារវាងប្រទេសកូរ៉េទាំងពីរហាក់ដូចជាការងារធំបំផុតរបស់អ្នកស្រី។
នៅក្នុងឆ្នាំ២០១៨នៃរយៈពេលទំនាក់ទំនងល្អប្រសើរជាងមុនរវាងប្រទេសកូរ៉េទាំងពីរ អ្នកស្រី Kim Yo Jong បានបម្រើការជាប្រេសិតពិសេសហើយបានក្លាយទៅជាសមាជិកទីមួយនៃសន្តតិវង្ស Kim ដែលបានធ្វើដំណើរទៅកូរ៉េខាងត្បូងចាប់តាំងពីសង្គ្រាមកូរ៉េក្នុងទសវត្សរ៍១៩៥០មក។
នៅពេលនេះ អ្នកស្រីហាក់ដូចជាបម្រើការជាអ្នកបំផ្លាញដោយមើលការខុសត្រូវលើការបំផ្លាញសមិទ្ធិអន្តរកូរ៉េជាច្រើនដែលបានសម្រេចក្នុងរយៈពេលនោះ។
ក្នុងខែមិថុនាអ្នកស្រី Kim Yo Jong បានរិះគន់ច្រើនដងដល់រដ្ឋាភិបាលកូរ៉េខាងត្បូងថាបានអនុញ្ញាតឱ្យពួកសកម្មជនបង្ហោះខិត្តប័ណ្ណឆ្លងកាត់ព្រំដែន។ អ្នកស្រីបានហៅពួកជនរត់ចោលប្រទេសដែលបានបញ្ជូនខិត្តប័ណ្ណទាំងនេះថាជា «មនុស្សថោកទាប និងជាមនុស្សពាល»។
នៅពេលកូរ៉េខាងត្បូងបានស្នើក្នុងសប្តាហ៍ទីពីរនៃខែមិថុនាសុំបញ្ជូនពួកបេសកជនដើម្បីបន្ថយភាពតានតឹង អ្នកស្រី Kim Yo Jong បានច្រានចោលសេចក្តីស្នើនេះថា «គ្មានភាពប្រាកដនិយម» «គ្មានការប៉ិនប្រសប់» «គ្មានការប្រុងប្រយ័ត្ន» «គួរឱ្យខ្លាច» និងជា «រឿងកំប្លែកកំប៉ិកកំប៉ុក»។
តើការណ៍នេះនាំឱ្យមានសមិទ្ធិផលខាងយោធាឬទេ?
អ្នកស្រី Kim Yo Jong អាយុ៣២ឆ្នាំនៅពេលនេះកាន់តំណែងជានាយិការងនៃមន្ទីររណសិរ្សបង្រួបបង្រួមនៃគណបក្សពលករកូរ៉េដែលកាន់ការខាងទំនាក់ទំនងជាមួយកូរ៉េខាងត្បូងដោយមានរួមបញ្ចូលការឃោសនា និងចារកម្មផងដែរ។
អ្នកវិភាគខ្លះមានជំនឿថាគោលជំហរតឹងរ៉ឹងថ្មីរបស់អ្នកស្រី Kim Yo Jong ប្រហែលបានត្រូវរៀបចំឡើងដើម្បីពង្រឹងគុណវុឌ្ឍិខាងយោធារបស់អ្នកស្រី និងពង្រីកអំណាចអ្នកស្រីផងដែរ។ការណ៍នេះមិនមែនជាការងាយស្រួលទេនៅក្នុងប្រព័ន្ធមួយគ្របដណ្តប់ដោយពួកបុរស និងជាប្រព័ន្ធឋានានុក្រមដូចប្រព័ន្ធនៅក្នុងកូរ៉េខាងជើង។
លោក Jay Song ជាអ្នកបង្រៀនផ្នែកការសិក្សាអំពីប្រទេសកូរ៉េនៅឯវិទ្យាស្ថានកូរ៉េនៃសាកលវិទ្យាល័យ Melbourne ក្នុងប្រទេសអូស្ត្រាលី។ លោកបាននិយាយថា «នៅពេលមានកង្វល់ច្រើនឡើងៗអំពីសុខភាពបងប្រុសអ្នកស្រី អ្នកស្រី Kim Yo Jong បង្ហាញអំណាចអ្នកស្រីដើម្បីទទួលការគាំទ្រពីពួកអ្នកនិយមនយោបាយតឹងរ៉ឹង និងពីពួកយោធា»។
ស្រដៀងគ្នានេះដែរ អ្នកវិភាគខ្លះសង្ស័យថាអ្នកស្រី Kim Yo Jong នៅពេលនេះបង្កើនភាពតានតឹងជាមួយកូរ៉េខាងត្បូងដើម្បីបង្កើនគុណវុឌ្ឍិខាងយោធារបស់អ្នកស្រី និងបំបាត់កង្វល់នៅក្នុងចំណោមពួកមេដឹកនាំកូរ៉េខាងជើងនៅក្រោយការដំឡើងឋានៈអ្នកស្រីនៅក្នុងឋានានុក្រមនៃប្រទេសនេះ។
លោក Christopher Green ដែលជាអ្នកបង្រៀនខាងការសិក្សាអំពីប្រទេសកូរ៉េនៅឯសាកលវិទ្យាល័យ Leiden ប្រទេសហូឡង់បាននិយាយថា «ខ្ញុំយល់ថាការណ៍នេះគួរឱ្យជឿបាន»។
លោក Green បានថ្លែងថាទោះណាជាការយល់ច្រឡំមួយដោយស្មានថា ការណ៍នេះមានន័យថាលោក Kim Jong Un មានជំងឺក៏ដោយ។
លោកបាននិយាយបន្ថែមទៀតថា «លោក Kim Jong Un ប្រហែលមានអំណាចថមថយ ក៏ប៉ុន្តែគ្មានអ្វីបញ្ចាក់ថាជាការពិតទេ»៕
ប្រែសម្រួលដោយ ឈឹម សុមេធ
