មេដឹកនាំកូរ៉េខាងជើងលោក Kim Jong Un និយាយថា សហរដ្ឋអាមេរិកត្រូវតែដឹងថា កម្មវិធីនុយក្លេអ៊ែររបស់កូរ៉េខាងជើងគឺជាកម្មវិធីពិតៗ។
នៅក្នុងការថ្លែងសុន្ទរកថាអបអរឆ្នាំថ្មីនៅថ្ងៃចន្ទនេះ លោក Kim Jong Un បានព្រមានថា លោកមានប៊ូតុងចុចបញ្ជាគ្រាប់នុយក្លេអ៊ែរនៅលើតុធ្វើការរបស់លោក។
លោក Kim Jong Un និយាយយ៉ាងដូច្នេះថា៖ «គ្រាប់នុយក្លេអ៊ែររបស់យើងអាចបាញ់ដល់ដែនដីគោករបស់សហរដ្ឋអាមេរិកទាំងមូល។ សហរដ្ឋអាមេរិកមិនអាចចាប់ផ្ដើមធ្វើសង្គ្រាមប្រឆាំងនឹងខ្ញុំ និងប្រទេសកូរ៉េខាងជើងនោះទេ»។
លោក Kim Jong Un បានបញ្ជាក់ទៀតថា ប្រទេសកូរ៉េខាងជើង «អាចទប់ទល់ជាមួយនឹងការគំរាមកំហែងនុយក្លេអ៊ែរណាមួយពីសហរដ្ឋអាមេរិកបាន ហើយកូរ៉េខាងជើងមានឧបករណ៍ការពារនុយក្លេអ៊ែរយ៉ាងខ្លាំងក្លាមួយដែលមានសមត្ថភាពអាចរារាំងសហរដ្ឋអាមេរិកមិនឲ្យប្រឡែងលេងជាមួយភ្លើងបាន»។
លោកបន្ថែមទៀតថា៖ «សហរដ្ឋអាមេរិកត្រូវតែដឹងថានេះមិនមែនជាការគំរាមនោះទេ ប៉ុន្តែគឺជាការពិត»។
សុន្ទរកថាឆ្នាំថ្មីដែលធ្វើឡើងប្រចាំឆ្នាំរបស់លោក Kim Jong Un ត្រូវបានគេចាត់ទុកជាទូទៅថាជាការបង្ហាញអំពីទិសដៅ និងអាទិភាពរបស់លោកសម្រាប់ឆ្នាំថ្មី។
កាលពីឆ្នាំ ២០១៧ កន្លងទៅនេះ លោក Kim Jong Un និងប្រធានាធិបតីអាមេរិកលោក Donald Trump បានឌឺដងពាក្យសម្ដីដាក់គ្នាជាច្រើន ដោយលោក Trump បានព្រមានថា កូរ៉េខាងជើងនឹងប្រឈមនឹង «ភ្លើងកំហឹង» ប្រសិនបើកូរ៉េខាងជើងធ្វើឲ្យប៉ះពាល់ដល់សហរដ្ឋអាមេរិក។
ចំណែកឯលោក Kim Jong Un វិញ បានឆ្លើយតបដោយហៅលោក Trump ថាជា «មនុស្សចាស់ភ្លីភ្លើ» និងបានហៅឥរិយាបថរបស់លោក Trump ថាជាឥរិយាបថរបស់មនុស្សវិកលចរិត៕
