ប្រទេសកូរ៉េខាងជើងមានគម្រោងបើកសន្និសីទនយោបាយដ៏សំខាន់មួយដើម្បីពិភាក្សា«បញ្ហាបន្ទាន់»នៃការធ្វើឱ្យប្រសើរឡើងនូវវិស័យកសិកម្មដែលជាអាចជាសញ្ញាដ៏អាក្រក់មួយនៃអសន្តិសុខម្ហូបអាហារនៅពេលដែលភាពឯកោខាងសេដ្ឋកិច្ចរបស់ប្រទេសនេះមានកាន់តែខ្លាំងឡើងនៅពេលមានការជំរុញផ្នែកអាវុធនុយក្លេអ៊ែរ។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មាន AP។
ទីភ្នាក់ងារសារព័ត៌មានមជ្ឈិមរបស់កូរ៉េខាងជើងបានបញ្ជាក់នៅថ្ងៃចន្ទនេះថាពួកសមាជិករបស់ការិយាល័យនយោបាយបក្សពលករកូរ៉េខាងជើងបានជួបប្រជុំគ្នាកាលពីថ្ងៃអាទិត្យម្សិលមិញហើយបានព្រមព្រៀងគ្នាធ្វើការប្រជុំពេញអង្គដ៏ធំមួយរបស់គណៈកម្មាធិការមជ្ឈិមបក្សនៅចុងខែកុម្ភៈនេះដើម្បីសើរើពិនិត្យមើលឡើងវិញនូវយុទ្ធសាស្ត្រនានាលើវិស័យកសិកម្មនិងកំណត់គោលដៅថ្មី។ ទីភ្នាក់ងារសារព័ត៌មាននោះបានបញ្ជាក់ទៀតថាពួកសមាជិកការិយាល័យនយោបាយបានទទួលស្គាល់ពីចំណុចរបត់មួយដែលត្រូវចាំបាច់ធ្វើឱ្យប្រសើរឡើងដើម្បីផ្លាស់ប្តូរនៅក្នុងការអភិវឌ្ឍវិស័យកសិកម្ម។
ជំនួបរបស់សមាជិកការិយាល័យនយោបាយមជ្ឈិមបក្សបានកើតមានឡើងនៅពេលដែលមានការចង្អុលបង្ហាញថាប្រទេសកូរ៉េខាងជើងបានប្រុងប្រៀបរៀបចំក្បួនព្យុហយាត្រាយោធាដ៏ធំមួយនៅក្នុងរដ្ឋធានីព្យុងយ៉ាងដែលអាចធ្វើនៅសប្តាហ៍នេះដើម្បីបង្ហាញពីការដឹកនាំដ៏អស្ចារ្យរបស់មេដឹកនាំកូរ៉េខាងជើង លោក Kim Jong Un ហើយនឹងការរីកលូតលាស់នៃសមត្ថភាពនៃការផលិតអាវុធនុយក្លេអ៊ែររបស់លោកដែលលោកបានខិតខំជំរុញយ៉ាងខ្លាំងថ្វីបើប្រភពធនធានមានកម្រិតហើយមានបញ្ហាសេដ្ឋកិច្ចដ៏ខ្លាំងក៏ដោយ។
លោក Lee Sung-jun អ្នកនាំពាក្យនាយអគ្គសេនាធិការកងទ័ពរបស់ប្រទេសកូរ៉េខាងត្បូងបាននិយាយថាយោធារបស់កូរ៉េខាងត្បូងបានតាមដានឃើញការកើនឡើងសកម្មភាពដែលទាក់ទិននឹងការហាត់សមសម្រាប់ក្បួនព្យុហយាត្រាយោធានៅក្នុងប្រទេសកូរ៉េខាងជើង ក៏ប៉ុន្តែបានបដិសេធមិនមិនចែករំលែកការវាយតម្លៃចំៗថានៅពេលណាពិធីនឹងធ្វើឡើង។
ថ្វីបើមិនធ្លាប់មានកាលពីពេលមុនក៏ដោយ វាមិនមែនជារឿងធម្មតាសម្រាប់កូរ៉េខាងជើងធ្វើការប្រជុំពេញអង្គផ្សេងគ្នា២របស់គណបក្សក្នុងរយៈពេល២ខែនោះ។ វាក៏ជារឿងកម្រមួយដែរចំពោះកូរ៉េខាងជើងបើកសម័យប្រជុំពេញអង្គមួយលើរបៀបវារៈតែមួយនោះគឺវិស័យកសិកម្ម។ នេះបើតាមការបញ្ជាក់របស់លោក Koo Byoungsam អ្នកនាំពាក្យក្រសួងបង្រួបបង្រួមជាតិកូរ៉េខាងត្បូងនៅក្នុងសន្និសីទកាសែតនោះ៕
ក្រុងសេអ៊ូល ប្រទេសកូរ៉េខាងត្បូង —
