កាលពីខែមិថុនា មេដឹកនាំកូរ៉េខាងជើងលោក Kim Jong Un បានបញ្ជាឲ្យប្រទេសខ្លួនប្រុងប្រៀបទាំង«ការសន្ទនានិងការប្រឈម»ជាមួយសហរដ្ឋអាមេរិក។ ទម្លាប់ចាស់នេះមិនបានធ្វើឲ្យសហរដ្ឋអាមេរិក និងកូរ៉េខាងត្បូងចំណាយពេលយូរដើម្បីត្រៀមសម្រាប់ទិសដៅទាំង២នេះទេ។
កាលពី២សប្តាហ៍មុន កូរ៉េខាងជើងបានបង្ហើបថា ខ្លួនបើកឲ្យមានការទាក់ទងគ្នាច្រើនឡើងជាមួយពិភពខាងក្រៅ ប៉ុន្តែនៅសប្តាហ៍នេះ កូរ៉េខាងជើងបានរិះគន់រដ្ឋាភិបាលក្រុងសេអ៊ូលនិងរដ្ឋាភិបាលក្រុងវ៉ាស៊ីនតោនចំពោះការធ្វើសមយុទ្ធយោធារួមគ្នា។ នេះជាការប្រែក្រឡាស់លឿនហួសពីបទដ្ឋានកូរ៉េខាងជើងខ្លូនឯង។
នៅថ្ងៃពុធនេះ លោក Kim Yong Chol ឧត្តមសេនីយ៍ និងជាអ្នកនយោបាយជាន់ខ្ពស់របស់កូរ៉េខាងជើង បានព្រមានថា រដ្ឋាភិបាលក្រុងវ៉ាស៊ីនតោន និងរដ្ឋាភិបាលក្រុងសេអ៊ូលនឹងប្រឈម«វិបត្តិសន្តិសុខដ៏ធ្ងន់ធ្ងរ» ពីព្រោះតែជម្រើសខុសរបស់ពួកគេក្នុងការធ្វើសមយុទ្ធ។
កាលពីមួយថ្ងៃមុន លោកស្រី Kim Yo Jong ប្អូនស្រីដ៏មានឥទ្ធិពលរបស់លោក Kim Jong Un មេដឹកនាំកូរ៉េខាងជើង បានហៅការសម្រេចចិត្តរបស់កូរ៉េខាងត្បូងថា«ជាការវៀចវេរ» ដោយនិយាយថា សមយុទ្ធនេះបង្ហាញថា កូរ៉េខាងជើងចាំបាច់ត្រូវតែធ្វើឲ្យជឿនលឿនសមត្ថភាពខាងវាយប្រហារបង្ការជាមុខ។
ក្នុងការបង្ហាញនូវការតវ៉ាប្រឆាំងនឹងសមយុទ្ធនេះ កូរ៉េខាងជើង កាលពីថ្ងៃអង្គារ និងថ្ងៃពុធបានបដិសេធមិនឆ្លើយការហៅទូរសព្ទរបស់កូរ៉េខាងត្បូងតាមរយៈបណ្តាញទូរសព្ទចំនួនពីរដែលទើបតភ្ជាប់កាលពីពេលថ្មីៗនេះទេ។
កូរ៉េខាងជើងបានស្តីបន្ទោសរដ្ឋាភិបាលក្រុងវ៉ាស៊ីនតោន និងរដ្ឋាភិបាលក្រុងសេអ៊ូលចំពោះការកើនឡើងនូវការតានតឹងនេះក៏ដោយ តែយុទ្ធសាស្ត្រនេះមិនមែនជារឿងថ្មីនោះទេ។
អស់ជាច្រើនឆ្នាំមកហើយ រដ្ឋាភិបាលក្រុងព្យុងយ៉ាងបានប្រើការគំរាមកំហែងផង និងការចរចាផងដើម្បីដាក់សម្ពាធលើរដ្ឋាភិបាលក្រុងវ៉ាស៊ីនតោន និងរដ្ឋាភិបាលក្រុងសេអ៊ូល។ នេះបើតាមពួកអ្នកជំនាញ៕
